【高雄景點】西子灣出發30分鐘搭車直達柴山漁港！海景階梯打卡、3間臨海咖啡店賞小漁港！

提到高雄景點，唔少人第一時間都會諗到旗津島，的確「旗津島」係高雄知名小島，但旗津到附近其實重有一個秘境小漁港！今次E.A.Two就從西子灣出發，前往呢個「柴山漁港」，唔單止有一道海景階梯可以打卡，更有多間餐廳，臨海咖啡店都有不下3間，即刻拍拖兩個人去逛逛啦！

從「西子灣」出發，唔單止可以前往知名景點「駁二藝術特區」、「棧貳庫KW2」，或者到「鼓山渡輪站」轉往「旗津島」，其實亦可以轉乘公車至一個秘境小漁港—「柴山漁港」。

該漁港位置鄰近「國立中山大學」，所以據柴山漁港嘅在地人所講，附近咖啡店都有唔少在地學生前往，其中一間咖啡店老闆娘更指平常人流極多。只不過我哋前往當日落大雨，先至無乜人，好彩當日到達之後停雨，令我哋睇到柴山漁港海天一色嘅海岸風景。

經高雄公車從「西子灣」能直達「柴山漁港」，比徒步安全得多，唔需要怕沿途會遇上馬騮。公車落車位置為「山海宮站」，下車後會見到有分岔路口，公車會繼續向上行，但如果只係想去海邊咖啡店，只需要下行就得。一直向下走，會見到一個停車場，該停車場係屬「山海宮」範圍，係收費停車場。而停車場旁邊就係廟宇，廟宇對出又可以觀賞海景。

依停車場附近斜路走，最先映入眼簾嘅咖啡店係「瑪莎咖啡柴山館MaseCafè」，再繼續向下行，中間會先見到有間「白色戀人文創咖啡館 WhiteLover Cafe」，再繼續走會到達「海韻戀歌 Ocean Love Song」。

所謂嘅海邊階梯，其實就係指通往「白色戀人文創咖啡館」嘅樓梯，而該樓梯亦可以直接抵達最底漁港海旁處。從上而下拍攝，將階梯同海天一色嘅畫面捕捉，左右更有綠植延伸出嚟，恍如環繞呢道階梯。

「柴山漁港」嘅咖啡館數量不少，今次E.A.Two就僅能選擇其中一間，就揀上階梯旁邊嘅「白色戀人文創咖啡館」。該咖啡館基本上都係以藍白色為主調，恍如希臘風格，加上前臨對藍色大海，藍白色小屋亦令人療癒！咖啡店基本上只設室內雅座，包括樓上有小窗口嘅座位，同埋樓下更靠近海邊嘅臨海座位，但全部都有瓦遮頭，既可防雨，亦可防曬，方便客人坐低chill一chill。

即使只係坐樓上空間，小窗口已經可以望向波光粼粼嘅「柴山漁港」，以及海天一色風景，退潮時甚至會露出一片小沙灘。小漁港環境靜謐，感覺純樸舒適，而當時因為事前落大雨，並無其他客人，所以置身其中異常悠閒，吹吹海風，飲吓咖啡，絕對令人放空。

店內就只有簡單飲料、小吃，比如係咖啡、冰淇淋、冰沙、紅茶，亦有少量炸物可以選擇。當日就選擇一杯愛文芒果冰沙TWD200、焦糖瑪奇朵TWD180，老闆娘好熱情交談，更附送一小包咖啡小餅乾零食呢！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭高雄捷運橙線至「舊西子灣站」，即「哈瑪星站」，轉乘公車99號，直達「山海宮站」。當日前往「輕軌駁二蓬萊站(高雄港)站」，可以見到「高雄港」牌樓，亦可見到「全聯超市」。留意公車時間表，因為佢嘅時間表係固定，而且部份時間會較疏落，一定要指定時間前往站頭等車！

❷ 自駕停路邊唔太方便，最好前往山海宮收費停車場，導航為「柴山停車場」或「山海宮」，收費為TWD25／15分鐘。

❸ 從西子灣徒步30至45分鐘可達柴山漁港，不過沿途有唔少馬騮，唔太安全，所以最好都係搭車去。

❹ 從「山海宮」下行至海邊打卡位同幾間咖啡廳，需要下行極斜斜路，所以要小心安全。