【台南景點】打卡最美星巴克園區！奇美博物館隱藏7大展館、河岸草原！即睇特展＋常設展館＋交通攻略！

台南博物館眾多，最具人氣嘅博物館景點可能就係西洋古典風格嘅「奇美博物館」，館內唔單止有7大展館，館外更設有Starbucks園區，河岸大草原環境超美，拍拖兩個人打卡必到！即睇「奇美博物館」門票價錢、交通攻略！

由「台南車站」出發，經台鐵只需乘搭1個站，於「保安車站」落車，徒步約15分鐘就可以抵達「奇美博物館」。走入博物館之前，會穿過一條小小嘅美食街，包括有「黑橋牌食品」香腸、「胖吉義式冰淇淋」、「富貴冰淇淋」、「樹谷專櫃」。呢度嘅「黑橋牌」香腸每支TWD45至65，香腸堡就賣TWD65至95。而「胖吉義式冰淇淋」有11款口味可以選擇，每球雪糕為TWD80、可以加至兩球或三球，價格為TWD150及210。

而博物館1樓即係地下，要進入博物館必須要穿過7-Eleven便利店、Starbucks星巴克咖啡店，同層有餐像區、普通禮品店同特展禮品店。入口附近有餐廳可以選擇，包括「Isabati 義薩芭蒂」、「深藍咖啡館」，前者係一間以意大利菜式為主打。而博物館內呢間Starbucks係打卡必到嘅門市，相信係台南最美嘅Starbucks，皆因門外正對一個大草原及河岸風景，環境就似一個星巴克園區！

「奇美博物館」地方偌大，本身其實係一個全台最大嘅私人博物館，來自於一位台灣企業家許文龍先生。博物館內主題眾多，包含有西洋藝術、歷史、音樂等，來自世界各地嘅館藏量極多！購票之後，只要使用門票上個人專屬嘅QR Code，就可以進入展館範圍。而1樓「羅丹廳」、2樓「藝術廳」同中間通道嘅「雕塑大道」都係館內重點地方，名畫、雕刻都係珍貴館藏，包括大道上嘅公元2世紀大理石雕刻，作品歷史悠久。

當日特展區有《畫師們：走進16、17世紀尼德蘭繪畫時代》，展覽截至2025年8月底。館內既主打16、17世紀嘅尼德蘭繪畫時代，係一個百家爭鳴嘅時代。展館內詳細展出當時畫師點樣作畫，可以細緻觀察作畫嘅模式同環境，細心可以睇吓背後繪畫故事。

常設展廳內其實有幾個唔係展覽嘅地方，例如「豐收廳」、「布雷西亞廳」都係會議廳，「奇美廳」就係表演廳嚟，重有個「小藝術工作坊」。而1樓常設展廳大門口走入去之後，會發現整個空間好大，兩端都係展覽廳，左右分別係「兵器廳」、「動物廳」、「羅丹廳」，「雕塑大道」，中間就有「雕塑大道」、「雕塑水景庭園」。其中，「雕塑大道」就係兩側有好多巨型雕塑像，無論上層定下層都會有一個又一個雕塑像喺兩側。

「兵器廳」入面有好多古舊兵器，據悉展品都係來自於全球各地，包括刀劍、斧頭、弓箭、槍械、火砲、盔甲等，更有兵器製作技術，呢個廳軍事迷必到！走入「動物廳」，同樣被入面展品嚇一嚇，因為入面齊集全球五大洲嘅動物標本同化石，無論size定數量都係令人驚嘆，就似生命演化，據知入面有超過4000件作品！「羅丹廳」係來自於一個法國雕塑家奧古斯特羅丹，佢最為人熟悉嘅作品係《沉思者》。

常設展廳有2樓同樣有「雕塑大道」，上層呢邊就有「藝術廳」、「樂器廳」，中間既係休息嘅地方，樓梯更加係可以打卡嘅位置。「樂器廳」入面固然有大量樂器展品，包括民族樂器，而單單各款提琴數量同款式就已經令人驚訝，最早有超過400年歷史嘅小提琴！更特別嘅地方，係館內用特別嘅方法嚟做現場樂團表演，精彩演奏就似睇緊現場管弘樂團。而「藝術廳」既係重要常設展館，內裏就有13至20世紀嘅西洋作品，各式名畫可以欣賞唔同時代、唔同場景嘅藝術作品。

逛完博物館，記得一定要去埋外面嘅「奇美博物館戶外園區」！園區位於Starbucks外面，係一個包含景觀嘅休閒空間，既有河岸同草原，亦有天橋穿梭兩岸。只要穿過「奧林帕斯橋」，就可以直達對岸嘅「臺南都會公園」，中間其實係一個「繆思湖」。

由於戶外園區實在太大，可能需要再走1至2小時先可以逛得完，而E.A.Two時間又不足，所以未有完全逛完整個公園，只係走過其中一段路。戶外園區係可以回望「奇美博物館」，其實該博物館室內有啲宏偉同金碧輝煌。而博物館外觀則頗為霸氣，建築設計恍如歐洲風格，外邊水池嘅太陽神馬車更加係獲得法國「凡爾賽宮」正版授權嘅作品。如果拍拖兩個人逛完博物館，可以到戶外園區散吓步，又或者準備少量食物，於大草地野餐，環境輕鬆，Chill爆！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台鐵至「保安車站」，徒步約15分鐘即達，而乘搭公車路線紅3至「奇美博物館站」亦可直達園區。

❷ 必須經7－11同Starbucks門口先可以去到博物館入口。博物館內有大量Locker，可以將隨身行李擺低，然後慢慢行博物館，需要預備TWD10。

❸ 博物館地方偌大，樓高兩層，展覽館眾多，建議一定要預定充足時間，最少起碼3小時。

❹ 博物館內設有常設展覽同特展，可以購買套票睇晒兩個，常設展覽門票人均為TWD200，特展人均為TWD400，而雙展套票則為TWD450。館內接受現金、master card、visa、銀聯、apple pay、google pay等付款方式。