【澳門路線】設免費穿梭巴？路環媽祖文代村全瀝青路一星路線、媽祖聖像俯竹灣海灘！

澳門雖然地方不大，但其實都有唔少行山路線，有好多都係一星簡單路線，適合拍拖兩個人去散吓步。今次E.A.Two前往路環一條比較近路氹城嘅一條路線，全程都係瀝青路，亦有幾條延伸山路，山頂更可以俯瞰竹灣海灘！如果行都唔想行嘅話，甚至可以乘搭免費穿梭巴直達！

於澳門半島或路氹城前往，一程巴士就可以抵達石排灣馬路，落車位置毗鄰「石排灣郊野公園」，只要走向公園入口反方向，就會見到「澳門媽祖文化村石牌坊」，牌坊路口就係山路入口。

穿過牌坊，上行路環高頂馬路，一直上行就可以上行至山頂。該路線全程都係瀝青路，只不過同時係馬路，要小心車輛。上行山路之後，中途有好多分岔路口，如果有興趣可以同時前往，第一個分岔路就係「陸軍路」，該小路為山路，可以下行至路環市區荔枝碗方向。不過，如果淨係想上山頂媽祖文化村，則只需要沿馬路走就得。

路環高頂馬路中途既有「路環步行徑」、「路環健康徑」、「路環疊石塘山」，中途有「香徑藥谷生態園區及南藥園」，多數山路都係繞圈而走，所以適合想行山又唔想太辛苦嘅朋友。

當上行至「路環高頂馬路」最後一個分岔路口，唔單止會見到一個大型停車場，右謗亦可以前往「疊石塘山」同眺望台，而向左邊走就可以前往「媽祖文代村」。

「媽祖文化村」其實就係設有「澳門天后廟」、「媽祖聖像」嘅小山，頂端天后廟設計就似一個宮殿，殿內有各式擺設，旁邊有個「寶鼎廣場」，上面只係得一個大鼎，據知有7000公斤重，但週邊基本上無嘢睇，亦都頗難行走，所以唔需要浪費時間上行。而天后廟對面就有一個「路環山頂公園」，但該公園並無風景可言，週邊完全被樹木遮擋。

頂端「媽祖文化村」位置其實就係「澳門天后廟」，呢座佛寺建築物依山而建，於2000年代先建成，多年來有唔少大型祭祀活動。該廟就似宮殿建築設計，以閩南風格建造，有中式工藝特色，設有梳妝樓、仿古樓閣、雕樑畫棟等，入面不外乎大殿、祭壇、山門、南北廊等，都算亭台樓閣。天后廟大門口頗高，需要走長樓梯先可以抵達廟內。廟內左右兩側有「鼓樓」、「鐘樓」，可以居高臨下賞景，景觀同樓梯頂回望基本上一致，可以俯視山下景色！

除咗中式宮殿之後，頂端巨型雕像「媽祖聖像」就係「媽祖文化村」嘅重要地標。從天后廟上行，徒步約220米就可以直達「媽祖聖像」。該聖像相當巨大，為漢白玉媽祖雕像，臉部係來自一整塊漢白玉雕刻而成。而「媽祖聖像」週邊則可以居高臨下賞景，其中一端能夠下瞰路環竹灣海灘，山頂亦算觀望澳門海邊嘅絕佳視角！

「媽祖文化村」設有免費接駁車，穿梭巴士可以直達天后廟，該接駁車大概每半小時先有一班次，不過要留意最後一班次雖然寫17:30，但實際上呢個時間並非最後一班車，而係折返停車場嘅時間。就算寫明17:30係最後一班車，但司機話已經無車，唔會再開車，對方都直接落車離開。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線15、21A、25、26、26A、50、N3，於「石排灣郊野公園」落車就會到達「澳門媽祖文化村石牌坊」。

❷ 落車之後依馬路行，30分鐘步程就會上到山頂。

❸ 上山時要留意中途同時有車輛行走，最好行外圈，唔好行內圈，車輛會比較容易見到沿途嘅行人。

❹ 「路環山頂公園」有公廁，而「媽祖聖像」位置則為車輛唔可以到達嘅地方，所以如果搭車就要喺「媽祖文化村」落車，然後徒步上去。