屯門冠軍級咖啡店隱啡佐敦設外賣店！熱飲有靚拉花、凍飲杯可循環再用！

唔少人都鍾意拍拖兩個人週末假期去咖啡店chill吓，大多數都係可以坐低飲咖啡。屯門有間頗具人氣嘅冠軍級咖啡店，最近於九龍區佐敦開設分店，唔需要山長水遠走入大西北都可以飲到冠軍級咖啡，竟然只限外賣！

屯門「隱啡」曾經於全球大型咖啡烘焙比賽「IGCA國際金牌咖啡大賽水洗組2005」獲得冠軍，亦於另一比賽「金豆杯Golden Bean」中入圍三甲，更被2023及2021美國咖啡評鑑Outstanding高分，亦於澳洲國際烘焙大賽獲得銀獎及銅獎，搖身成為該區嘅冠軍級咖啡店。近期，該店殺出屯門，於九龍區設分店，並選址近廟街一帶嘅佐敦區吳松街。門面以藍色鐵閘包圍，配合返呢個舊區。不過，呢間咖啡小店就並無堂食提供，只有外賣咖啡服務。

咖啡有熱飲同凍飲可以選擇，熱飲就以紙杯盛載，同一般外賣咖啡無異，而凍飲就特別選用一款鋁製外賣杯，唔單止可以更加保留咖啡味，店員更特別提到呢個咖啡杯可以清洗同循環再用！另外，店內亦有售賣鬆餅同蛋糕，例如伯爵茶味鬆餅$28、咖啡焦糖味鬆餅$35、Brownie$28、3款口味磅蛋糕$35至$38，重有2款巴斯克蛋糕。

除咗有典型黑白咖啡，亦有特調咖啡同茶。最特別嘅係特調黑咖啡$48、暗黑系牛奶咖啡$45、鮮橙朱古力牛奶咖啡$48、青瓜鮮奶咖啡$45、有汽檸檬咖啡$45，今次就挑選一杯暗黑系Latte、鮮橙Mocha。呢杯Latte被染成黑色，熱飲有靚靚拉花，原來所謂暗黑就係食品級竹炭，而Mocha就加入香橙片。

更特別之處，雖然咖啡同一般黑白咖啡差唔多價錢，但都可以自由選擇咖啡豆，包含有兩款咖啡豆，包括Ethiopia Guji Dasaya G1，以及該店嘅香港自家拼配咖啡豆，前者包含士多啤梨、藍莓、酒、伯爵茶，後者就係巴西咖啡豆、哥倫比亞咖啡豆、守都拉斯咖啡豆，包含堅果、芝麻、黑朱古力、紅茶等。簡單嚟講，就係果香同堅果香類別嘅咖啡豆，無論揀邊款都唔需要額外加錢。

於Nutty與Fruity之間選擇，個人始終都係偏好Fruity嘅咖啡豆，酸味較重，帶有果香甜味，苦澀味較輕。Goth Latte就係所謂暗黑系咖啡，以竹炭變成牛奶咖啡，味道獨特，好似更香醇，聽聞竹炭可以促進排毒。鮮橙Mocha就好似橙味朱古力，賣相幾靚，係一片橙乾，橙味幾濃，更容易將朱古力甜味帶出，唔會有苦味，就算係凍飲都無沖淡咖啡味。