闖入澳門最東點九澳聖母村天涯海角！一排5棟迴廊式葡國建築原為痳瘋病院打卡三角教堂／燈塔、俯視機場景

講到去澳門，你會諗起邊個景點呢？好多人都會提議去澳門半島、氹仔、路氹城內嘅地方，近年較多人會前往路環市區。今次E.A.Two就前往距離路環市區有30分鐘車程嘅澳門最東點╴九澳。當中，九澳聖母村係全新景點，原先係痲瘋病院遺址，現時環境清幽，更可打卡教堂、燈塔、葡式建築，即睇九澳景點、交通方法！

九澳交通

「九澳聖母村」位於澳門東面，對於好多遊客嚟講，應該依然未算好熟悉，所以整個空間都係人流稀少。事實上，從「亞馬喇前地」前往「九澳聖母村」，需要1至1.5小時車程，必須先經過氹仔、路氹城賭場群，更要穿過路環市區、黑沙海灘，巴士走到最後先能夠抵達！

九澳聖母村景點（1）﹕九澳七苦聖母小堂

巴士總站座落「九澳油庫」旁邊，位置偏僻，人跡罕至。不過，回轉頭依「九澳聖母馬路」徒步約1分鐘，就能夠踏入「九澳聖母村」入口！步行上斜，即可以見到左面係「九澳七苦聖母小堂」，直行就係「九澳聖母村活動中心」，前者並非開放公眾入內，但後者就容許公眾進入參觀。

「九澳聖母村」於2021年中修復後先重開，原先其實係由九澳痲瘋院舍、九澳七苦聖母小堂等建築物組合而成。「九澳聖母村」於1964年建成，係痲瘋病院遺址，原先包含「九澳痲瘋院」，由澳葡政府於1885年建立，專門收容女性痲瘋病人，同時係全澳門最後一個關閉嘅痲瘋病院。後來，呢座痲瘋病院於90年代轉為「九澳老人院」，專門收容痊癒嘅老人家。

「九澳七苦聖母小堂」頂頭可見十字架，聖堂呈三角形設計，有如三角教堂。據悉，建築設計係來自於意大利雕刻工藝家、米蘭對術家。而教堂屋頂呈8組斜樑，每教堂劃分為7個部份，代表住「七苦」。而所謂嘅「七苦」，其實係指聖母一生經歷嘅七件痛苦事，包括預言之苦、利劍錐心、舉家逃亡、幼子失散、耶穌受難、懷抱耶穌、埋葬耶穌。

九澳聖母村景點（2）﹕九澳聖母村活動中心

繼續前行，就係一連五棟一式一樣嘅迴廊式葡國建築物，以黃、紅色為主調，用色搶眼。每一間只係簡單寫上第幾號小屋，內裏展示咗昔日為痲瘋病院嘅歷史，連當日嘅病床空間都予以保留。另外，呢幾棟建築物除咗有用作展示室，以及咖啡店用途，不時重會有期間限定展覽可以參觀。

「九澳聖母村」座落澳門以東、路環東北面，係九澳山一個小谷地，週邊多為工業區，不過整個九澳依然三面環海。而「九澳村」同「九澳聖母村」係兩個唔同嘅地方，前者係靠近「九澳聖若瑟學校」，只係路環一個原住民聚居嘅古老村落，村民唔多，近乎與世隔絕，同「九澳聖母村」位置大相逕庭。

九澳聖母村景點（3）﹕Hold On To Hope Café＋5幢小屋

「Hold On To Hope Café」又叫「H2H Cafe」，既係支援戒毒康復者嘅基地，亦係「九澳聖母村」內唯一一間食肆及咖啡店。既可以買杯咖啡，亦可以試吓各款葡式輕食，戶外座位正對「九澳聖母村」風景，網紅IG打卡必到！從咖啡店折返建築物中段，可見另一端有純白色聖母像，簡潔精緻，聖母像背後為西面方向，換言之就係黃昏日落最佳賞景處！

聖母像背後係一連5間單幢平房，以迴廊式葡國建築設計。呢幾幢平房本身就係痲瘋病院遺址，以前每一間都設有小廚房同洗手間，甚至有自來水及排水系統。每間屋大小比當日covid期間香港嘅方倉地方更加大，而且富有人性，原來近年嘅香港人連當日痲瘋病人都不如。現時，建築物唔單止保留葡式建築設計特色，其中1間改為咖啡店用途，另外4間則改為歷史展示室及藝術展覽用途。