九龍西廢棄炮台隱藏尖沙嘴九龍公園！改建歷奇樂園遊樂場變小型城堡／瞭望台

講到香港景點，身為香港人已經去到無意欲再提；所謂情侶拍拖兩個人嘅香港好去處，已經被網絡平台講到「爛」。個「爛」係歧義，一係指講得太多，令景點變成係人都知，唔再新奇有趣；二都係講得太多，但就引咗太多人去，令景點真係變得殘舊。「九龍公園」都算係講到「爛」嘅知名香港景點之一，最近更有博物館展出全新嘅「恐龍化石」，推動「恐龍經濟」！而事實上，公園內重有一個真真正正隱藏嘅歷史痕跡，只不過炮台堡壘一早變成遊樂場！

最近，座落於「九龍公園」內嘅「香港文物探知館」引起關注，皆因有一嚿於香港赤洲被發現嘅恐龍化石被擺放於展館內，全公眾自由進入參觀。今次係香港首次自行發現一塊恐龍化石，該恐龍化石於近日先被發現於香港地質公園新界東北沉積岩園區內赤洲島上。

據資料顯示，該被發現嘅恐龍化石被鑑定為恐龍骨骼化石，有權威人士估計為白堊紀時期嘅大型恐龍，即係大概係1億4,500萬年前至6,600萬年前嘅時間線。由於被發現恐龍化石嘅地方係赤洲，所以船灣郊野公園擴建部份內嘅赤洲島都係暫時被封閉，直到另行通知。梗係要啦，要發展恐龍經濟就需要時間呢！

呢嚿恐龍化石，聽講同真實睇就好似「理想與現實」嘅情況一樣，以為真係有嚿恐龍化石，點知原來只係一嚿平時會行山行過嘅石頭。如果唔睇介紹，同埋劃線位置，其實真係行過都完全唔會留意到，因為同地質公園平時嘅地面無異。

「九龍公園」本身其實已經係一個歷史地帶，皆因園內係有軍營同炮台堡壘，只不過小山丘已經改建成遊樂場，而且位置較為隱蔽，未必人人都發現得到。

事實上，「九龍西二號炮台」就座落於「九龍公園」內，係一座極唔起眼嘅古蹟。目前，炮台已改建為「歷奇樂園」，即係適合兒童遊玩嘅遊樂場，但就無遊樂設施。「九龍西二號炮台」位於百鳥苑附近，向上走就依指示牌就會見到。

「九龍西二號炮台」曾經係戰略基地，又叫做「官涌炮台」，但現時只係尖沙嘴「九龍公園」內嘅一個廢棄炮台，連介紹牌都細小得難以被人發現。早於1997年，幸好「九龍西二號炮台」已被古物古蹟辦事處列為一級歷史建築。

進入「歷奇樂園」後，映入眼簾嘅係一座猶如城堡嘅建築物，呢座係人造嘅。雖然向內窺視係能夠見到城堡內有條樓梯，但現時就唔開放公眾進入，前後兩個入口亦都被封鎖。城堡上大概可以居高臨下俯視下方人群，而城堡內又有條旋轉樓梯；如果一直能夠好好利用，呢個地方根本就係一個製造出嚟而幾成功嘅打卡位。

至於呢座「九龍西二號炮台」，其實係同英國人佔領維多利亞港有關，關於炮台有兩個講法，一係於1865年建成，二係於1880年建成。炮台有3座巨型大炮，最初有前膛炮、後膛炮，後來變成速射炮。炮台由三合土興建，有三個炮位，本身重有火藥庫、機械室同指揮站，但唔係改建咗就唔開放公眾進入。於1916年起，由於炮台設施不足，逐漸被廢棄。直到1989年，有關當局於擴建「九龍公園」時，將炮台位置改建為遊樂場。

其實「九龍西二號炮台」本身都可以叫做「西九龍炮台」，走過幾座炮台後，背後現時依然設有一座瞭望台，可以望海邊方向維港景色。如果放煙花或放無人機嘅時候，相信呢個位置都可以觀賞得到，而人流亦未必會太多，所以有機會都係睇煙花賞景勝地。

除咗英軍炮台，附近其實重有軍營，只係並唔開放公眾進入，一座係「九龍公園58座軍營」，係威菲路軍營一部份，建於1890年代，同樣係一級歷史建築物。至於隔離另一座「九龍公園S4座軍營」，則已經被「食物環境衛生署」用作展覽用途。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 公園並非全天候開放。

❷ 遊樂場旁邊設有小型瞭望台，可睇煙花。

❸ 該炮台位置靠近百鳥苑。

❹ 遊樂場一帶有好多隻貓，似乎有人定期餵食，但無人領養。

❺ 乘搭巴士路線九巴﹕1, 1A, 2, 6, 7, 9, 13X, 26, 35A, 41A, 81C, 87D, 98D, 98P, 117R, 208, 219X, 224X, 234X, 259B,260X, 268B, 269B, 281A, 296D, N216, N241, N271, N281,N213, N283, N287, N41X, 213X, 270A, 270S, 271均可到達九龍公園。而城巴: A21, N21, N21A, 973, 117R, N796亦可抵達。

❻

❼