【澳門自助餐】Sky21酒吧餐廳和食放題人均要$XX？菜式鹹度到底有幾高？

好多人都話拍拖兩個人去澳門食自助餐都平過又好過香港，到底係咪真呢？今次有朋友帶路去食一間酒吧餐廳，當時有款和食放題，平日人均竟然都要過$300？究竟食啲咩要呢個價，係正定係伏？

澳門半島內有好多餐廳，其中「英皇娛樂酒店」對面有幢「AIA Tower」，入面有間酒吧餐廳。本身編輯其實唔飲酒，但朋友帶去試吓和食放題，即管睇吓咩料。走入大樓之後，必須登上電梯，先可以上去「Sky21」酒吧餐廳。本身朋友帶過去呢間餐廳食午市buffet，環境不俗，水準都唔算差，更可以270度睇澳門風景。不過，原來夜晚用餐地方真係截然不同，因為係下層嚟，只係梳化座位後面嘅一隻隻窗睇到風景。

所謂和食放題，就係日式為主，屯括刺身壽司同燒烤，同一般日式放題無異，菜式都係無咩特別，吸引啲嘅係要另外加錢。話明係酒吧餐廳，梗係主要賣酒，加酒就當然要額外付款。

出面有少量小食，但都係得沙律、冷麵、壽司，少少凍蝦、青口、螺，同上次午市自助餐無異。刺身就有紋甲魷魚、三文魚、金槍魚、劍魚、希靈魚、八爪魚、甜蝦、油甘魚、北寄貝、帶子，正常發揮，不過鮮甜味一般，好似解凍過程爭咁啲。

炸物有雜菜天婦羅、大蝦天婦羅、雞軟骨、餃子、炸蝦餅、炸豬排、炸蠔、炸豆腐，飽肚有鰻魚炒飯、咖哩牛肉烏冬、叉燒拉麵、牛肉烏冬、鰻魚薄餅、煙三文魚薄餅，同樣都係比較飽肚嘅選擇，好似淨係點咗雞軟骨同炸豆腐，粉味好重，味道上就係一個字﹕鹹。

燒物部份要額外畀錢，例如和牛，唔加錢就有平時正常buffet有嘅選擇，包括芝士玉子、日本蕃薯仔、燒牛肉、燒鯖魚、燒蝦、燒帶子、燒豬頸肉、燒雞中翼、燒牛舌、汁燒茄子、大蔥雞肉、燒多春魚、燒尖椒、燒洋蔥、燒菠蘿、豚肉大蔥卷、豚肉蠔卷、明太子雞肉、燒五花腩、汁燒雞肉捧、牛油燒粟米、汁燒秋葵、明太子翠玉瓜、燒冬菇。相對於煮物同炸物，燒物尚算好啲啲，例如燒菠蘿咪有甜味，其餘都係偏鹹。

至於煮物，就有牛油焗蜆、海膽焗生蠔、炒時蔬、牛油焗金針菇、白貝味噌湯、關東煮、清酒煮蜆，本來係比較穩陣同可以顯功架嘅菜式，但食完就只有一個字可以總結﹕鹹！焗蠔預咗無蠔味，但蠔好細隻，芝士包裹晒成隻蠔肉，就只係芝士味，好似食緊擺喺蠔殼入面嘅芝士。以為焗蜆調味先鹹，好似直頭食到塊鹽，唔確認係咪鹽嚟，點知清酒蜆都可以鹹到呢個地埗，後者正常應該係比較清甜。明白主要係賣佐酒小食，但都唔使咁鹹啩？

甜品有加錢，當中有款巴斯克半熟芝士蛋糕配藍莓醬$78，見到隔離嚿蛋糕幾巨型，諗住試試，但原來製作過程頗花時間同功夫，至少要30分鐘時間。當預早點餐，等待好耐都未有，轉頭話原來漏單，要重新整，okay又等咗30分鐘，就話無單，要等30分鐘。15分鐘又15分鐘過去，等到要搭車，最後決定棄單離開。

夜晚有機會有人現場做live show，但實際上只係分別有一男一女前後腳喺度唱K，唔係自彈自唱，淨係對住個mon唱歌，而且係唱緊一啲舊到不能接受嘅歌，最新嗰首係李克勤。總括嚟講，整間餐廳不能只有我食到！其實我係咪應該大力稱讚，等多啲人中伏呢……

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店有英式下午茶同午餐，比較化算同穩定。

❷ 幢建築物位於英皇酒店對面，喺AIA大樓入面，要搭電梯先上到去。

❸ 和食之夜日式放題供應時間為18:30-21:30，星期一無供應，星期二至四人均$328，星期五六日人均$338，需要畀加一服務費。

❹ 佢一定要wechat入個點餐系統，好彩係朋友帶自己去，唔使用自己部機，所以無wechat記得唔好去呢！