【澳門美食】暗藏平價酒店內！蘭香閣舊式茶樓$33半肥瘦叉燒飯地道蛋黃煎米鷄到底係乜東東？

香港地道茶樓已經愈趨減少，取而代之嘅係一間又一間新式酒樓，而澳門反而仍然有一間澳門人常去嘅舊式茶樓！該店暗藏於一間舊式平價酒店內，當中受歡迎嘅有半肥瘦叉燒，最平只需MOP33就食到，不妨拍拖兩個人去試試。另外，有一款點心連香港都無得食，你又估唔估到咩係蛋黃煎米鷄呢？

座落「澳門東亞酒店」內嘅「蘭香閣」，徒步至「康公夜市」只需1分鐘，距離「大三巴牌坊」亦只有7分鐘步程，但遊客就未必會搵到呢間當地人嘅舊式茶樓，最適合晨早去飲早茶！

「蘭香閣」並無靚裝，呢間老牌茶樓依然維持上世紀裝潢，只係得陳舊擺設，恍如時空穿梭回到舊時，滿佈老茶樓氛圍。據澳門官方指出，該店有超過60年歷史。據《東亞酒店70年前代表時髦風華》顯示，「澳門東亞酒店」係喺1937年落成，樓高9層，故「蘭香園」唔少於60年歷史亦算合理。

店內特別有一張餐牌寫住鹵味，即係我哋所講嘅燒味，味部更特設燒味檔。當中，選擇有熏蹄拼雞MOP85、叉燒拼雞MOP75、火肉拼鴨MOP75、蜜汁叉燒MOP65、白切肥雞MOP65，加碗白飯MOP8。如果想要價格再平啲，可以試吓叉雞飯MOP35、叉燒飯MOP33、熏蹄飯MOP37、熏蹄雞飯MOP42，其中半肥瘦叉燒係該店最受歡迎嘅選擇。

資訊科技發達後﹐茶樓點心紙一早已變成QR Code落單，但「蘭香閣」則仍然保持點心紙傳統，要食點心就要剔點心紙。香港人喺香港飲茶，一早就脫離飲茶歎報紙嘅習慣，除咗去沙田「富東閣海鮮酒家」先會依然有茶客睇報紙同慢慢坐。而呢間澳門舊式茶樓亦可以見到週邊茶客會歎茶同睇報紙，只不過當日就未見到有點心推車，只有人手賣點心。

「蘭香閣」點心價錢由MOP16起，小點MOP16、花點MOP17、中點MOP23、大點MOP26、頂點MOP29、特點MOP31，相信大家唯一可能未見過嘅應該係花點，價格係介乎於小點同中點之間，而點心紙內都有唔少係花點。點心紙有唔少懷舊點心，另有生滾粥、湯粉麵等可以選擇。

舉吓例子，鮮豬潤燒賣係中點，鮮蝦腸粉係大點，芺蓉荔甫角係花點，白花釀尖椒係大點，鳳爪排骨飯係頂點，松花皮蛋酥係花點，雲腿叉燒酥係花點，四寶滑雞札係花點。鮮豬潤燒賣一籠只得兩粒，上層係一片豬潤，下層就係豬肉球，豬肉鹹度適中，略嫌豬潤較乾同老；雲腿叉燒酥一碟有三隻，留意叉燒酥於11點後未必有得食，因為好快會售馨。雖然今次無試叉燒飯，但叉燒酥內都係叉燒粒，相對嚟講就係選用較瘦嘅叉燒，但瘦得嚟又唔會太乾柴，始終有少少油香。

而清香蒸米鷄係頂點，蛋黃煎米鷄則為特點，睇到呢度，終於有一款係港式茶樓或酒樓已經唔會見到嘅點心，個「鷄」字甚至唔係香港人平時用開嘅「雞」字。清香蒸米鷄即係蒸糯米雞，而蛋黃煎米鷄就係煎糯米雞。將原隻糯米雞沾滿蛋液，再放落鑊煎香，既可充滿蛋香，邊緣亦更容易煎至脆卜卜，比蒸糯米雞更香口惹味！將蛋黃煎米鷄咬下口，就似一餅煎香飯糰，飯粒邊緣入口焦脆，就好似飯焦一樣！內餡同普遍糯米雞無異，都係有豬肉，甚至雞肉等等。