馬灣東灣沙灘樓上最強寵物友善Cafe！太陽系委員會自製獨家可樂、花雕蟹crossover意粉

講到馬灣餐廳小店，有留意E.A.Two嘅讀者都知道已經報告得九九十十，原來當中重有一間小店位於馬灣東灣沙灘一帶，正對青馬大橋景，可以拍拖兩個人chill吓！呢間小店係一間寵物友善Cafe，唔單止有狗店長，而且唔少客人都會攜狗同行。E.A.Two遲遲唔去梗有原因啦，對於怕動物嘅Miss A嚟講，真係好怯場，如果隔離無Mr E擋一擋，完全唔敢自己一個人入去試吓，今次總算K.O.馬灣小店指南！雖然因為呢個原因好難再去第二次，但我哋都可以話畀大家知呢間都係一間能夠前往嘅小店，可以做到嘅就係咁多……

位於馬灣知名東灣沙灘樓上嘅「太陽系委員會／SOL Committee」，無論中文名定英文名，都完全聯想唔到係一間餐廳，恍如一間工作室或私人地方。不過，原來呢間小店係馬灣居民常到嘅餐廳，而且係一間寵物友善Cafe，經常吸引一埋狗主攜狗前往。值得一提，該店唔單止歡迎受狗之人放養狗隻，店內更有一隻純白狗店長，怕動物嘅編輯完全唔會研究，所以唔知咩品種。不過，留意到小狗似乎係受過店主訓練，所以乖巧聽話，相對其他狗主嘅狗隻係比較溫馴。

從巴士落車之後，徒步只需1至2分鐘，即達馬灣東灣海灘。不過，去餐廳唔需要經沙灘，只要向樓梯上行，自然可以抵達淨返嘅呢間馬灣小店。午市期間，該店從外到內都滿佈狗主同狗隻，恍惚動物嘉年華一樣，就似馬灣一間最強寵物友善Cafe！而大概午市之後，一眾狗主與狗隻就自然散場，只係淨返少數依然留低坐吓。

「太陽系委員會」臨近海旁，既係海邊咖啡店，亦係寵物友善咖啡店，如果坐出面，可以正對東灣泳灘，以及青馬大橋景。而室內竟然設有一部久違嘅街機，而且店主係任客人隨便玩，實在難得！

該店菜式唔算太多，包括有sourdough、沙律、小食，其實大部份都無乜特別之處，比較特別嘅係以餐廳名「太陽系」命名嘅太陽系燒雞鎚配熱情果醬$78，似乎係一款招牌菜式？至於主菜，選擇同樣唔多，當中有油醋八爪魚南瓜意大利飯$148、窩蛋牛肋條意大利飯$128、明太子扁意粉$138、黑皮雞椒菇燉飯$138、花雕蟹意粉$138、大蝦蕃茄羅勒意粉$138，基本上每款最低都係$128起，好彩無加一。

明太子扁意粉同一般香港西式Cafe差唔多，材料簡單，炒兩炒基本上就可以上碟，無乜太大驚喜，明太子微甜，帶有極微辛辣感，醬汁唔會太膩，不過不失。而花雕蟹意粉相對就係成個menu較特別嘅菜式，花雕蟹係一種中式菜式，而意粉就係西式菜式，雖然所謂花雕蟹只係3隻蟹鉗，意粉再混合松葉蟹肉、忌廉之類，但味道上兩者融合有意想不到效果，反正加上花雕酒通常都係不敗之作。

既然係一間咖啡店，咖啡應該唔少得，週末假期餐點並無套餐，所以飲品只可以單點，隨手點一杯Latte$42﹐白咖啡奶味比咖啡重，大概三份二係奶，三份一係啡。店內雪櫃亦有唔少手工啤酒可以選擇，不過有一款叫特飲幾特別，引起好奇心。來自「閣樓釀造」製作嘅「馬灣可樂」，係太陽系自製可樂，堂食$48，但外賣只係$25！另外，重有肥美咖啡$58、茉莉抹茶可樂$58、馬灣雪糕可樂$68、柑檸大力水$24可以選擇。呢款「馬灣可樂」同平時飲到嘅「可口可樂」口味唔一樣，相對係比較清新，有青檸、檸檬、橙汁、肉桂、香草味，好似有少少酒香味，亦有啲似細個食嗰種帶酸味嘅砂糖可樂糖。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式只限現金、八達通、PayMe，雖然用QR Code落單，但客人必須於櫃檯付款先會確認已落單。週末假期無套餐無優惠，星期一至五先有套餐優惠，主食、麵包或沙律都可以免費加一杯黑咖啡，$60可以free flow batch brew coffee，多過$60就保差額，同日點第2杯嘢飲都有半價優惠。

❷ 該店位置訊號比較弱，所以可能需要連接店內Wi-Fi先上到網。內有酒精飲品，亦有素食可擇。

❸ 最簡單係乘搭馬灣全新巴士路線230R，從南昌邨V Walk對出上車，一個站就落得車，車程唔使半小時，車費亦只係十個幾毫，落車後徒步1至2分鐘即達。從港島前往就可以於中環2號碼頭出發，乘搭渡輪往珀麗灣碼頭，徒步5分鐘即達東灣沙灘，小店就喺沙灘樓上。

❹ 該店係寵物友善餐廳，店主都有狗店長，所以係狗主social嘅地方，反正好多香港人養狗都係用狗嚟同人social。

EATWO

Miss A

【區區有小店2025】赤柱2間尚存本土餐廳美食！碎牛菠蘿包／限時港式西餐／咖央西多

兩個人旅吓行

專題

E.A.Tips :

太陽系委員會 SOL Committee