【曼谷美食】隱藏泰國人冬蔭功店！Sammitr Tomyum noodle 配料充足、味帶微酸！清湯鮮味／濃湯Creamy／冬蔭餃子

冬蔭功湯泰國必食嘅菜式之一，喺曼谷可以搵到無數間有得食冬蔭功嘅地方，今次E.A.Two就探索一間隱身於「Asok」區小巷內嘅冬蔭功店，大多數客人都係當地人，而且係受到歡迎，連Google評分都有4.7分，同一般冬蔭功真係與別不同，不妨拍拖兩個人去試試！

曼谷「Asok」區係旅遊熱門區域，該區聚集眾多酒店，亦有大型商場「Terminal 21」，大概唔少香港人都會揀呢區嘅酒店，貪佢交通方便，餐廳選擇多之餘，亦有購物中心、超市，更有唔少按摩店可以選擇。今次E.A.Two於一間24小時超市對面搵到一間當地人喜愛嘅冬蔭功店，距離BTS站只有約10分鐘步程，附近更有一個大型公園「班嘉奇蒂公園」。

雖然地理位置方便，但該店就位於小巷之間，只要搵到「Asok」區嘅24小時超市「Foodland」，自然會搵到以下呢間冬蔭功湯麵店。該店其實係一間泰文招牌嘅食肆，不過從Google可以search到英文店名叫「Sammitr Tomyum noodle」。店內只有泰文、英文餐牌，並無中文餐牌，可以推斷唔算咩遊客店，起碼無咩中文遊客會去。

我哋前往該店時，剛好係當地人食完午飯嘅時間，對香港人嚟講就係下午茶時間。當時見到店員將原先擺放店外嘅座位收返入店舖內，可見本身食飯時間檯櫈係擺晒出外面，換言之該店隨時係容易滿座嘅食店。呢個動作令準備入座嘅我哋誤以為準備收舖，原來只係剛剛過咗繁忙時間。

門口宣傳牌有款combo set係95泰銖，可以點冬蔭功配3隻餃子，好似CP值幾高。甫進入店內，店員遞上餐牌，可以直接點recommended菜式，包括77泰銖嘅清湯冬蔭功麵，82泰銖嘅奶油冬蔭功麵，82泰銖嘅馬拉冬蔭功麵，72泰銖嘅乾身清湯麵，75泰銖嘅煎冬蔭餃子，60泰銖嘅普通煎餃子。此外，亦可以自選配搭，先揀麵底，再揀湯底，然後可以自由加上配菜，最後再按需要點飲品。而麵條可以揀米粉、酒麵、米粉、河粉、粉絲、即食麵。店內亦有飯類可以選擇，但就同冬蔭功無咩關係，不過有泰式燒肉飯、泰式臘腸飯等。

今次只係點咗清湯冬蔭功麵、奶油冬蔭功麵，無論邊種湯底，要有心理準備同一般大家食開嘅唔一樣，因為味道係偏酸。簡單嚟講，湯底都係得4種，無冬蔭功嘅清湯、冬蔭功清湯、奶油冬蔭功湯、馬拉冬蔭功湯。冬蔭功清湯就係清湯中加入冬蔭料，色澤係淡身，非常清透，味道係偏酸，1隻辣椒辛辣度好低；奶油冬蔭功湯質感就係較creamy，但都係偏淚體狀態。湯頭色澤就似平時食開嘅冬蔭功，都係橙紅色，但都係無坊間咁紅，同樣係偏酸，2隻辣椒辛辣度其實都唔高，唔夠膽試3隻辣椒。

每一碗冬蔭功湯底都係新鮮製作，湯底鮮美，而每碗配料都好多，內有豬肉片、炸餃子、豆卜、雞蛋、豬肉碎、白蘿蔔、豬肉丸、豬皮、炸蒜等，同冬蔭功湯都係好配合。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店距離「Asok站」只有約10分鐘步程。

❷ 門口斜對面就係24小時營業嘅超市「Foodland」，方便食完之後去掃貨。

❸ 留意該店主要係分湯底，有清湯同creamy湯等可以選擇，配料大致上差唔多。

❹ 留意該店主要係當地人用餐，午飯時間檯櫈會擺晒出門口，顯然人流不少，所以最好避開當地人食飯時間前往。