葵芳初心食堂重開變「五無」居酒屋形式！最神秘濃稠叻沙靠緣份！

有留意E.A.Two都會知道，我哋曾經去過葵芳「初心食堂」，當時只係一間狀似家庭式嘅小店，僅以濃稠叻沙為主，當時一嘗已經覺得係香港出色叻沙店。近年該店重開，竟然變成一間「五無」居酒屋模式，依然以叻沙為主，想要拍拖兩個人去食到，只能靠緣份，到底無邊「五無」呢？

「初心食堂」一直都維持初心，裝修前主打濃稠叻沙，裝修後亦都係以濃稠叻沙為主。該店位置距離「葵涌廣場」不遠，裝修簡約，但就明顯轉變為日式居酒屋模式，同裝修前唔同嘅地方係將廚房搬咗出外面，門口一端為小廚房，變成半開放式設計。

目前要前往「初心食堂」並唔容易，同幾年前並唔一樣，E.A.Two想以「五無」居酒屋嚟形容該小店。所謂嘅「五無」，並唔係負面意思，而係「無餐牌」、「無固定營業時間」、「無價錢」、「無電子支付」、「無人排隊」。曾經前往該店，本來於牆上黑板寫明有咩菜式，但目前前往該店，店內完全無餐牌可言，更不用說價錢。呢個做法就好似我哋曾經去過嘅台北「延三夜市」附近一間麵店，全間食店都係完全無價格。

呢間小店同時無固定營業時間，連知名飲食平台同Google地圖都無顯示任何營業時間。如果要前往「初心食堂」，事前必須要上官方IG睇吓當日有無營業，以免白行一趟。不過，該店大多數營業時間都係只限夜晚，而且係夜晚8點之後，果然好似日式居酒屋做晚市至深夜生意居多。而店內人手極少，之前得一個人處理，現時都係只有兩個人。以當日星期日8點鐘計算，該店人流唔算好多，門外基本上無人排隊，只係食飯時間不停有客人進出該店用餐。

該店餐牌不時唔同，選擇明顯比以前少，每日大概只有2款叻沙可以選擇，當日就係雞扒叻沙、豬軟骨叻沙，埋單時得知每碗係$78。另外，店內重有一款小食，當日係秘製燒五花腩，但當日唔想食五花腩，所以未有點選，只係見到隔離檯碟燒五花腩燒得幾靚，油脂豐富，有啲無香，後來聽到隔離檯埋單數目，計到一碟大概係$48。想要好似居酒屋咁配杯生啤都得，每杯$58，大概就係380毫升。

該店叻沙同以往基本無異，質感都係極濃稠，但E.A.Two覺得現時「初心食堂」嘅叻沙，比幾年前更有進步，實在難得！店內將星馬菜嘅叻沙變成日式風格上檯，形式上變得更企理，反而唔係早期嘅家庭式叻沙。店內嘅叻沙湯底極濃稠，但就唔係好似平常咁有大蝦，叻沙呈金黃色，配料有芽菜、洋蔥、豆卜、溏心蛋等，湯底似乎比另一種叻沙配料無咁多。

雞扒、豬軟骨其實都只係不過不失，前者算軟腍，同之前一樣有印度香料醃製過，後者亦煮得淋身，而麵底就係摻摻，即係米粉溝油麵。由於叻沙夠濃稠，所以麵條都特別能夠掛湯，豆卜當然比油麵、米粉更索湯。叻沙價錢其實同平常一碗日式拉麵差唔多，真係拉麵價叻沙，不過E.A.Two可以肯定地講，該店叻沙真係物有所值！

叻沙香氣濃郁，明顯地係有椰奶，加上有少少香茅味，但入口又唔會太膩。對比裝修之前嘅叻沙，味道係辣少少，不過就係可以接受嘅程度。簡單嚟講，就係椰奶加香料，前者味道係較濃厚，入面見到有香料碎、辣椒碎、喇沙葉，重有炒過嘅蔥蒜香等。對比之前嘅叻沙，今次嘅叻沙反而飲得更盡興，我哋真係可以完全將叻沙湯一飲而盡。裝修後捲土重來，果然有更大驚喜！