燒味只限XX？社企餐廳嗎哪膳工大角嘴開分店！下午茶／午餐／每日客飯最平$38！

E.A.Two曾經於太子品嚐「嗎哪膳工」嘅燒味，真係令人難忘，但自從太子店結業後，就未能再食該店嘅燒味。該店分店原先位於觀塘，但就以平價客飯為主，近日於大角嘴開設分店，菜式同模式都同觀塘店無異，都係以健康客飯為主，人均最平僅$38，CP值就夠高，到底重有無燒味食呢？

雖然太子店係叫「嗎哪膳工」，但大角嘴店同觀塘店一樣，雖然都係「嗎哪。 Manna」旗下，但就叫做「嗎哪餐廳」。呢間餐廳係來自於非牟利機構，亦有基督信仰，以扶貧同幫助弱勢社群為主。

近日，「嗎哪。 Manna」於大角嘴開設分店，本來以為有機會有燒味，點知原來只係複製觀塘店餐牌。該店只於朝早營業至中午、下午，並無晚市提供。早餐有皇牌沙嗲牛肉麵餐$42、pancake餐$32至$36，兒童餐$58有豬柳蛋pancake、牛油粟米、車厘茄、沙律菜、唐揚雞2件、啫喱杯。

店內每日都有客飯$38，客飯連有例湯，除咗星期一休息，其集日子每日都有4款可以選擇，例湯每日亦唔一樣。而下午茶同客飯價錢一樣，好多都係$38，可以配飲品，同茶記一樣，熱飲免費，凍飲加$3。選擇有沙嗲牛肉麵、韓式蒜香滷豬手飯、照燒汁鯖魚飯、古早滷肉醬油雞中翼飯、溫泉蛋熱麻醬烏冬等等。今次新店我哋揀咗青蔥醬雞髀卷飯$38、燒頸肉飯配梅子洋蔥汁$38，價錢真係經濟實惠。

下午茶同一般客飯大致上無異，都係純白飯配白烚娃娃菜，只係用日式碗盛載，加上木托盤，感覺似變成日式風格。只係模式上同客飯無異，因為客飯係用大圓碟盛載，而且有例湯，為中式風格。日式風格比較吸睛，係因為該店菜式係以健康、清淡為主，中式風格睇落就有啲似醫院飯。

燒豬頸肉雖然配搭梅子洋蔥汁，但其實自己覺得即使唔配醬汁都已經唔錯，肉質軟腍，表面燒得香口，唔會太油膩。而青蔥醬雞髀就係4件切成圓咕碌雞髀肉，上面鋪滿青綠色蔥油，唔單止令雞肉更香，亦可以利用蔥油撈飯，而蔥油份量又的確剛好撈完一碗下午茶嘅飯量，白飯大概就係一碗飯嘅份量。

大角嘴店同觀塘店一樣有日式定食$48，可以全部自選湯水、小碗、冷盤、主食，湯一樣係例湯，小碗係飯、沙律、意粉等，冷盤係溫泉蛋、日式冷盤小食等，主食就有芝麻青瓜手撕雞、麻辣牛筋、韓式蒜香滷豬手、青蔥醬雞髀卷4件、醬油雞翼、巴東牛腱、紅油燴牛肋條、燒豬頸肉配梅子洋蔥汁、秘製7小時豬軟骨、照燒汁鯖魚，難得係有金牌燒腩仔，都算係該店唯一剩餘嘅燒味選擇！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 早餐供應時間為08:30-11:00，午餐供應時間為11:00-14:30，下午茶供應時間為14:30-17:00，星期三下午茶就只限14:30-15:30，晚市唔會營業。

❷ 該店接受現金付款。

❸ 原分店位於觀塘浸信會內，太子店已經結業。

❹ 目前新店同觀塘店無異，基本上無燒味可擇，最多只係得燒腩仔飯，想要食燒味就要嗌到會，因為燒味師傅喺工場，唔喺舖頭，已經減產。到會係30人起，人均大概係$100。