葵興KCC商場聚集小店！瓜破菓子店網店變實體！和風甜品x烏冬套餐有9折優惠！

葵涌一帶一邊係工業區，另一邊係住宅區，當中以葵興KCC商場比較為人熟悉。呢個商場雖然地方細小，但就一直聚集唔少小店，適合拍拖兩個人去醫吓肚。今次就前往一間開放式食店，該店由蛋糕網店變成實體店，除咗和風甜品，重有烏冬套餐，食烏冬或飲咖啡再食蛋糕更有9折優惠！

KCC商場樓高10層，頂樓設有可徒步而至嘅天台，8樓就有新式素食店「入素」。地下有茶記「南記冰室」、咖啡店「Relax Coffee」，1樓就有一間台式便當店「Triple Mouths」，今次就上4樓去一間「瓜破菓子店」。

事實上，「瓜破菓子店（Patisserie Uriwari）」係來自於一間售賣日式蛋糕嘅網店，之後轉為實體店。唔單止售賣日式蛋糕，重有主食，所以都係附近打工仔飯堂之一。「瓜破」二字其實係來自於大阪小社區，該店都符合日本風格，因為主食、甜品等食材都係來自於日本。

蛋糕$48全部有單字標示，例如「麴」，而主食或飲品有9折。蛋糕細細件，好有呃Like風格，只係真係比較細件，好快就食晒。不過，蛋糕口味眾多，例如白醬油日本豆乳慕絲芝麻慕絲抺茶布朗尼、長野蘋果焦糖慕絲黑朱古力鏡面、熊本栗慕絲和栗慕絲朱古力忌廉涉皮栗、高知柚子慕絲咖啡朱古力榛子蛋糕、和三盆軟心撻黑蒟麻薯黃豆粉、開心果軟心撻開心果脆朱古力72%朱古力、柚子忌廉南山園玄米慕絲榛子脆脆抺茶蛋糕、酢橘牛奶朱古力忌廉白朱古力焦糖忌廉黑朱古力金磚蛋糕、櫻桃酒慕絲72%朱古力雜莓醬原味海綿蛋糕、士多啤梨吉士忌廉杏仁蛋糕等等。大少少嘅size就賣$78，再大少少正常生日蛋糕size就賣$348。

抺茶係該店出色之作，今次選擇柚子忌廉南山園玄米慕絲榛子脆脆抺茶蛋糕，既選用日本食材，亦配合香港人鍾意嘅打卡風格。蛋糕入面有抺茶，入口甘甘澀澀，據悉係以選用丸久小山園宇治抹茶炮製。雖然係包含慕絲，但質感唔係柔滑質感，反而係偏紮實感覺。而頂頭就有酸酸甜甜嘅柚子，重有玄米茶，味道清香，蛋糕入面又有粉紅色嘅榛子碎，增加咬入口嘅質感。係蛋糕size比較細，好似法式甜品嗰種一口size。

熱湯烏冬有8款，蠻字係期間限定$78，係慢煮熬製鴨湯烏冬配慢煮鴨胸，有讚岐手打烏冬、九條蔥、糖心日本蛋、新鮮蔬菜、慢煮熬製鴨湯。而冷烏冬就有4款，澄字$58，冷烏冬配日和慢煮鴨胸，同樣有讚岐手打烏冬、九條蔥、水耕菜、糖心日本蛋、慢煮熬製溜醬油鰹魚湯。沙律就有3款，基本上熱湯、冷拌、沙律配搭嘅配料都係差唔多。冷食嘅烏冬質感係比較爽滑彈牙，醬汁就比較正常發揮；熱湯嘅烏冬比較軟身，但都係堅韌，係相對有比較濃嘅湯汁，味道上會較吸引﹐湯汁入面有九條蔥。而同樣係鴨胸，熱湯選擇嘅就係慢煮風格。

飲品有焙茶Latte $38、椰青冰咖啡$45，焙茶Latte上面有奶泡同微微拉花，茶粉沉澱之後味道會更濃郁，飲用之前輕輕攬拌會更好。而椰青冰咖啡就係椰青汁配咖啡，所以咖啡入口混有清甜味。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店最後落單時間為19:30。付款方式接受Visa、Master、現金、八達通、AE、Apple Pay、PayMe。

❷ 其實係一間和風Cafe，有主食有蛋糕，門市訂蛋糕有95折優惠，可以送到地鐵站。

❸ 該店只係得4個座位。

❹ 店舖位於kcc＠life商場4樓，其他樓層分別都有小店可以選擇。