泰國華僑主理！佐敦泰泰原隻蝦多士／內外兼備蛋包金邊粉／獨特芒果糯米飯

近月，好多人都話泰國旅遊唔安全，傳到旅行都會畀人捉去KK園，想食泰國嘢暫時只能夠喺香港搵。不過，去泰國曼谷只搭公共交通工具，唔call車、唔去遠處、唔夜返、唔貪心，其實拍拖兩個人去邊都還可以。今次E.A.Two前往佐敦一間由泰國華僑主理嘅泰國菜餐廳，唔單止有正常泰菜，更有獨特菜式，甚至素食可以旗擇！

距離尖沙嘴「九龍公園」、「龍堡國際酒店」不遠，既可以搵到「澳洲牛奶公司」，亦可以搵到一間水準不俗嘅泰國菜餐廳「泰泰」，英文為「Thai Thai」。據悉，該店來自於泰國華僑，有逾20年經驗，既選用地道香料，亦炮製地道菜式，同時提供素食以迎合港人口味。

如果喺附近返工嘅朋友，不妨去食午餐，泰式湯粉麵餐$59起，就好似港式車仔麵一樣，可以揀湯底、粉麵、配料。當中，重有2款叫彩虹湯河、遊船河嘅選擇，一碗賣$85。不過，呢款午市套餐只限平日，週末假期就唔提供。店內裝修都有泰國風格，而老闆亦不時坐陣打點，外面有卡位，入面亦有房間可擇。當日為新年假期，有款叫「喜聚套餐」，兩位用人均$248，可以揀前菜、頭盤、主菜、飯麵，配有甜品，亦可追加小食，只不過餐牌啲emoji睇得好辛苦，睇個餐牌都要估估吓。唔同人數可以選擇唔同份量，以二人計算就可揀兩款前菜、一款頭盤、一款主菜、一款飯麵，加錢甜品可轉其他選擇。

以「黃金滿屋」命名嘅泰式拼盤，需要另加$50，內有蝦多士、黃金入球、炸魚餅，雙拼正常價為$78至$143，正常呢set拼盤就係$188。黃金入球其實就好似皮蛋炸蝦餅，只係變成鹹蛋黃，兩款分別係唔同色嘅炸墨魚餅、炸蝦餅。表皮都係麵包槺，入面係鹹蛋黃，中間就係墨魚膠、蝦膠，炸得脆口。比較騎呢唔啱口味嘅係炸魚餅，雖然炸得不俗，表皮同樣以麵包槺包裹，但內餡較奇怪，唔覺得係魚餅，入口腍滑，質感有啲似潺。金黃色蝦多士則為最值得推介嘅小食，既炸得甘香可口，內裏多士內有原隻蝦肉。呢款小食脆皮內都算份量十足，蝦肉與多士完全結合，雖然經過油炸，但蝦肉仍然爽口。

以「滿堂吉慶」命名嘅泰泰串燒，正常價為$98，有豬肉、牛肉、雞肉，各有2串。串燒有燒烤味，唔會太乾身，而且串串都厚肉，旁邊有沙嗲醬汁，入口偏甜同有啲花生香，沙嗲配搭燒烤串燒肉真係好難會唔好食，比較穩陣。而冬蔭功海鮮湯價格為$109至$168，內有青口、魷魚、菇、車厘茄等，就係獨缺大蝦，只係有好細粒嘅蝦肉。冬蔭功整體香料係夠味，但海鮮量同配料較少，唔知係味漏咗放大蝦。

以「鴻運當頭」命名嘅泰泰燒雞，$148至$288，半隻至一隻，燒雞賣相吸睛，雞皮燒得香口惹味，燈光照風之下有啲反光，滲出雞油，表皮入口微脆，陣陣焦香撲鼻，而雞肉亦有肉汁，少少雞油食落亦唔會好肥膩。以「如意吉祥」命名嘅泰式蛋包金邊粉，正價$120，甫上檯賣相極靚，蛋皮煎得均勻，亦將大蝦金邊粉完美包裹。將蛋包金邊粉即刻食直頭好大驚喜，蛋皮偏薄，而且有微微薄脆。切開蛋皮，可以夾出金邊粉，唔單止有鑊氣，而且乾濕度平衡。金邊粉入口亦爽滑，唔會好黏身，酸甜味調得恰好，令人食慾大增。蝦肉就大概有4隻，都係爽口鮮甜，亦有少少豆腐乾、雞肉等配料。

當日套餐附送一人一件椰青西米糕，原價$32，上層有椰汁，下層為粒粒西米，有微微椰青清甜味。芒果糯米飯幾吸引，原價$45至$55，一口式芒果糯米飯就只係$10，蛋糕形就賣$73。飲品唔包，可以揀泰國手工啤，今次另加$39要一杯芒椰沙冰，埋單連加一價格大概係$600，人均則約$300。呢杯芒椰沙頂端有芒果粒﹐上層有椰汁，下面就係芒果沙冰，就好似以前「許留山」嘅芒椰甜品，分別在於芒果味更重，沙冰有濃濃芒果香甜味，有幾秒以為自己食緊有椰漿嘅芒果糯米飯。