【澳門美食】平價葡國菜餐廳Cravings正對消防博物館！葡國乳豬／白酒炒蜆／海鮮飯／木槺布甸

去澳門當然要搵間葡國菜餐廳拍拖兩個人醫吓肚，但好多主打葡國菜嘅餐廳價格都係偏高，而價格太低又伏伏哋，要搵到間取個平衡並唔容易。今次E.A.Two就前往一間位於消防博物館附近、經濟實惠嘅葡國菜餐廳，當日見到有一款菜式係每檯都有點，到底係邊款呢？

通常靠近「大三巴」等知名景點嘅餐廳都係比較貴，其實行多兩步可以搵到比較經濟實惠嘅餐廳。今次徒步約10分鐘左右，就去到隱身於「鏡湖醫院」附近嘅葡國菜餐廳。該店就似一間當地街坊餐廳，招牌寫住「Cravings」、「好想食」，對面就係「消防博物館」。

「Cravings」平日有午市套餐，菜式包含烤雞扒、燴豬排骨、摩囉雞腿飯、炸杏仁魚塊、葡式燴雞、牛扒仔、葡式魚餅、牛肚三角豆、黃薑粉豬肉，睇價錢只係$49一份，而素食套餐$43至$45，可以選擇蔬菜絲炒蛋、摩囉飯蛋白烚椰菜、葡式菠菜餅，睇落似係街坊嘅飯堂。每份套餐會配上米飯或意粉或豬仔包，重有飲品，可揀咖啡或檸茶或汽水，CP值似乎唔低。

除咗平日午市套餐，其實重有午市二人套餐$248，包含拉芝馬介休球、海鮮飯、肉醬意粉、甜點、檸茶；或者另一款二人套餐$348，包含有馬介休球、海鮮蝦、咖哩蘿蔔蝦、羊腿扒、薯條、甜點、檸茶，除咗主食之外，其實無咩特別。就算晚市套餐，有時都未必最啱食，而單點價錢都唔係爭好遠。

該店有唔少葡國菜式選擇，例如拉芝馬介休球沙律$85、馬介休炒飯$82，葡式海鮮飯$138、鴨肉炒飯$128，羊腿扒$158，奶奶雞$128／半隻，葡式雜燴$158，澳門式咖哩雞$128，烤雞跟秘製醬汁半隻$128，葡國雞$140，葡式牛柳扒$158，火焰葡國腸$88，葡式白烚鱸魚$158，白蘭地迷迭香蝦$148／8隻，葡式碳烤魷魚$138，馬薩拉牛油雞$95、馬薩拉牛油芝士$95、菠菜蓉芝士$95、腰果蓉蝦仁$111。今次選擇咗葡式燴鱸魚$158，醬汁酸酸甜甜，魚皮微脆，魚肉好嫩滑。

而單單馬介休就有好多唔同選擇，包括薯絲馬介休$148、炸馬介休球$60／5件、白烚馬介休$193、戈麥斯撤式馬介休$148、忌廉馬介休$151、燴馬介休$193、烤薯仔馬介休$193，馬介休湯$38、薯蓉青菜湯$30。今次反而唔想食太多嘢，只係點多款小食季節性煎魚仔$70，魚仔條條脆卜卜，中間有小碟酸甜汁，可以解膩，不過更適合佐酒食用。

有部份菜式係需要預訂，例如白酒燴兔肉$178／半隻、$350／隻，咖哩蟹$400、時價嘅葡式烤風鱔係。另外，重有葡式炸乳豬$280、咖哩蘿蔔蝦$73、非洲雞$128、半隻$75。除此之外，E.A.Two細心地發現到竟然幾乎每一檯都有一碟白酒炒蜆$129！實試之後，發覺真係值得一試，白酒炒蜆非常入味，醬汁濃郁，內有芫荽，蜆肉脹卜卜，入口爽口鮮甜。不過，食落醬汁其實有啲鹹，當日就見到唔少人檯面同時有麵包，所以建議加點麵包$15、蒜蓉包$35、蒜蓉飛餅$35或飛餅$30，蘸埋白酒炒蜆嘅醬汁就好配合。

甜品方面，今次揀咗一份木槺布甸$30，質感有啲似上次另一間葡國菜餐廳，層層cream都係恍如雪糕質感，冰涼之餘亦爽滑，可以解膩，甜度又唔會好高。飲品就有款葡萄牙汽水一支$18，有3款口味，包括百香果、橙、菠蘿，揀咗比較穩陣嘅橙味，又幾清爽，唔會好似某隻橙汁汽水咁甜。另外，既然有佐酒小食，當然有紅白酒、雞尾酒等，亦有款超霸啤酒$21／330ml、$45／1L，啤酒嚟講真係幾抵飲。