【澳門美食】巷弄間藏米芝蓮必比登推介六記粥麵水蟹粥／米通鯪魚球／炸雲吞／蝦籽麵

香港有《米芝蓮指南》必比登推介，其實澳門一樣有《米芝蓮指南》必比登推介，都係平價《米芝蓮》街頭小吃，其中水蟹粥就係以往情侶拍拖兩個人去澳門必食嘅選擇，到底現時水平如何呢？呢間「六記粥麵」既然被列入《米芝蓮》星級之選，應該唔會伏啩？

「六記粥麵」毗連「泉利碼頭」，靠近海邊，位置近澳門西北面，距離「沙梨頭圖書館」不遠。如果從澳門十六浦索菲特酒店」徒步而至，大概就需要6至7分鐘時間。該店於1945年沙梨頭一帶開業，60年代再遷至現時地舖，屹今有79年，歷史悠久。呢間食店終由2011年至2024年獲得《澳門米芝蓮指南》必比登推介，都算係星級街頭小吃。

「六記粥麵」最出名嘅係水蟹粥、蝦籽撈麵、炸鴛鴦、滷水鳳爪，香港嘅鴛鴦係咖啡溝奶茶，而澳門呢間食肆所謂嘅鴛鴦，即係炸雲吞、米通鯪魚球，都係受澳門人歡迎之作。據悉，該店有60幾間菜式，所以就直接叫做「六記」。

招牌蝦籽撈麵MOP65 採用傳統竹昇麵，一間大排檔好唔好就要睇炒嘢夠唔夠鑊氣。今次就揀乾炒魷魚麵MOP68，麵條的確係傳統製作竹昇麵，夠晒彈牙，而且係有韌度，不過最大問題係炒麵有無控制時間。呢碟炒麵食唔到蛋味，因為燶味四溢，完全係炒燶嘅味道，而且醬油好鹹，除此之外，已經食唔到魷魚同麵條有咩味。

水蟹粥一碗MOP128，有一隻蟹同一倍粥底；水蟹粥細窩MOP280，有兩隻蟹同三倍粥底；水蟹粥大窩MOP550，有4隻蟹同6倍粥底。今次先試細窩水蟹粥，一窩基本上有大概6至8碗粥，兩個人每人就食到3至4碗，份量充足，而且係食到飽。蟹肉新鮮，入口鮮甜，起碼唔會變霉肉。不過，蟹鉗並無扑開，所以食嘅時候比較困難，食食吓直接放棄算數。粥底既有充足份量﹐同時亦保持軟綿，而且水蟹味均勻滲入粥底內，有蟹黃鮮味。粥底入口錦密之餘，亦有蟹香，而且似有用豬骨定雞骨熬煮粥底，鮮甜可口。

睇店內嘅介紹，原來米通魚球先至係「六記粥麵」數一數二嘅小食，首創米通鯪魚球﹐MOP95 有一份，MOP55 得半份，跟蜆蚧醬。將鯪魚球炸成金黃色，營造外脆內軟口感，肉質彈牙，大小似乒乓波，表皮同時黏滿脆口米通，唔少當地人都會排隊購買！

而「鴛鴦」嘅另一半，就係懷舊錦鹵炸雲吞MOP95，一份跟錦鹵汁。上檯一刻令人意外，因為份量頗多，而且炸成極大隻，大概有7至8隻，每一隻size相近。雲吞包裹成三角形至四角形，中間餡料有蝦肉同蝦米，但就比較細小，表皮較大塊。雲吞皮又厚又大塊，有蛋香味，但有少少鹼水味。雲吞皮可以點好多次酸酸甜甜嘅錦鹵汁，只係比較膩，食多幾塊就覺得好滯，如果有小份選擇就更好，香港已經好少可以食到。