人人和平姊妹店！午市無加一、套餐送甜品！北角Gotthard base西餐廳歎西冷扒／香煎比目魚／燒豬仔髀！

唔少情侶不時想拍拖兩個人搵間西餐廳浪漫吓，但主打西餐嘅香港餐廳通常價格都係比較高。今次E.A.Two就前往北角一間西餐廳，該店曾經係今年一套電視劇集嘅取景地，亦係另一間頗受歡迎嘅小店嘅姊妹店。午市套餐選擇不少，水準比佢嘅姊妹店穩陣，價格上同坊間Cafe無異，我哋覺得係可以一試。

座落於北角英皇道背後小巷嘅「Gotthard Base Restaurant & Lounge」，早於2019年開設，位置正對知名嘅「人人和平小飯店」，附近更有CP值頗高嘅「麥記美食」。雖然E.A.Two實試過「人人和平小飯店」，當日佢嘅叉燒真係一試不能再試，質感可怕得唔敢再試第二次。不過，對面呢間姊妹店「Gotthard Base Restaurant & Lounge」水準卻反高潮，原來佢做西餐至少好過做中餐。

另外，如果有睇ViuTV今年嘅電視劇集《弊傢伙！我要去祓魔》嘅話，一定認得呢個場景，出現於朱栢謙、韋羅莎最初於餐廳議論嘅集數，門口有該劇海報，更有3位主角強尼、岑樂怡、王頌茵嘅親筆簽名。餐廳門口背後有圓拱形天花，走入餐廳就恍如進入一條時光隧道，裝潢獨特。據了解，該設計有意模仿瑞士南部最長嘅鐵路隧道，所以名稱都係來自「哥塔德山底隧道（Gotthard-Basis tunnel）」。

店內Lunch Set有超過10款可以選擇，其中4款套餐可以免費獲得一件是日甜品，堂食外賣皆適用。翻查資料，發現該店係有酒店大廚坐鎮，大廚來自於「洲際酒店」《米之蓮》餐廳，難怪整體水準都係比較穩定，感覺係稍有誠意。午市套餐加$5有是日餐湯或沙律，當日為忌廉湯，質感滑溜，口感唔係太稠身，似周打忌廉湯，入面有蔬菜底，無咩多餘修飾，碗邊只有一塊薄切蒜蓉包，烘得乾身，上面有少少蒜蓉牛油香，質感係比較硬。而凍檸茶就麻麻，茶底極淡，只能夠單憑糖水同檸檬味，所以加完糖水就係甜味。

菜式都係偏向歐陸風格，海陸大餐$188 包含香煎紐西蘭西冷牛、炸鱈魚、大蝦、煙三文魚沙律、炒雜菜、是日薯菜，香煎紐西蘭西冷牛扒$142 就配有紅酒汁、雜菜、是日薯菜，美國極黑豚豬梅扒$142則配有自家製菠蘿杜卡香料醬、雜菜、是日薯菜，而香煎精選海魚$135 就配Bearnaise汁、雜菜、是日薯菜。4款菜式缺點係無得配搭白飯或意粉，所以感覺份量比較少，食完好似無點食過咁，其實唔係好飽肚，其他菜式就有燒豬仔髀、啤酒炸魚、牛肉漢堡、意大利飯、意粉等，或者會比較飽肚。

香煎紐西蘭西冷牛扒配有紅酒汁、雜菜、是日薯菜，牛扒被雜菜同薯菜墊高，好處係牛扒唔會被醬汁浸住。外觀上，睇到牛扒亦算厚切，牛扒入面稍為粉嫩，入口肉質軟嫩，有保留肉汁，七成熟最穩陣，生熟度剛好，牛扒上淋上少少醬汁，鹹味中有少少甜味。雖然該店最出名係食威靈頓牛扒，但午市套餐就無呢個選擇，據悉係需要預訂先會有。

香煎精選海魚配Bearnaise汁、雜菜、是日薯菜，當日為比目魚，魚肉與感嫩滑，有少少油脂，其實已經煎得幾香，略嫌魚皮煎得唔夠脆口，旁邊有嚿檸檬，可以於魚肉上自行加入檸檬汁。魚肉同牛扒一樣，底下都係一堆薯菜，離菜將魚肉墊高，同樣唔會被醬汁浸住。一堆雜菜亦可以減去膩感，薯仔亦有少少飽足感，只係整體份量都係唔能夠飽肚。

午市套餐會附送一份甜品，當日為香蕉朱古力蛋糕，頭4份套餐都會有一片蛋糕，上層為朱古力，下層為香蕉蛋糕，估唔到都有濃濃蕉味，旁邊重有幾粒水果點綴。而檸檬茶就比較普通，基本上無咩茶咩，只係單靠新鮮檸檬同糖水，所以加入糖水後，就係甜味。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金。

❷ 店內午市無加一服務費，晚市就有加一服務費。午市供應時間星期一至五11:30-14:30、星期六及日11:30-15:00。而加$12有咖啡，加$15有matcha latte，加$28有甜品。

❸ 無論幾時，最好提早預訂入座。

❹ 該店位置正對「人人和平小飯店」，從堡壘街「麥記美食」轉入去，直行就會見到「GOTTHARD BASE」。