全港最平靚正木屋拉麵隱身青衣屋邨！半個月換湯底、人均僅$XX！

香港人好少對餐廳給予正面評價，一間無批評嘅食店其實已經代表值得拍拖兩個人前往嘅餐廳。當中，最難獲得好評嘅莫過於拉麵店，今次E.A.Two就前往於2025年初重開嘅拉麵店，一直隱身於青衣屋邨內，可以話全港最平靚正嘅拉麵，經常開門前就出現人龍！

E.A.Two曾經前往青衣長康邨內嘅長康市集，但當時就遇上「木屋小食店」落閘，只係食過隔離嘅小食店「主廚小食」。事隔幾年，再前往青衣一帶，發現長康市集已經無咗，而「木屋小食店」就搬出街市，搖身變成一間屋邨入面人氣十足嘅小型拉麵店。小店其實早於2015年開業，曾經因長康市集關門而結業，但於2025年初就於屋邨內重開。

該店以「木屋ラーメン」命名，又叫「木屋小食店」或「木屋拉麵」，現時以拉麵為主，基本上只有兩款拉麵可以選擇，包括慢寫叉燒拉麵、慢煮鴨胸拉麵，但都有油麵或撈麵$55、滷肉飯$45可擇，而一碗拉麵就只係$55，都算係全港最平價拉麵店！每一碗拉麵寫明有3至4塊肉、半飯蛋、蔥、筍絲，追加配料每款都係加$10。另外，重有小食玉子燒$20，加麵要$15，而加白飯就免費。

由區外前往青衣「木屋拉麵」，即係以青衣長康邨為目的地。比如荃灣出發，只需乘搭巴士路線43B；而九龍出發，則只需乘搭241X或42C，全部都係去到長康邨康盛樓，落車後徒步2分鐘就會到達。有啲平台會教大家搭地鐵去到青衣站，再轉乘小巴路線249M，但只係去到康富樓，唔係康盛樓，而且就係複雜同唔方便。反而，巴士唔單止一程過就可以到達，而且30分鐘足以去到青衣長康邨。

如果想去「木屋拉麵」，首先要了解營業日期，必定要事前上官方平台睇當月嘅營業日子，除咗星期日唔開，都要睇有無休息日子。其次，需要留意嘅係營業時間，比如中午12點同傍晚6點開門，午市營業時間較長，晚市營業時間就較短，只有2小時。該店只有堂食，並無外賣供應，每日開門前15分鐘，都會出現一條人龍，不過人數都算係可接受範圍。

開門後，整條人龍轉瞬就入晒店內坐低，室內座位唔算少，有正常檯櫈，亦有吧檯櫈。以當日星期六晚市計算，1小時內店主大概做咗23碗拉麵。而晚市製作嘅拉麵量都有限，講明只係做到80碗，以呢個人數量嚟講，正常都係食到嘅。該店人氣幾強，一隅牆上有唔少人嘅留言同即影即有，可見受到青衣區內客人歡迎。難怪被稱為大癲拉麵同親民拉麵，果然係全港最抵食同平靚正嘅拉麵！

店內只有兩款拉麵可以選擇，湯底每半個月就會轉一次，前半個月就係煮干魚乾湯，後半個月就係乾貝湯，即係元貝湯。當日係元貝湯，兩個人去就當然點晒兩款拉麵。兩款拉麵其實只係肉唔一樣，一款配叉燒，另一款配鴨胸，其餘都係無異。無論係叉燒定鴨胸，都係薄切，呈粉嫩色，肉質軟腍，完全唔乾柴，柔軟而不臊，的確似慢煮質感。叉燒唔係太似五花腩，反而好似有啲似脢頭肉，脂肪分佈幾均勻。

坐於吧檯旁邊，會留意到好多細節，拉麵碗一直擺放喺keep hot嘅水盆度，店主將拉麵碗拎於嚟嘅時候，隻碗係出煙。據悉，正式拉麵碗本身係需要維持50度溫度。麵條係偏幼同直身，爽滑彈牙，灼嘅時間適中，從吧檯會見到零零丁丁係1分04秒，時間控制得好好。

湯底唔係稠身，而係湯汁liquid薄身狀態，溫暖順喉，入口清甜，有鮮甜感，加上感覺係混合醬油同魚油嘅湯底。但同平時啲拉麵湯底唔同，唔會好鹹或油膩，比坊間係偏淡身，飲埋都唔會口渴，幾適合一家大細前往。拉麵配料都唔輸蝕，溏心蛋係流心，亦有蛋香，除咗絲絲蔥絲，最難得係有好多竹筍絲，數量同平時坊間拉麵店唔同。