平民西餐廳隱身葵涌光輝圍！現金付款享95折優惠！We Time Cafe牛扒／豬鞍／肉眼／羊架全日供應、羅宋湯＋檸檬茶亦不欺場？

好多人經常鬧香港無啖好食，無咩餐廳選擇，但其實能夠保持水準嘅小店重有好多。葵涌光輝圍就有間主打附近街坊客嘅平民西餐廳，地方細小，但食物有質素，唔少食材更全日供應，單單套餐附送嘅羅宋湯同檸檬茶都無求其做，適合拍拖兩個人去撐檯腳！

位於葵涌光輝圍內嘅「We Time Cafe」，表面睇似又係一間咖啡店，但實際上原來係一間西餐廳！該店週邊都係住宅，另一邊就係工業區，主打嘅就係街附近坊客。如果齋睇餐牌選擇，老實講伏味頗濃，因為餐牌乜都有！但細心啲睇，從餐牌選擇可以得知，有部份菜式係為咗遷就街坊客而定，有早餐又有特價下午茶，就算主打西餐，都有鳥冬、拉麵、沙律等選擇，等街坊唔使日日食西餐。

店內其實有款大滿足鐵板餐，今次就先試精選套餐，同樣係扒類，感覺似港式西餐風格。鐵板餐由$118起，包含餐湯、蒜蓉包，選擇固然係比較吸引，有西式牛扒、紐西蘭牛柳、安格斯牛肩扒、T骨牛扒、羊架、雞扒，可配蒜蓉汁、黑椒汁、牛仔燒汁，可以隨意跟飯、意粉或薯條。分別在於鐵板餐上檯會有「炸炸炸」嘅聲音，熱度較高，比較似真係去西餐廳鋸扒，而精選套餐就無。

精選套餐有9款可以選擇，價格由$62起，有豬仔骨、龍脷柳、牛肋條、手工漢堡、雞扒、雜扒等，今次就選擇相撲肉眼牛扒配黑椒汁跟薯條$82加$3、烤焗穀飼豬鞍配蜜糖芥末醬跟意粉$92。呢個拉麵價嘅份量頗多，加上quality，真心抵食。肉眼扒係正常發揮，普普通通，只係唔韌，無乜特別，反而豬鞍真係幾有驚喜。

大大隻豬鞍好似斧頭炸髀嘅size，質感比肉眼扒更加軟腍同容易切開，豬鞍入口有慢煮感同煙燻過嘅味道，入口都係有肉汁，唔係乾柴感。點睛之筆係配搭唔同肉類嘅醬汁，牛扒配蒜醬，而豬鞍就配蜜糖芥末醬，入口酸酸甜甜，更加開胃，淨係選醬已經可以睇到大廚嘅功力。

全部套餐都包含餐湯、亦有咖啡或茶，另有低糖薏米水可擇，難得係就算簡單嘅羅宋湯、凍檸茶都絕不欺場。有幾可見到香港餐廳套餐配搭嘅羅宋湯嘅湯渣量有咁多？唔單止蔬菜量，連牛尾肉都咁多，有肉感嘅羅宋湯真係少之又少！而檸檬茶每杯有約3片檸檬，紅茶味適中，唔算好top，起碼合格。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受現金、八達通，但用現金付款就有95折優惠。外賣自取唔會額外加錢，外賣滿$500有9折。

❷ 人多需要先人手取票，再等候叫號碼入座。

❸ 早餐提供時間為07:00-11:25，西式同日式為主；下午茶提供時間為14:00-18:00，港式、西式為主；小食、沙律、鍋物、拉麵或烏冬提供時間為11:30-21:45；精選套餐、大滿足鐵板餐提供時間為11:30-21:45。

❹ 追加甜品加$18至28，包括有迷你雪糕窩夫、迷你芝士蛋糕、今川燒、迷你草莓蛋卷。