【高雄夜市】近巨蛋商圈、左營站！在地瑞豐夜市打卡七彩炒酸奶／天然美顏飲／百花釀油條

「六合夜市」係以往最多遊客前往嘅高雄夜市，而「瑞豐夜市」就係近年開始有觀光客前往嘅在地夜市，該夜市亦算高雄規模較大、知名度較高嘅夜市，但就唔係每日營業，想要拍拖兩個人前往「瑞豐夜市」，記得留意營業時間，即刻睇吓呢個夜市有咩好食啦！

「瑞豐夜市」目前雖然係台灣高雄一個知名夜市，但最初其實只有4個店家於鼓山區瑞豐街起家，最早於80年代營業。後來瑞豐街逐漸愈來愈多店家，所以亦形成「瑞豐夜市」。而目前嘅「瑞豐夜市」，主要範圍並非位處瑞豐街，反而係裕誠路、東門路、南屏路一帶，距離瑞豐街約有8分鐘步程。現時，夜市毗鄰「高雄巨蛋高圈」、「漢神巨蛋購物商場」，皆因早年因交通同地主等問題而需要將店家遷移，中段曾搬到華夏路、慶豐街一帶。

該夜市並非每日營業，其中星期一及三都係休息，所以要去高雄「瑞豐夜市」嘅朋友要留意避免呢兩日前往，以免白行一趟！而多數店家都係傍晚時份先會開始營業，所以都係正常夜市時間前往就ok啦。

高雄「瑞豐夜市」目前規模不少，特色小吃亦眾多，多條巷弄交叉堆疊，人潮能從四方八面進出。夜市內，部份路段頗為狹窄，人流較多時的確有啲逼，但好處係無車輛或機車穿梭其中，路面就較「吉林街夜市」為安全，適合邊走邊吃。

其中，比較聞名嘅係近門口嘅「天使雞排」，每塊賣TWD100，由於曾經於其他夜市食過，所以當日就無喺「瑞豐夜市」食，但該店依然不時大排長龍。另外﹐亦有「酥炸大魷魚」、「文鮮奶麻糬」、「曾氏福建炒麵」、「凍心炸冰淇淋」、「阿椪的店」、「薯小二」、「木瓜牛乳大王」等。其中，「阿草伯烤大蝦」烤蝦一份TWD150，烤生蠔TWD100有9隻；「糕品味鮮奶雞蛋糕」更有卡通人物為雞蛋仔造型，一件TWD40；「萬國牛排」一片厚切牛排只賣TWD190；而「阿嬤ㄟ麻油雞飯」一碗麻油雞飯或麻油雞湯每碗均為TWD120。

「油吃鬼百花釀油條」頗有驚喜，一份賣TWD70至100，可以自選兩款醬料口味，包括椒鹽、煉乳、千島、泰醬、番茄醬、自製蒜蓉醬，我哋覺得比較特別嘅只係蒜蓉醬。等候期間，旁邊嘅「全佑甘草芭」請我哋食芭樂，芭樂入口清新，有古早味天然感，原來該店由1956年已經營業，都算係老店。百花釀油條其實就好似油炸鬼一樣，但比油炸鬼更脆卜卜，內裏反而唔係軟淋淋感覺，就好似炸麵包或炸薯片咁，蒜蓉醬呈啡色，蒜味好配合油條。

夜市內有幾間臭豆腐店，例如係「彭氏臭豆腐」、「石記臭豆腐」、「麻辣鴨血臭豆腐」，今次就前往頗多人流嘅「吳家臭豆腐」，背後有座位，可以坐低品嚐臭豆腐。不過，臭豆腐等候時間頗長，等足15分鐘。一盒臭豆腐賣TWD100，內有7件；而一盒TWD80就有5件臭豆腐。臭豆腐旁邊有醃製泡菜，帶有酸甜味；而臭豆腐非常乾身，炸成一磚磚，色澤比金黃色淡少少，入口外脆內嫩，清爽又唔油膩。

逛夜市期間，無意中發現一間叫「品天然」嘅手搖飲料店，該店甚至寫明係專賣美顏系飲料，無糖又無卡路里，以天然材料製茶飲，令手搖飲帶有天然甜味，每杯最平賣TWD35，大多數都係維持於TWD50左右。

最後係另一間編輯無意中發現嘅甜點店，亦係一間係港女打卡必備嘅「甘丹厚切炒酸奶」！有中份或大份任揀，價格為TWD80至100，可以選擇6款式9款唔同口味。厚切炒鮮奶造型趣緻，皆為四四方方，但顏色鮮艷。雖然海報中有一件係以麻雀九筒設計，但現場就搵唔到呢款厚切炒鮮奶，有啲失望！不過，當日都有12款口味可以選擇，包括有太妃牛奶糖、Tiramisu、焦糖塩之花、Oreo冰炫風、洛神花果茶、蜂蜜荔枝蘋果、百香奇異果、雲朵可爾必思、鳳梨熱帶水果、木瓜奶昔、藍莓優格、桂花檸檬。