香港機場禁區美食廣場僅存2間小店！上機前歎米芝蓮級阿元來了／兩姊妹涼皮！即睇正確位置＋營業時間

今年電影《九龍城寨之圍城》風靡唔少港人，最近香港機場都特設一個香港電影展覽。以前城寨處於舊機場旁邊，而家將城寨搬到新機場﹐認真奇妙！去旅行搭飛機前，除咗睇展覽，唔少得係搵吓上機前有咩食，機場禁區選擇雖然不少，但現時小店只係剩返2間，同樣都係《米芝蓮》水平嘅小店。一間近閘口，另一間則位於偌大窗戶旁邊嘅美食廣場，即刻睇吓呢2間小店嘅正確位置同營業時間啦！

座落接機大堂A區嘅《九龍城寨之圍城》機場展覽，位置為登機大堂G閘樓下，展覽係電影場景，由即日起開放至2024年11月20日，喜愛呢套劇嘅朋友相信都會去朝聖㗎啦！展覽離遠睇殘殘舊舊，高約6.5米，為一座雙層建築物，只係電影其中一個場景，佔地極小。展覽由政府同電影班底協作，主要係sell「走進香港，走進香港電影」。懷舊場景包括電影內嘅士多、理髮店、水井、茶檔、閣樓等，以及「九龍城寨」霓虹燈牌，連電影內嘅錯綜複雜嘅後巷、混亂嘅電線都呈現出嚟，1：1還原電影場景。最奇妙嘅地方係以前九龍城寨係座落舊啟德機場旁邊，而現時偽九龍城寨電影場景係座落於赤臘角機場入面，同樣都係飛機喺九龍城寨頭頂飛過。

於櫃檯check in後，就要預早時間進入禁區範圍；踏入禁區後，可以找尋香港機場禁區餐廳，其實機場都有小店餐廳推介，連《米芝蓮指南》星級之選都有。現時，機場禁區有好幾間小店已經結業，但同時有2間小店接住進駐，亦係禁區內剩低嘅2間，所以大家唔需要捱飛機餐，可以舒舒服服食飽飽先上機！

香港機場禁區餐廳（1）﹕阿元來了

「阿元來了」於堅尼地城、觀塘皆有分店，機場店就位於禁區內，一直以來都係主打台灣小吃，比如係魯肉飯、鹽酥雞、麵線、蛋餅等，而西環堅尼地城店更一早獲得《米芝蓮指南》必比登星級推介餐廳。而機場店地方有限，空間就似pop up store嘅size，櫃檯空間佔一半，亦無堂食空間，基本上只提供外賣，可以等上機前喺登機閘口附近用餐。

「阿元來了」早於2020年已登陸香港國際機場，於機場禁區開設其第3間分店，目前，「阿元來了」機場店更增設台灣紅燒牛肉麵選項，秋冬出外旅行前，亦可以歎碗暖笠笠牛肉麵，由舌頭暖入心。一份便當staff價為$78，而一般人就貴$20，即每份$98，蛋餅就賣$51至$60，比便當平啲，整體都係比西環店係貴少少。即使唔太肚餓，都可以去買杯台式珍奶飲吓呢！

香港機場禁區餐廳（2）﹕兩姊妹涼皮有限公司

今年8月，「兩姊妹涼皮有限公司」正式登陸香港機場，強勢加入機場小店行列！「兩姊妹涼皮有限公司」同「阿元來了」唔一樣，並非處於閘口旁邊，反而係座落「食東西美食廣場」內，靠近離境層西大堂，搭列車過去會比較方便。該店同樣一早獲得《米芝蓮指南》必比登星級推介，目前更成為機場「飛嘗美饌」企劃之一！

「食東西美食廣場」地方不小，更有偌大玻璃窗正對停機坪，亦可以算係香港機場觀景台之一。「兩姊妹涼皮有限公司」於元朗、中環、旺角皆有分店，今次機場禁區店就同樣有招牌涼皮可擇，更有機場限定配搭，比如係麻辣鮮香嘅「世一涼皮」，會有鹹香豬五花搭配木耳、青瓜絲、溏心蛋、秘製醬汁。另外，較特別嘅菜式亦有辛香刺激嘅椒麻雞配白飯、極品擔擔撈麵配嗆辣蓮藕丁，飲品則有清爽青瓜薄荷汁、黑糖桂花冰粉蜜，都係市區分店唔見嘅選項。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 阿元來了付款方式接受Visa、Master、現金、八達通、Apple Pay、Google Pay；而兩姊妹涼皮有限公司付款方式只接受現金。

❷ 阿元來了機場店位於出境大樓近28號閘口，而兩姊妹涼皮有限公司就位處禁區6樓「食東西美食廣場」內，近40至80號登機閘口，需要搭列車前往。

❸ 留意2間小店營業時間並非24小時。

❹ 兩姊妹涼皮有限公司位於食東西美食廣場內，需要向Tap+Brew店員落單購買。