全港剩4分店！意大利人自己做生招牌開設Jacomax、竟有菠蘿Pizza！即睇將軍澳限定選擇！

意大利人一向好抗拒食菠蘿Pizza，但香港有個意大利人開設Pizza店時，竟然以菠蘿Pizza為賣點，目前該店全港僅餘4間分店，不妨拍拖兩個人去試伏。今次E.A.Two前往將軍澳分店，發現餐牌內嘅選擇同其他分店無異，但就有少少唔同，原來有部份係將軍澳分店限定選擇！

「Jacomax」係香港本土一間Pizza專門店，分店位於銅鑼灣、上環、尖沙嘴、將軍澳，據悉係來自於一位意大利人。從店內餐牌上可見，該店以一個意大利男人作生招牌，而餐牌上呢個男人其實就係老細Jacopo，該店就係由Jacopo、Maxy合力創辦。該店前身其實係一間開業6年嘅雪糕店，後來生意失敗導致執笠，後來於2011年再改開呢間Pizza店。如果要開Party，不妨選擇「Jacomax」，唔好成日淨係識其他Pizza連鎖店！

該店以意大利菜式為主，主要就係售賣Pizza薄餅，另外重有意粉、沙律、雞翼、炸魷魚、青口、炸雞等可以選擇。雖然係來自於意大利人，但封面竟然係用意大利人一向抗拒嘅菠蘿pizza做賣點，用呢個意大利人嘅死穴做賣點，認真令人意外！週末假期唔同平日，「Jacomax」並無套餐可以選擇。今次去將軍澳寶林店，基本上同其他分店差唔多，但有部份選擇係將軍澳店限定，只有呢間分店有得食。

「Jacomax」將軍澳店限定菜式並唔算多，比如係加菲貓最愛牛肉醬千層麵$168，另一款將軍澳分店限定嘅係自家製炸雞配蜜糖芥末醬$128，一份炸雞有6件，旁邊佐有蜜糖芥末醬。炸雞原來都唔伏，炸成金黃色，外脆內嫩，蘸上蜜糖芥末醬可以減去炸雞油膩感。

Pizza有9吋、12吋可擇，雖則寫明1人、2至3人享用，但其實兩個人叫9吋都已經足夠，據悉Pizza有獨特秘方炮製。Pizza選擇不少，今次揀咗比較特別嘅藍芝士蘋果薄餅$133，9吋切開就有6塊，兩個人平均每人可以食3塊Pizza。後來發現，原來呢款藍芝士蘋果薄餅係該店嘅鎮店之作！

Pizza即叫即烤，藍芝士蘋果薄餅上面鋪滿薄薄蘋果片，再加入少少Gorgonzola芝士。Pizza餅底好薄，只係側邊邊緣略有拱起，但餅底都係可以捲得起，似意式Pizza。平時Pizza都係偏鹹，但呢種藍芝士蘋果薄餅就帶有香甜味，入口唔會咁膩，藍芝士有微微香濃味，又唔會太搶。片片蘋果唔單止有少少爽脆感，更加令薄餅鹹中有甜，甚至有少少蜜糖味，整體係一款甜味Pizza，果然令人驚艷。

由於無套餐可以選擇，所以飲品同小食必須單賣，有部份飲品睇落頗特別，比如係燒菠蘿椰子微風輕吹$58、沿途芒出車外$58，計埋飲品埋單大概係$400左右。燒菠蘿椰子微風輕吹即係一款菠蘿椰子梳打，上方有一塊輕輕燒過嘅菠蘿點綴，椰子味並唔算重，反而菠蘿味比較多，所以係比較清爽。至於沿途芒出車外，則為一杯濃郁芒果汁，入面加入香茅、香草，好重芒果味，整體感覺似一杯泰式飲品。