機場捷運終點！中壢火車站中平商圈被譽桃園西門町？隱藏舊式糖果店／平價Sanrio！老房子搖身變中壢城市故事館！

台灣桃園機場捷運線你最遠搭到去邊個站呢？大多數人乘搭桃園機場捷運都來往國際機場至「台北車站」，又或者最多都係前往捷運「桃園站」，拍拖兩個人再轉乘高鐵去台中等地。今次E.A.Two前往機場捷運「台北車站」另一端嘅終點站﹕「老街溪站」，原來呢個地區係極少遊客前往嘅地方，「老街溪站」正正座落中壢區，除咗有夜市之外，可以徒步至台鐵「中壢車站」，來往「桃園火車站」，甚至更多地方。今次就探索火車站至捷運站之間呢15分鐘路程有咩地方好去啦！

中壢景點（1）﹕中平路商圈

從台鐵「中壢車站」步出，對面就係「中平路商圈」，該位置係一個徒步區，有指呢個商圈曾經被在地人譽為「桃園西門町」，既係逛街好地方，亦有眾多異國美食料理餐廳，只係近年規劃、市容、交通等問題影響該區地位。整條街全長大概只係得700米、闊15米，徒步區內多為青少年流行服飾、精品店，潮牌店不少，商舖聚集於中平路、中正路、中山路一帶。如果想要找尋美食點，可以試試「一心蔥油餅」、「中壢70年老店榕樹下綿綿冰」等。

中壢景點（2）﹕墊腳石生活館

「中平路商圈」附近、從火車站遠眺可見「墊腳石生活館」招牌，該店其實係台灣連鎖書店之一，全名係「墊腳石圖書文化廣場」。該店於70年代由桃園起家，目前已經開到台北、新北等地，甚至有電子購物網站。

該店樓高3層，每層地方偌大，地下基本上係生活用品、化妝品、鐘錶、髮飾等；中間層數就係文具區、辦公用品，以及電腦週邊用品。至於最頂層，就係該店隱藏區域，大多數都係新潮禮品，內有眾多飾品、娃娃、卡片、貼紙等，最特別之處係有唔少平價Sanrio商品，包括絨毛公仔，TWD120就有隻Sanrio小公仔，一眾Sanrio迷可以用平價購買心頭好！

中壢景點（3）﹕中平路故事館

從中平路轉入復興路，會見到一幢歷史悠久嘅建築物，原來該建築物至今已有約90年歷史，而且係來自於日本殖民時代，故建築設計風格都係日式雙拼建築。該館為「中平路故事館」，又叫「中壢城市故事館」，近年經過整修，目前已經重新開放公眾，該館係免費入場！

「中平路故事館」由30年代至今已有約90年歷史，可以追塑至日治時期，隱藏於熱鬧繁華、車水馬龍嘅「中平區徒步區」內。整幢建築設計都採日式風格，由屋頂瓦片、窗框、樑柱、拉門等元素，已經透視日治時期在地居民嘅生活軌跡。整座建築物前身其實係公務員日式宿舍，以木造為主調，整修後每個角落依然保留，無損人文風貌，連珍貴老榕樹都仍舊屹立其中。而老屋室內就加入文物展覽，當中重有文創商品、體驗等，變成一個老屋內嘅展覽廳，不失韻味。

中壢景點（4）﹕壢景町

另一個中壢區景點就係門口寫住大大個新招牌嘅「壇景町」，距離「中平路故事館」僅有約350米，5分鐘內足以徒步抵達。呢個地方同剛才嘅「中平路故事館」相近，都係來自於日本殖民時期，而且前身都係一座日式宿舍，建於1941年，有超過80年歷史。該景點既曾經係台灣首次民主街頭運動「中壢事件」嘅見證地，修復之後更成為在地文青、網美喜愛到嘅地方。