台灣KFC 2025新年限定！驚喜新品紫芋金來金沙雞、鹹蛋黃醬＋大甲芋泥香最平79台幣！

平常唔少香港人都大鬧香港KFC愈來愈細隻又難食，今次E.A.Two到台灣KFC試試當地嘅炸雞，發現今年初有新品限定炸雞，唔單止大大隻，而且口味獨特。炸雞既包含鹹蛋黃醬，亦有台灣大甲芋泥，入口鹹中有甜。

台灣KFC不時有唔同口味嘅炸雞、葡撻，套餐加點葡撻禮盒只係TWD199。今次我哋一大清早抵達高雄車站，前往車站前嘅KFC，發現今年初起有一款新品，叫紫芋金來金沙雞，全家餐TWD688、雙人餐TWD388、明星餐TWD253、單人餐TWD218等。今次選擇紫芋金來金沙雞XL全明星餐TWD253，配香酥脆薯、汽水同Biscoff焦糖脆餅蛋撻。

KFC本身有常設嘅選擇，香草紙包雞，亦有同台灣口味嘅青花椒香麻脆雞，後者有麻辣香，嗜辣者必試！挑選紫芋金來金沙雞之餘，亦可以加TWD7多一隻青花椒香麻脆雞。套餐配有薯條、蛋撻、汽水，汽水份量就等同平常香港連鎖快餐店嘅加大版，而加TWD3就有Biscoff焦糖脆餅蛋撻，蛋撻亦即係平常食嘅葡撻。

炸雞本身就炸得金黃酥脆，雖然係連鎖炸雞店，但炸雞表皮一樣炸得滋滋作響，而雞肉亦有肉汁，size就係香港網民post出嚟嘅一倍。今次試新品紫芋金來金沙雞，其實即係本身香脆辣脆雞上面舖滿鹹蛋黃醬，同平常嘅鹹蛋黃脆雞唔同嘅地方係上面重有淺紫色痕跡點綴。原來鹹蛋黃醬上面有芋泥，鹹蛋黃鹹香味加上來自大甲嘅芋泥，細緻又有香甜味，入口鹹味中滲出微甜味，層次豐富。