大埔富善街400次咖啡 x 新鮮香醇椰汁！Joe椰全店僅賣椰子汁／椰汁沙冰／椰汁小吃！

椰子迷留意！大埔有一間鄰近富善街嘅小店，只係售賣椰子汁、椰子小食嘅小店，適合鍾意椰子味茶飲同小食嘅朋友。由於該店早前曾參與「大埔為食友」活動，故此E.A.Two先至得悉呢間低調嘅小店，椰子汁又真係清甜可口，值得拍拖兩個人嘗鮮！

毗鄰大埔富善街嘅「Joe椰」，位處巷弄間，地方細小﹐人流亦唔算好多。店內招牌就係椰子汁、椰子沙冰，另外重有椰汁斑蘭糕點、椰子糖，都係以椰子為主題。而椰子汁又的確真材實料，今次飲杯椰子汁真係有椰子甜味，而非時下手搖飲品店嘅茶飲咁，例如珍珠奶茶、檸檬茶，唔會有糖漿嘅死甜味，難怪係另一間大埔名物。

單純椰子汁都有分大、中、小size，價格分別係$30、$40、$45，重可以選甜度；另有普通椰子汁$35／杯、$40／支。其餘口味有咖啡椰汁、芝麻椰汁、綠茶椰汁、美祿椰汁、奶茶皇椰子汁，一杯$40至$45，選擇不少。

今次就於芒果椰子汁、木瓜椰子汁、香蕉芝麻椰子汁、菠蘿椰汁沙冰、400次椰子汁中選擇，每杯$40，最後揀咗400次椰子汁，簡單嚟講就係將400次咖啡同椰子汁混合，同幫客人攪勻嘅咖啡椰汁並唔一樣，呢杯400次椰子汁係呈上啡下椰方式，層次分明。

椰子汁用攪拌機打勻，再將咖啡打成泡沬狀態，然後將椰子汁同咖啡二合為一。下層係雪白嘅椰子汁，白如觀音像，而上層有四份一就係淺啡色、打得foamy嘅咖啡層，難怪老細都話呢杯400次椰子汁係打卡必備！

平常好怕甜耶耶嘅椰子汁，無論糖、奶定冰都會好多，但該店嘅椰子汁比較清甜，似鮮榨椰子嘅原味，所以原始椰味較多。下層椰子汁入口清甜香醇，有解渴感覺，而上層咖啡就剛好相反，入口香濃，但質感似乎比椰子汁更幼滑。飲管擺放得比較高，似乎係用嚟攪勻咖啡同椰子汁。

不過，紙飲管真係好難攪勻，都係用手搖勻算數。將咖啡同椰子汁搖勻之後，咖啡同椰子汁混合，椰子汁中有咖啡，而咖啡中亦有椰子香，椰子汁比本身好似更綿滑，而入口亦清甜不膩。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 付款方式只接受現金。

❷ 該店不定期休息，詳情需要留意官方facebook。

❸ 該店只有外賣提供，同時即叫即整，所以係需要等候約15分鐘時間。

❹ 糕點比較早售馨，所以想食要較早前往。

EATWO

Miss A