【曼谷美食】隱藏泰式脆皮燒肉一碟59泰銖！ หมูกรอบ HERO 海鮮／BBQ／芝士／魚露 7款醬汁任揀！

曼谷係東南亞國家嘅美食勝地，當中有好多泰式小吃，唔單止受到當地人歡迎，連旅客都會拍拖兩個人慕名而至。除咗泰式海南雞飯、芒果糯米飯、冬蔭功湯、泰式炒河粉等，重有泰式脆皮燒肉。今次E.A.Two就搵到一間頗受當地人歡迎嘅泰式脆皮燒肉店，雖然隱藏小巷內，但Google評分有高達4.5分，現場都有唔少人排隊幫襯，即管睇睇水準如何！

距離「勝利紀念碑」不遠處，有一間隱蔽泰式脆皮燒肉店，分別可以從兩個BTS站出發。從大街轉入巷弄，徒步40米就會見到一間泰文招牌嘅小吃店。該店招牌只係簡單寫住「หมูกรอบ HERO」，反而Google地圖寫有「Crispy Pork」，顯示係以脆皮燒肉為主打。

該店基本上只係售賣泰式脆皮燒肉，size S只係賣59泰銖，size M就賣89泰銖，size L同size XL則賣139泰銖、189泰銖。每個size嘅脆皮燒肉都可以自由配搭唔同醬汁，包括海鮮汁、醬油，口味眾多，重有芝士、BBQ、mala、魚露、韓式蒜味。另外，脆皮燒肉可以配搭粉麵或飯，就算脆皮燒肉飯都只係賣79泰銖起。

雖然門口不時有客人排隊，但就唔係遊客，只係當地人，連車仔上嘅餐牌都只有泰文字，勉強只有少量英文字，可見唔係為遊客而做嘅食店，脆皮燒肉受到當地人歡迎。

夜晚前往該店，從玻璃櫃可見，淨返嘅脆皮燒肉並唔多，望落幾吸引。今次就點一份脆皮燒肉返酒店試試，配搭一款醬汁或配料，不過我哋覺得脆皮燒肉本身已有足夠鹹度，唔太需要另外再蘸醬汁。

雖然拎返酒店只係約10至15分鐘步程，脆皮明顯已有少少變化，只係依然有微微脆皮質感，只係表皮都係偏硬。故此，建議買完之後馬上即刻食，咁先會食到脆皮口感。燒肉質感比較紮實，唔係好軟腍嗰種，偏乾身，需要咬多幾下，但入口鹹中有少少甜味。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭BTS「Victory Monument站」或「Sanam Pao站」，徒步約10分鐘即達。

❷ 如果由「勝利紀念碑」出發，下行天橋後，直行轉入小巷，5分鐘就會到達。

❸ 該店雖然係外賣店，但外面有少數檯櫈，可以即刻食，唔使怕脆皮淋晒。

❹ 泰式脆皮燒肉有唔同配搭，如果單買就分S、M、L、XL size，最平只係59泰銖。