原店深水埗！越南菜第一郡搬油麻地大舖設週末限定菜式！蕃茄蟹膏湯檬酸甜開胃！

雖然近年香港結業潮湧現，但依然有少部份小店憑人氣菜式擴充營業。香港各區都有唔少東南亞菜餐廳，有一間近一年從深水埗細舖搬到油麻地大舖，由越南家庭經營，菜式地道，其中蕃茄蟹膏湯檬更加係人氣之選，週末亦有適合拍拖兩個人試試嘅開胃菜式！

「第一郡」係越南胡志明市內嘅一個郡，座落於市中心位置，週邊滿佈摩天大廈。以「第一郡Q1」命名嘅越南菜餐廳，原先位處深水埗，本身舖頭細細，但目前已經遷移至油麻地大舖，更選址舊「泰Cool」分店樓上，繼續由幾年前來港定居嘅越南華僑家庭經營。

該店現時地方偌大，面積同舊「泰Cool」店相近，一端同樣設有偌大玻璃場，外望彌敦道。店內以QR code落單，餐牌內顯示多走地道越南菜式，包括蟹檬、撈檬、法包，亦有春捲、湯河等。例如係越南香茅雞翼$38、米紙蝦卷2條$55，米紙蝦卷內有檬粉、蝦、豬肉、芫荽、生菜、自家醬／魚露，賣相青青綠綠，以綠色米紙包裹住。

店內唔單止有越式法包$60，包含腩肉、札肉、肉鬆、酸菜、青瓜、芫荽、蔥、肝醬，亦有越式軟包$52，內餡幾乎一式一樣。剛巧假期有一款週末精選，當日為蔬菜燉牛腩跟法包$75，菜式內有牛腩、紅蘿蔔、薯仔、芫荽、法包。上檯時一端放有法包，另一端就有一碗醬汁，醬汁佐越式法包配合得幾好，法包表皮香脆，但內裏就好鬆軟。醬汁以燉煮方式炮製，入口酸甜開胃，內有一件件牛腩，嚿嚿都軟腍又幾少可，而紅蘿蔔、薯仔則為點睛之筆。

講到人氣菜式，必然係蟹膏蕃茄湯檬$70，包含蟹膏餅、蕃茄、札肉、豬紅、芫荽、芽菜、生菜、檬粉，檬粉狀似米粉，只係比較順滑。而另一款為順化牛腱米線$85，包含牛腱、牛筋、札肉、芫荽、洋蔥、米線，偏偏越南菜最出名嘅pho越式湯河就不見蹤影。蟹膏蕃茄湯檬配料不少，檬粉頂端有一大片蟹膏餅，鹹香味十足，有少量鮮蟹香味，其實係來自於蟹肉、蟹膏嘅蛋餅。蕃茄湯底真係技巧之作，入口似有加入豬骨湯，結合蕃茄湯酸甜開胃，夏天品嚐應該會更醒神！

除咗主食，都有其他越式甜品可擇，不過就睇落無乜特別吸引力。比較特別嘅係包含綠豆湯圓、椰汁、薑汁、芝麻嘅越南湯圓$28，譯音為che ba ba $28嘅甜品，包含蕃薯、木耳、芋頭、斑蘭清心、紅祖、海帶、椰汁。今次選擇咗芒果糯米卷$38，但上檯後恍然大悟，大片芒果肉版糯米椰絲皮包裹，咪即係芒果糯米糍！至於隔離檯靚姐就食緊斑蘭糕$15，閒聊時稱斑蘭糕有好重斑蘭味，煙煙韌韌口感不錯呢！