即睇Tips！灣仔長期排隊店新景園咖哩小廚！馳名中外最高人氣咖喱豬扒飯／乾炒牛河水準如何？

講到灣仔區最具人氣嘅餐廳，絕對不得不提拒絕藝人譚詠麟直入嘅「新景園咖喱小廚」。該店多年來每日都係大排長龍，無論午市定晚市，開舖前就已經有一條長長人龍，想要拍拖兩個人隨時去食真係天荒夜潭。該店唔單止受本地人歡迎，連中西遊客都慕名而至，到底有咩招牌作，值唔值得專程去食呢？

「新景園咖喱小廚」主打嘅固然係咖喱飯，全部都係$108，包括咖哩豬扒飯、咖哩雞飯、咖哩牛腩飯、咖哩牛肉飯、咖哩魚柳飯、咖哩海鮮飯、咖哩雞絲飯、咖哩雜菜飯、咖哩雞球飯、馬來亞炒飯、星洲炒米、炒貴刁。有部份套餐係$123，包含老火靚湯、灼時菜、白飯，當中有椒鹽炸豬扒、生炒排骨、荷香蒸滑雞、辣蝦茄子煲、沙嗲魚柳煲、豆豉雞球煲、鮮蝦仁炒蛋，重有椒鹽鮮魷$130、蝦醬蒸豬肉$108、家鄉蒸豆腐$95。

午市同外賣其他菜式都係炒粉麵飯，例如鮮茄豬扒飯、粟米魚柳飯、咖哩牛肉飯、梅菜蒸肉餅飯等，每份$62，加老火湯就需$12。不過，部份係只限外賣，堂食未有提供；相反，堂食就有啲外賣唔提供嘅選擇，例如河粉係會堂食優先，比如乾炒牛河。

平時經過該店，唔難發現門口營業時長期都出現排隊人龍，而條人龍通常都係絕望嘅程度。今次E.A.Two於傍晚經過，竟然遇上千年一遇嘅情況！時間係傍晚約6點，時間係開店前30分鐘。而門口排隊人龍唔算多，大概得十個左右，唔多過20個，而且前面突然有兩三個放棄走咗。呢個情況下真係少之又少，所以臨時決定一嘗呢間人氣咖喱店。下次再遇到呢個情況，可能係1000年之後。

講到最高人氣嘅選擇，同招牌無異，就係咖喱豬扒飯、乾炒牛河。眾所週知，該店一直以招牌咖喱飯、乾炒牛河為主，街知巷聞程度就係唔單止受本地人歡迎，而外地遊客都會慕名而至。以當日為例，E.A.Two同檯搭檯客人就係一對韓籍母女，佢哋排隊時已經用英文詢問有無咖喱豬扒同乾炒牛河。

店內咖喱會先上檯，因為豬扒需要即叫即炸，而牛河亦需要較遲上檯，所以建議同時點套餐，先飲個例湯暖暖身。套餐有菜芯同老火湯，當日係雪耳雞腳湯，一碗湯入面雪耳都幾大嚿，飲完湯豬扒飯就剛好上檯。

咖喱汁果然好獨特，並非一般人可以調出嚟，咖喱偏辛辣，而辣度都頗高，但就唔係死辣，係有層次，嚿薯仔軟腍又入味，醬汁入面好似有啲薑味，質感係稠身。咖喱配搭炸豬扒真係好配合，撈飯食就剛好，中和返辣度。而炸豬扒完全平鋪大碟白飯之上，份量大得令人難以置信，每份真係堅飽肚，都算對得全過百蚊嘅價位。

炸豬扒評價上，真係要給予好高分，唔單止表面酥脆可口，入面亦鬆軟無比，唔會有乾柴感，有啲肉汁，而且有醃製過，再配搭咖喱汁就更有層次，而且更開胃。炸豬扒入口好鬆化，甚至有啲會融化嘅口感，一定要熱焫焫食，今次刻意留返一兩嚿最後食，發現炸豬扒凍咗真係比較遜色，油膩感較重，而且食埋就好滯。

至於乾炒牛河，雖則同樣係高人氣，但食落真係no comment，因為無乜特別同驚喜，就係一個乾炒牛河，平常一般餐廳都會食到嘅水準。河粉都算乾身，唔算太油膩，但唔夠滑溜，有少少硬身，亦好似唔夠大排檔咁有鑊氣同火喉。而最大疑惑嘅地方，係乾炒牛河內牛肉片並唔算多，反而唔知點解呢碟入面好似混入咗豬肉，而質感就似柳脢。

事實上，「新景園」香港灣仔春園街店早於1979年已經開業，近年甚至衝出香港，於英國曼城Manchester開設分店，適合已經移民英國嘅香港人。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式只接受現金，今次加埋大概係$237，但幾多錢都要畀現金。

❷ 一定要提早排隊，基本上只做3轉，開門前30分鐘就會比較穩陣。

❸ 午市只限11:30-15:00供應，夜晚就由18:30-20:30，得2個鐘時間。

❹ 外賣選擇有限，咖哩豬扒同乾炒牛河都係唔適宜外賣，而河粉亦係堂食優先，外賣未必有得食。