復古商場近尖沙嘴重慶大廈！濕潤英式鬆餅花華慶方重開！與Peek-a-Poke招牌夏威夷丼飯相連！

尖沙嘴重慶大廈向來係一個聚集東南亞人嘅地方，一般本地人比較少會進入呢個殘殘舊舊嘅地方。而呢幢樓附近竟然有個表面簇新而入面賣復古風嘅商場。呢個商場入面有兩間小店相連，不妨拍拖兩個人去醫吓肚。有留意E.A.Two嘅讀者應該知道我哋亦曾經食過，當中包括夏威夷丼飯，重有一間由咖啡店變酒場嘅食肆，店內嘅英式鬆餅絕對令人難忘！

慶坊 health

樓高17至18層嘅「重慶大廈」座落尖沙嘴彌敦道內，多年嚟一直聚集少數族裔，最多就係東南亞人，比如印度人、尼泊爾人、巴基斯坦人、中東人、孟加拉人等等，其他地方旅客都有，但主要都係東南亞人。呢班少數族裔多數都喺樓上居住，因為呢度有唔少廉價賓館。而「重慶大廈」內，有唔少東南亞商店，例如係印度餐館，亦有方便旅客嘅找換店。

原先E.A.Two打算於「重慶大廈」內找尋一間叫「Paul’s Kitchen」嘅印度菜餐廳，但基於安全問題，決定中途放棄。有理由懷疑小店係位於樓上一層，而非入口一層，我哋無打算上樓，所以最後只係離開「重慶大廈」。

不過，有一個簇新小商場鄰近「重慶大廈」，該商場以「慶坊health」命名，由2022年起開業。要留意「重慶大廈旁邊的確有個叫「重慶坊」嘅商場，但就係一個遊客購物商場，而非餐廳為主。今次E.A.Two前往嘅係另一個以美食同紀念品為主嘅簇新商場，相對「重慶大廈」係比較安全。「慶坊」同「重慶大廈」僅有不足25米距離，徒步30秒即達，同樣位處尖沙嘴彌敦道上。

商場以灰色為主調設計，地庫內除咗近年經常見到嘅整排夾公仔機，不時會見到復古風格裝飾。最騎呢莫過於其中一個類似古董汽車嘅裝飾，前面竟然寫「此展品只供拍照用，請勿逗留」，然後前面重有一條安全封帶欄住兩個座位嘅汽車。事實上，架車背後有JR東日本招紙，又似一架廢鐵爛車，而且只有半架，就好似一架意外撞毀嘅車輛，假如隔離寫個標示「醉酒駕車，車毀人亡」，或者「不小心駕車，車禍影響一生」好似更加貼切。

商場有約40000平方呎，基本上只有地庫1層樓，行個圈就能夠睇晒，租戶以餐廳、紀念品、時裝店為主，重有以菲林沖曬、黑膠唱片為主嘅店舖。當中包括有美食廣場，亦有好受亞洲旅客歡迎嘅「蘭芳園」，雖則呢間餐廳並唔係我哋本地人去開嘅小店，但E.A.Two絕對尊重旅客決定。只不過呢個商場內，我哋喜愛嘅小店只有兩間。

Peek-A-Poke

其中一間係「Peek-A-Poke」，主打嘅係夏威夷丼飯，該店於銅鑼灣有分店，主食詳情可以留意E.A.Two之前嘅報道。今次前往「慶坊」時間較晏，所以就食個下午茶，下午茶供應時間為14:30至17:30，有限定迷你碗提供。

mini 風味碗比原價係平咗$10至$20，香菇素素$88、夏威夷風味$68、加州風味$68、吖嘻先生$68、輕營之選$68、慢煮雞胸$68，多數都有花生、堅果，今次就揀夏威夷風味、吖嘻先生，加上鮮榨果汁$8。就好似之前所講，呢款好有沖繩風格嘅夏威夷丼飯，就係低卡又高蛋白質嘅選擇。

夏威夷風味口味比較清淡，除咗有刺身級吞拿魚粒粒，亦有海帶芽、紫洋蔥、蟹子，重有鰹魚醬油，呢碗選擇咗白飯就更簡潔。吖嘻先生包含有吞拿魚、柴魚、枝豆、山葵，呢碗選擇咗醋米飯，加咗$15牛油果。雖然只係迷你碗，但基本上材料都依然豐富，色彩繽紛。碗內枝豆同菇比較大量﹐吞拿魚粒粒都係肥美新鮮。不過，呢隻山葵乳酪醬比較攻鼻，愈食愈刺激。

花華Hana

毗連「Peek-a-Poke」嘅「花華Hana」，原先位於馬鞍山，早於2019年就開業，但僅開業3年就結束營業。現時，「花華」選址尖沙嘴「慶坊」地庫重開，室內外都係比較昏暗，帶有懷舊感。之前雖然係以咖啡店為主，但目前就改以酒場為主打，主要係賣酒，而唔係咖啡。

E.A.Two原先對「花華」印象深刻嘅原因並唔係咖啡，而係店內嘅英式鬆餅，即係Scone！當時於馬鞍山店品嚐其自家製鬆餅，實在令人難忘，無耐之後結業實在可惜，估唔到而家依然能夠保持當時嘅水準。

現時，「花華」賣點稍有不同，主要賣酒同佐酒小食，最多都係手工意粉$138至$158，而套餐要加$80至$100，價格唔平。另外，意粉有4款口味，包括卡邦尼、紅油雞潤或豬、白油蒜香、鮑魚蘋果韓式辣醬可以選擇。店內唔單止有homemade tiramisu $68，唔少得就係英式鬆餅hana scone，價格上頗為fair，堂食$35，外賣$28，另外買支咖啡$55，外賣同堂食唔同價。

店內嘅招牌Hana Scone依然係無花果英式鬆餅，可以請店員烘熱或者返去自行烘熱。呢件英式鬆餅size唔小，入面有配搭cream同果醬，不過E.A.Two覺得店內鬆餅最神奇嘅係，就算唔蘸嘢，一樣可以一啖又一啖食晒成件鬆餅！

由常溫烘返熱嘅英式鬆餅，表面係比較硬身，有微脆感，而入面質感係鬆軟，帶有蓬鬆感，有少少煙韌。鬆餅整體唔會好乾身，反而係帶有濕潤感，而入口又唔會太多水份，有啲黏身，但又唔會黏牙。