西貢慢活音樂餐廳Pan da cafe走復古風！大量懷舊古董擺設、免費聽黑膠碟！法式焗田螺／炭烤咖啡／蜜糖煙燻雞

近年，好多香港人都鍾意拍拖兩個人北上旅遊，未必會諗遊覽本地嘅地方，但其實香港都有好多地方值得前往。今次E.A.Two走到一間慢活咖啡店，店內外有大量懷舊古董擺設，唔單止走復古風格，更似一間音樂餐廳，有得免費聽黑膠唱片，可以休閒地聽住歌用餐！

呢間咖啡店係「Pan da Cafe」，位於西貢市場街內，正對「魚類統營處」嘅「西貢魚類批發市場」。該店外表非常搶眼，雖然懷舊味濃厚，但就完全唔似一間餐廳，皆因第一個感覺恍如係一間售賣古董嘅夜冷舖。該店走復古風格，甫踏入餐廳已經恍如進入一條時光隧道，音樂旋律夾雜懷舊裝飾同古董，喚醒每個人嘅童年回憶！後來行入店舖內，發現店內唔單止係擁有懷舊氣息，更加係新舊夾雜，連Mirror成員嘅精品都有。

店內外有海量擺設，包括室內同戶外座位，包括舊式撥輪電話、舊玩具、黑膠唱片、舊唱片機、舊海報、舊漫畫、舊月餅罐等，收藏品眾多。難得砌出嚟係亂中有序，並非似天橋底嗰啲將傢俬疊放嘅無家者，反而每一樣精品都清晰可見，好似迷你博物館。更有趣嘅係，戶外座位嘅裝飾似乎係每日重新擺放一次，因為外面無遮掩，相當有誠意同心思。入座可以聽到黑膠唱片播放嘅歌曲，比如係歌手張國榮、陳百強、張學友等。

店內主要有蛋糕、甜品、咖啡飲品，比如窩夫、冬甩、蛋糕等，價格同一般cafe或甜品店無異，都係幾十蚊一份。同時有主時，例如全日早餐、牛扒、意粉等，以西餐為主打，難怪燈光都係偏昏暗。套餐選擇頗多，每份都包含有是日餐湯、法式蒜蓉包、餐飲一杯。餐湯食濃郁蕃茄湯，蒜蓉包就脆卜卜，上面有蓉蓉、牛油，表皮係香脆，但入面都係軟腍。

午市套餐選擇不少，今次E.A.Two選擇一份包含蜜燒豬髀骨嘅炸焗餐$128，以及一份包含半隻煙燻雞嘅煙燻餐$148，兩者皆有香蒜飯或香草意粉，然後選擇任何飲品都可以直接減$18。蜜燒豬髀骨有3條，表皮有焦香，醬汁帶有香甜味，豬髀骨經過蜜燒，內裏都係軟嫩，入口係啖啖肉，鹹中有甜，可以配搭意粉。至於煙燻雞，份量有半隻雞，就似原隻斬開一半，一碟可以同時享用雞胸、雞翼、雞髀肉，份量十足。雞肉表皮燒得焦香撲鼻，帶有香甜味，旁邊重有一小碟好似混有蜜糖嘅醬汁，甜度恰好，唔會過甜。雞肉入口有煙燻味，亦算軟嫩，燒得唔會好乾柴，而且係啖啖肉。今次揀咗意粉，但就發現雞肉配搭飯會更適合。

店內有一款法式焗田螺，原價$68，當日優惠價$48，係一碟田螺焗薯蓉，一份有6隻田螺，而且每隻田螺都係原隻上碟，田螺下面係軟綿綿薯蓉，粒粒田螺都幾大粒。田螺除咗配搭薯蓉，亦有蒜蓉、香草、牛油等配料，田螺新鮮，表面有少少焦香，入口有陣陣牛油香，質感彈牙軟腍。拆出田螺殼，將田螺再混入薯蓉，入口更加軟滑可口，相當甘香。

老細推介一杯炭烤咖啡$40至$45，咖啡唔係烘焙好濃嘅咖啡，但細心聞一聞，依然香氣撲鼻，入口的確有烤過香味，無苦澀味，質感順滑，而且有少少回甘味。另外，餐牌單單飲品就有眾多選擇，而花茶、養身茶更加令人眼花繚亂。每一款花茶都寫得好details，今次挑選一壺蜂蜜女神茶$55，內有玫瑰花、菊花、紅棗、杞子、桂圓、生薑。對於女士們嚟講，花茶點都有用，呢款花茶就適合手腳冰冷、月經不調、氣血兩虛、失眠多夢、低血壓、臉色暗黃、經常熬夜等嘅人。花茶以茶壺盛載，上檯熱焫焫，入口甘香，旁邊伴有蜜糖，花茶加入蜜糖可以帶有蜂蜜香甜味，更為清潤同暖心。