南昌V City對面有分店！餃里8款餃子任揀湯餃／煎餃／3款湯水、最平$42！

香港有唔少餃子店可以選擇，適合經濟型情侶拍拖兩個人用餐，E.A.Two就曾經食過「好味餃子店」、「甜記餃子」，今次就前往「餃里」，尚餘一間「有得餃」未食過，而呢幾間餃子店都係快靚正又經濟實惠嘅選擇。

「餃里」至今已有8年歷史，由屯門海趣坊、屯門建生、元朗 YOHOPLUS起，開到藍田德田、南昌富昌、紅磡黃埔，以至香港仔、北角炮台山、筲箕灣愛蝶灣都設有分店。

餃子有8款口味，可以要6隻或9隻，有湯餃或煎餃，亦有拼餃$54，學生著校服有套餐$47，連6隻餃加湯麵加飲品，真係幾抵食。餃子有8款，椰菜鮮肉餃、韭菜鮮肉餃、白菜鮮肉餃6隻都係$42，9隻就係$52，而紫菜鮮肉餃、香荽鮮肉餃、芝士粟米鮮肉餃、泡菜鮮肉餃、清新素餃就分別係$47同$57，加$9有上海麵或米線，再加$10有豆漿或無糖豆漿。

該店餃子形狀適中，包得幾靚，全部都係鮮肉餃，只係配搭唔同蔬菜，菜同肉嘅比例就好似6比4。聽聞紫菜鮮肉餃係最高人氣。今次選擇香荽同芝士粟米，芫荽味清香，芝士粟米就好香濃，粟米就中和返芝士膩感。餃子有配搭餃子醋，不過我哋覺得唔需要蘸醋，蘸咗反而重好似破壞咗餃子味。

湯底有3款，包括住家蕃茄薯仔肉碎湯、消暑冬瓜瑤柱肉碎湯、養顏無花果栗子腰果素湯，餃子重有秘製辣菜脯附送。蕃茄薯仔肉碎湯就係比較受歡迎嘅選擇，今次就選擇另外兩款湯水，配搭上海麵同餃子都係幾配合。冬瓜瑤柱肉碎湯就係比較清淡，但瑤柱碎量就唔少，而無花果栗子腰果素湯就較有香甜味，因為有栗子、紅蘿蔔同粟米，都你基本家庭湯水常見材料。素湯好處係適合茹素者，亦無五辛，湯水唔會有大蒜、小蒜、蔥、韭菜、興蕖，素食者適宜。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、八達通、Apple Pay。

❷ 該店於全港多區都有分店，包括屯門海趣坊店、屯門建生店、元朗 YOHOPLUS店、藍田德田店、南昌富昌店、紅磡黃埔店、香港仔店、北角炮台山店、筲箕灣愛蝶灣店。

❸ 大多數得外賣提供，但有少數有啲堂食座位。

❹ 學生有優惠，著校服會較平。