【曼谷展覽2024】Hello Kitty 50週年曼谷站實況！展覽分8區、泰服版打卡／迷你TeamLab／自己畫公仔！與Sanrio家族攜手登陸Central World！

今年係Hello Kitty 50週年，小女孩已經踏入50歲生日，世界各地都有慶祝活動，身為Hello Kitty迷嘅編輯Miss A自然要到處去參觀慶生活動啦！今次就前往泰國，原來Hello Kitty 50週年展覽重有一個曼谷站，展覽分為8個區域，更聯同Sanrio家族現身，而家去直頭唔使等入場，亦唔使同人爭位影相，淨返最後幾個禮拜咋！Sanrio迷若拍拖兩個人去開曼谷，不妨去逛吓同打卡泰國版Hello Kitty啦！

展覽位置座落於曼谷Central World內，從BTS連接嘅天橋即可抵達商場範圍，商場側邊有扶手電梯直達6樓，唔需要於商場內繞圈。不過到達6樓之後﹐就要去近右邊方向搵條扶手電梯上7樓。抵達7樓後，就會見到Hello Kitty 50週年曼谷站嘅宣傳牌，搵吓Sushiro喺邊，展覽就近在眼前。

Hello Kitty 50週年曼谷站都算係一個奇幻展覽，Hello Kitty係一個獨立展覽，而Sanrio家族就係另一個展覽，門票並唔一樣，一個價錢並唔包括另一個展覽，所以如果要睇晒兩個展覽，就要每人買Double價錢嘅門票。由於編輯對於其他角色並無興趣，加上事前睇完「菲律賓賭王」泰國通胡慧沖介紹，更加覺得另一邊流流哋，只有一兩個部份設計比較吸引，所以並無再額外付費。今次展覽好處係分開兩個價錢，唔會逼人睇埋其他角色，只需要按喜好去購買門票，呢方面的確係比其他展覽優勝。

曼谷站展覽由即日起截至11月10日為止，其實已經開始咗幾個禮拜，最初需要分slot進入展場，但現時基本上已經無分slot，任何時間都可以入場，而且無限時打卡。對於KOL來說，要搶fo必然係最早前往做搶先參觀好；但對於真心喜愛嘅人嚟講﹐其實中期前往先係最好，因為人少又逛得舒服，唔使同人逼同等候影相。「菲律賓賭王」甚至教大家行到最後再返轉頭，就可以避開人群嚟打卡，但目前基本上用唔著，中期前往順住落慢慢行都無乜人。

大門口一層為櫃檯、飲品區、商品區、貼紙相區，商品選擇並唔算多，都係帆布袋、文具、睡衣服飾、毛巾、小盒、3C用品等，50週年限定商品亦少，價格卻偏高。而且大多數商品都係平平無奇，大多同平時Sanrio Gift Gate無異，想搵一隻泰國版嘅Hello Kitty都無！

上行扶手電梯，自然到達Hello Kitty 50週年曼谷站入口，左邊係Sanrio家族大門口，而右邊就係Hello Kitty獨立門口，兩邊門口都有紙版公仔標示。Sanrio家族嗰邊有My Melody、Kuromi、布甸狗、玉桂狗、PC狗、XO仔、Pekkle、水怪等，而甫踏入Hello Kitty大門，映入眼簾嘅係一道Hello Kitty造型隧道，打卡必到！

接下來，就係Hello Kitty最喜愛嘅紅蘋果區，巨型蘋果上有唔同投影圖案，下方亦有一個個小蘋果，小心被蘋果跘倒！繼續進入會到達Hello Kitty廚房區，當中有小賣部、可愛蛋糕同冬甩造型，前方更有一個投影器，以及一隻身穿粉紅色衫嘅經典Hello Kitty雕塑像。對面重有一個繪畫區，於檯面取得Hello Kitty圖案畫紙後，可以用蠟筆髹上喜愛顏色。當作品完成後，只需要交予工作人員，對方就會將小畫紙放入焗爐，不出數秒你就會發現自己嘅作品投射於螢光幕上！用蠟筆繪畫本身就比較粗糙，但經過AI調校後，顏色等都有所不同，明顯係較為美觀。

穿過廚房，會到達一個Hello Kitty鏡面區，設計恍如迷你版TeamLab，上下左右前前後後都係鏡面牆。呢一區就係中期前往嘅好處，唔需要擔心週邊都係人群，因為整個空間只可以容納一個人，一有第二個人就會於鏡而反映出嚟，而且地下鏡面好容易令女生走光，即使著長裙都可以走光。鏡面空間內有大量Hello Kitty標誌蝴蝶結，但就無Hello Kitty公仔。

經過鏡面空間，後面就係一個Hello Kitty音樂區，週邊有唔少音符，有Hello Kitty之餘亦有佢嘅男朋友Dear Daniel同妹妹Mimi。中間通道地面以鋼琴鍵設計，盡頭就呼應返一開始嘅Hello Kitty隧道。當日「菲律賓賭王」話無琴鍵聲，但現時有人穿越時行過琴鍵係會有琴鍵聲音發出，只不過並唔係同該琴鍵嘅正確發音。

然後就輪到泰國版Hello Kitty區啦！呢間黑房正中央擺放咗一隻穿上泰服嘅Hello Kitty雕塑像，前面寫有Hello Kitty in Bangkok。而泰版Hello Kitty背後就係一系列投影，隔幾秒就會轉變，背景全為泰國知名景點或景象，泰國版Hello Kitty絕對係打卡必到，呢隻設計明明最靚，點解無呢隻Hello Kitty迷你公仔售賣？

探訪完泰國版Hello Kitty，接著又返返去日本版Hello Kitty，整個空間都係日本風，櫻花、小橋、燈籠等都似京都風。一隅更有一隻茶道風格嘅Hello Kitty雕塑像，可以同佢一齊扮玩茶道。穿過櫻花大門，可以前往Hello Kitty睡房，呢一區係咁多區入面比較遜色，以紙板為主，連公仔都係紙板，只係得少數道具係呈立體狀。

最後一區就係Hello Kitty滑梯區，牆上會投射出50年來嘅Hello Kitty代表公仔，由1974年出世起到2024年都有，可以搵返屬於自己年份嘅Hello Kitty代表喔！繼續前行就有一條迷你滑梯，要先除鞋再徒步樓梯至頂端，然後瀡落嚟，雖然唔係好長，但都幾跣！滑梯頂端可以望到下方嘅巨型Hello Kitty扭蛋機，呢個扭蛋機熟口熟面，好似之前台灣站有見過！而臨近出口處，就會見到一面實體Hello Kitty年份角色牆，呢次唔係投影，而係實體版本，亦可以搵返自己嘅年份打卡呢！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭曼谷BTS淺綠線至「Siam站」或「Chit Lom站」，沿天橋行王到Central World，上行至6樓再上行至7樓可以抵達。

❷ 雖然之前有分slot，每1小時1個slot，但現時人流無咁多，基本上隨時都入得，所以已經唔需要上網預訂門票，去到櫃檯先買就得。

❸ 展覽限定Sanrio Gift Gate唔需要門票都可以前往，但商品數量其實唔多，亦無乜特別。

❹ 送嗰張優惠券每人有20泰銖，但只限飲品區使用，限定Sanrio Gift Gate係唔可以使用，而飲品區只有Sanrio家族公仔，所以自問係Hello Kitty迷基本上係無乜用。