《米芝蓮》級點心粵菜逸東軒隱身九龍平價酒店！香港逸東酒店豈止普慶餐廳？逸東軒儀式感極重適宜情侶紀念日！

九龍區值得支持嘅小店唔多，「香港逸東酒店」就係少有嘅香港人酒店，E.A.Two曾經多次前往該酒店嘅「普慶餐廳」食自助餐，今次終於前往該酒店另一間餐廳。該店既係知名《米芝蓮》餐廳，亦係一間主打中式粵菜點心嘅食肆，儀式感極重，適宜拍拖兩個人慶祝情侶紀念日或生日！

「香港逸東酒店」位置靠近佐敦區，入住價格本身都唔係好高，同尖沙嘴市區相比，係平價酒店。「普慶餐廳」向來係CP值唔低嘅自助餐，以親民價錢為主，人均價格低廉，都係標準自助餐廳，間中會有少少驚喜。而以下呢間中式粵菜餐廳「逸東軒」，於1990年已經開業，以點心為主打，以及中式小菜，由2017年至2025年已連續多年獲得《米芝蓮指南》推薦，獲得星級肯定。

午市套餐基本上有兩款，一款$398，另一款$498，都係包含茶芥費用、汽水、橙汁或指定啤酒一杯。套餐係兩位起，如果兩款套餐都想試，就一定要3位或以上。套餐好有儀式感，適合拍拖兩個人去，尤其係情侶紀念日，同時適合初次約會去，因為全部都係每人一份，分開上檯，可以好斯文好elegant咁食。

如果平時想食平少少，可以散叫，茶芥唔係茶盅，而係一壺茶上檯，而且係一籠籠點心咁上檯。若然食量唔多，建議散叫點心，因為套餐真係會食得幾飽肚。套餐入面已包含餐廳受歡迎嘅點心、燒味，重有老火湯、小菜。

今次E.A.Two選擇咗其中一款午市套餐，人均$398，本身有包茶芥，但我哋就點咗特別嘅茶盅上嘅茶，費用就較高，人均再加$65。本身茗茶只係$28，有普洱、壽眉、鐵觀音、菊花、香片、龍井；而特級茗茶就有人參烏龍茶、上頂珍藏舊普洱、特級牡丹王、雀舌龍井、頂級雀舌香片、清香鐵觀音、正山荔枝紅茶、玫瑰白毫牡丹。今次選擇嘅人參烏龍茶好清甜，有回甘味，符合餐牌所寫嘅清香撲鼻，口味甘醇，舌底生津，降低壓力同焦慮；而頂級雀舌香片同樣符合餐牌寫嘅有顯著花香，調節血液循環，抗衰老。

至於另一款$498套餐，就改為筍尖鮮蝦餃、帶子蒸燒賣、婆參帶子餃、麻香手撕雞、蜜汁叉燒、話梅車厘茄、原隻鮑魚蟹肉灌湯餃、二弄玻璃蝦球、瑤柱花菇扒時蔬、海參花膠絲炆伊麵、香芒糯米卷伴千層棗皇糕。季節限定有蟹三寶，包括6兩清蒸江蘇大閘蟹、生拆蟹粉小籠包1件、生拆蟹粉生煎包1件，配搭牡丹麗春黃酒190ml，原價$770，會員價$498。至於小菜，逐個點就都係貴，例如蜜餞脆鱔$248、脆皮逸東烤鴨二食$888一隻、明爐蜜汁叉燒$318、花膠鮮杏汁燉白肺$198。

如果唔叫套餐，可以要散叫點心，價格由$62至$118不等，例如蠔皇叉燒包$62、逸東小籠包$72、大澳蝦醬蒸鮮魷$68、香麻叉燒酥$72、酥皮叉燒焗餐包$72、原個馬拉糕$62、海皇芝士千絲酥$72、金沙脆豆腐$118、脆皮馬友鹹魚肉餅$98、原隻鮑魚和牛酥$98、古法燉佛跳牆$428，原隻鮑魚蟹肉灌湯餃$108等等，而一品點心拼盤$108就有龍蝦燒賣、筍尖鮮蝦餃、瑤柱菜苗餃。

江南美點包括逸東小籠包、帶子蒸燒賣、瑤柱菜苗餃，逸東叁錦碟就包含蒜泥燻蹄、蜜汁叉燒、芥末雲耳海蜇頭。叉燒似係脢頭肉，又有啲似豬肩肉，份量唔多，只係得兩大塊，邊位有燶邊，肉就係一半瘦一半肥，表面有少少蜜味焦香，略有油脂，肉質都係軟嫩。小籠包同帶子燒賣、菜苗餃放喺同一個特製竹籠入面，小籠包皮薄餡靚，入面有頗多湯汁，用羹盛載就唔需要怕湯汁流失，女士們就算分兩三啖食，都可以飲晒小籠包內嘅湯汁。帶子燒賣就係下面係豬肉燒賣，中間餡料加上一隻蝦肉，頂端再加上一塊帶子，同一般燒賣比的確係較高貴，有鮮甜味同彈牙感。至於瑤柱菜苗餃，望落通透翠綠，同樣係餃皮好薄，但餡料就塞滿菜苗餡，瑤柱唔多，入口唔會成口粉皮，菜鮮甜味更重，幾精緻。

保健老火湯每日都有唔同，由星期一至日順序計，分別有五指毛桃茨實薏米煲西施骨、豬橫脷生魚煲雞骨草、玉竹茨實老黃瓜煲豬展、章魚蠔豉蓮藕煲豬脊骨、南北杏陳腎西洋菜煲豬腱、淮杞響螺煲萬壽果、赤小豆粉葛鯪魚煲西施骨，單點每位$138，4至6位用就係$380。今次星期六前往，就係淮山杞子響螺煲萬壽果，有效滋陰、養顏。湯底鮮甜，每盅都有齊幾款材料，分佈均勻，有肉片、淮山、螺肉、木瓜等。

其餘菜式有乳香斑球伴富貴蝦丸、花菇扒時蔬、揚州炒飯，而甜品則有杞子桂花糕伴千層棗皇糕。當日冇斑球，就變咗魚，但我哋反而更加歡喜，魚肉鮮嫩，醬汁添上酸甜味，而蝦丸就質感彈牙。另一碟係一件冬菇加幾條大白菜，比較特別係挑選菜頭部份，芡汁就似平時中菜。而炒飯就相對平平無奇，只係都係標準炒功，粒粒分明，入面有瑤柱、鮮蝦，重有草菇、雞肉、菜莖等，整體都可以飽肚。杞子桂花糕、千層棗皇糕就似平時中式酒樓嘅點心，前者較清甜，質感通透；後者就煙韌，入口香甜。

套餐餐點全以人數計算，就好似西餐一樣，每人會有一份，各自上檯，而唔係平時中式酒樓嘅圍餐。如果情侶想浪漫啲，可以唔選擇散叫點心，反而揀套餐，儀式感會更重，只係價錢高少少。雖然「逸東軒」同一般中式酒樓一樣要收加一服務費，但就絕對係超值，因為真係有服務！由一開波入座開始，店員已為客人鋪上餐巾。其後，若點茶盅，第一杯茶會由店員為大家倒茶，其後店員都有為客人倒茶。往該酒店中式酒樓飲茶，彷佛重回舊時餐廳服務一樣，起碼香港價係食到香港服務，而非香港價食劣質服務。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、AE、銀聯。

❷ 店內有酒精飲品，但自帶酒水、切餅費、VIP房就要另外收費，店內有收加一服務費。

❸ 座位數目有約336，最好都係事前預訂座位，確保有位，無論午市定晚市都要預訂。

❹ 酒店車位唔多，就只有地下一隅見到嘅空間，所以預訂時就要查詢有無得泊車。