【澳門景點】百年歷史新中央酒店活化變復古場景！頂樓觀景台360度俯澳門舊城區、大三巴／議事亭／旅遊塔／新葡京一覽無遺！

澳門市區有唔少可以賞景嘅地方，例如係「澳門大三巴」旁邊嘅「大炮台」，又或者毗連「議事亭前地」嘅商場天台。今次E.A.Two前往一座有百年歷史嘅酒店，室內唔單止入面活化成復古場景，頂樓更有一個360度觀景台，可以拍拖兩個人前往。天台既將週邊舊城區風景盡收眼底﹐連遠處嘅景點都能一覽無遺！

位於澳門市區內嘅「新中央酒店」，毗連「議事亭前地」同「三街會館（關帝廟）」，唔單止酒店係澳門歷史城區，連週邊都有8大景點，比如「市政廳大樓」、「議事亭前地」、「仁慈堂大樓」、「主教座堂」、「大堂前地」、「玫瑰堂」、「板樟堂」、「盧家大屋」，呢一帶都係獲得聯合國教科文組織評為世界文化遺產嘅澳門歷史城區。

「新中央酒店」座落新馬路上，係一間有百年歷史嘅澳門酒店，樓高11層，當中有約114間房間。酒店經過活化，依然以懷舊為主題，裏裏外外復古味濃厚。據了解，酒店歷史可以追溯至1920年代。而「新中央酒店」內嘅歷史廊記錄，就寫有早期建築係來自總統酒店，樓高7層，當時擁有全澳門首座電動升降機，曾經係葡萄牙海外屬地最高第一摩天大樓。

酒店其實曾經為「泰興娛樂場」，亦經歷過抗日戰爭，後來於30年代更加建酒店至9層樓高。而踏入40年代之後，呢間酒店甚至加建至11層，當時再次成為澳門第一摩天大樓，記錄大概維持咗20年。

雖然曾經被荒廢，又經過歲月洗禮，但澳門好多建築物都依然保留原貌，呢啲先係能夠吸引遊客嘅地方。「新中央酒店」由外觀到大堂古樸地磚，以至瓷磚裝飾、牆身花紋，似乎都仍然好有歷史痕跡。酒店地下有「百年歷史穿越廊」，可以了解到澳門歷史，亦可以睇到間酒店嘅故事。而樓上5至10樓嘅酒店房間則分為唔同風格，5至6樓就係20年代風格﹐7至8樓係30年代，而9至10樓就係40年代嘅風格設計。

乘搭電梯登上天台「RF」層，就可以上到「歷史城區觀光走廊」，呢一層就係11層頂樓。細心留意會發現呢部電梯真係舊式造型，連上面顯示層數嘅指示都係鐘擺式，指針會標示當時樓層。推門出去，就可以踏入天台觀景台，可以繞一個圈走，然後360度觀賞澳門景色！天台頂層景觀遼闊，可環瞰天際線，亦可俯視世界文化選產歷史城區，都算係一個澳門歷史城區嘅絕佳視角。

天台觀光走廊的確可以從四面八方觀賞風景，無論企喺東南西北邊個方位，都可以無遮擋地俯視重要地標同景色，原來真係360度全無死角！而每一個方位都有一個墊高咗嘅矮台，企高少少就可以從更高點賞景，就算身高比較矮小嘅朋友都唔使怕。

甫踏出天台，馬上會先見到其中一面，「新葡京酒店」、「東望洋炮台」、「聖母雪地殿教堂」、「旅遊塔」馬上映入眼簾！而樓下歷史城區8大景點都能完全透視，包括「議事亭前地」、「仁慈堂大樓」、「市政廳大樓」、「玫瑰堂」、「板樟堂」。另外，連樓下嘅「澳門郵電局」全貌亦可以由上至下盡收眼底；而對面嘅全新商場「M8澳門八號」都可以見到，連商場天台同「仁慈堂」舊樓天台亦清晰可見，甚至恍如咫尺之間！

然後依順時針方向走，另一邊既可以欣賞黃昏日落，亦可以眺望「主教山」、「公務員宿舍」，而下方海景就係「內港」，海嘅另一端就係大陸範圍，即係珠海方向。再繼續前行，前端會見到「內港十六號碼頭」、「澳門十六浦索菲特酒店」，週邊風景都係一啲矮樓建築物。

隨後，下瞰會見到「青洲英泥廠」，週邊依然係一堆矮樓建築物，好多都係頗為殘舊。而從天台位置抬頭，會見到「新中央酒店」嘅巨型招牌。轉到最後一個方位，可以直視澳門最重要嘅地標「大三巴」、「大炮臺」，原來「大三巴」下面雖然全部都係矮樓，但背後就係一堆高樓建築。不過，週邊都係密密麻麻，同剛才另一邊嘅矮樓建築物一樣，都係好似一堆堆積木玩具。