【澳門葡國餐】隱藏市中心、2人餐500蚊有找！澳門人推介葡國菜餐廳九魚舫木槺布甸／葡式炒飯／炭燒牛扒

去澳門快閃遊，好多時都會想揀葡國餐，但點樣揀葡國菜餐廳呢？最直接嘅方式就當然係上網搵吓邊間評價最好啦！不過，有啲餐廳卻比較少人評價，到底係咪代表水平參差？今次E.A.Two前往一間座落澳門市中心卻極少人評價嘅葡國菜餐廳，都係因為編輯得閒無事同澳門人搭嗲先知。呢間樓上葡國餐，氣氛浪漫，適宜情侶拍拖兩個人撐檯腳！

座落澳門市中心嘅「九魚舫」，距離「大三巴牌坊」僅有8分鐘步程，「議事亭前地」只有6分鐘步程，就算係「新葡京酒店」亦只需10分鐘步程，而上行4分鐘亦可到達「大炮台公園」，對於遊客嚟講非常方便。不過，似乎就無乜人提過呢間葡國菜餐廳。

雖然位於市中心範圍，交通便捷，但餐廳並非地舖，反而係一間樓上舖，需要從澳門伯多祿局長街37號嘅「白馬行」商場搭電梯上3字樓。如果單單從地面觀察，一般人的確未必察覺得到有間葡國菜餐廳喺樓上，而且係一間適合撐檯腳嘅餐廳。

「九魚舫」晚市有雙人套餐提供，只限星期六及日，包含有頭盤、餐湯、主菜、甜品及飲品，兩位價為MOP498，加一後人均約為MOP273。二百幾蚊嘅套餐到底有咩食呢？頭盤有凱薩沙律配煙三文魚，餐湯有薯茸青菜湯、法國香蒜湯，主菜有炭燒西冷扒或托斯卡納三文魚，葡式海鮮炒飯或蒜蓉炒雜菜，甜品則有木槺布甸、芝士蛋糕、薯仔蛋糕，飲品則有紅酒、白酒、咖啡、茶、可樂、雪碧可擇。

該店寫明係由前澳督府最後6任總督御廚盧子成先生主理，至今係澳門一間老牌葡國菜餐廳，目前價格卻頗為親民，以一頓正宗葡國餐嚟講，兩個人500蚊有找，的確唔算昂費，加上水準不俗，環境氣氛舒適，地方闊落，CP值頗高！

點餐後，侍應會先送上每人一份餐包及油醋醬汁。餐包呈烏黑色，侍應回應指呢款係墨魚汁餐包，麵包只係有輕微墨魚汁鹹香，麵包烘得微暖，表皮亦微脆，內裏卻入口鬆軟，配上油醋特別醒胃，就好似意大利麵包都係會配黑醋名橄欖油一樣。至於凱薩沙律配煙三文魚就不過不失，就一埋沙律菜上面有粒粒三文魚、芝士粒，無乜特別。

檸檬茶係全份套餐入面最失敗嘅地方，入口好似飲水一樣，無檸檬香，亦無紅茶味，後來我哋請侍應麻煩加返茶入去先好少少，但都係可以叫做淡而無味，加糖水係連糖水都無咩味，最多加返少少甜味。而薯茸青菜湯、法國香蒜湯質感濃稠，分別將薯仔、青菜、蒜頭打成蓉，再調配成西湯。

侍應有詢問炭燒西冷扒要幾成熟，選擇7成熟係最合理，牛肉質感軟嫩，留有肉汁，入口有濃郁牛香。店內有唔少馬介休嘅食法，有興趣不妨試一試。今次套餐另一款主菜就揀咗葡式海鮮炒飯，份量不少，飯粒乾爽，亦有鑊氣。

木槺布甸、薯仔蛋糕係今次選擇嘅套餐甜品，薯仔蛋糕就係帶有薯仔味嘅蛋糕，質感比薯蓉硬，甜度唔高。而木槺布甸則為編輯私心推介，據悉呢款木槺布甸係該店獨創甜品，難怪質感同平常食到嘅木槺布甸唔一樣。呢款木槺布甸分成十幾層，木槺就即係餅乾碎，當中由餅乾碎、忌廉互相夾雜，層層堆疊均勻，形成千層蛋糕模式。更特別嘅地方，係木槺布甸質感恍如雪糕，帶有微冷口感，實在冰爽，而且入口即融，質感細緻，有驚喜！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金。

❷ 午市套餐會比較平，星期一至五會抵啲，有主食配甜品及飲品，價格由MOP98至148不等，可選澳門摩囉雞飯、蒜子汁牛仔肉配薯條、蘋果肉桂豬扒飯、蔥油培根海鮮意粉、蜂蜜芥末焗三文魚配時蔬、鮑魚鴿肉飯，甜品則有木槺布甸、雞蛋布甸、檸檬撻，飲品則只有檸茶、奶茶、咖啡。

❸ 店內有加一服務費，不設外賣。而唔少侍應都係需要同英文溝通。

❹ 下午茶時間為15:00至17:00，有炸馬介休球、豬扒包、木槺布甸等小吃，連飲品，兩位價為MOP108。