串噹噹宵夜店與平記茶餐廳合拼！每人送一隻藤椒鮑魚！大排檔小菜有鑊氣、本地僅存小店賣脆炸臭豆腐！

近年，香港結業潮湧現，唔少餐廳為求生存落去都想盡辦法。E.A.Two最近前往紅磡一間串燒店，覺得好適宜拍拖兩個人去食宵夜。同時發現該店目前已經同另一間茶餐廳合併，朝早至下午賣茶記菜式，夜晚就繼續賣大排檔菜式。雖然呢個合作方法好聰明，完全慳成本，但就有啲擔心佢哋可唔可以再捱得住。

位於紅磡嘅「串噹噹」，一直係區內一間知名串燒宵夜店，近月就與同區嘅茶餐廳「平記咖啡冰室」二合為一，同一個舖位做晒兩間舖。本身「平記」多數係做早餐同午餐生意，而「串噹噹」主要就係做夜晚同宵夜生意。

據悉，兩間店舖於今年2月已經合拼。未知係咪因為剛剛合併餐廳，現時入座每人會送一隻藤椒鮑魚，不過就唔知做到幾時啦。藤椒魚皮就食得多，其實藤椒配搭其他小食都應該係無得輸，因為嗰種香辣辛香味重，非常開胃，而鮑魚都頗新鮮，冰鎮鮑魚凍食就似前菜一樣。

本身E.A.Two最鍾意嘅就係「串噹噹」醃製後再生燒嘅串燒，肉汁濃郁又惹味，可惜目前合拼之後已經無咗串燒供應。據悉，該店現時地方有限，所以未能擺放燒烤爐，希望遲啲佢可以做得返串燒啦！而晚市套餐基本上都係清一色$88左右，都係中式小菜配無味精湯水同白飯，湯水都係紅蘿蔔粟米嘅家庭式湯水。小菜有麻婆豆腐、蝦米粉絲雜菜、蒜香骨、糖醋一字骨、萵筍炒豬頸肉、薯仔炆雞、剁椒蒸黃花魚、香芹雲耳川爆鮮魷、豉椒鵝腸等等，其中萵筍炒豬頸肉份量適中，炒得幾有鑊氣，肉質軟嫩，萵筍爽脆。

另外，亦可以單點小菜，多數價錢都係$88至$108，少數如避風塘軟殼蟹先會貴啲去到$198，其他有黃金蝦球、蒜子上湯娃娃菜、蜜椒薯仔牛柳粒、蔥爆牛肉、麻辣雞煲、啫啫雞煲、生炸乳鴿、湖南小炒、椒鹽鮮魷、椒鹽九肚魚等等，係鮮椒大魚頭比貴啲，$198半個、$298一個。大排檔點餐當然係點一啲平時好少整到嘅菜式，可惜當日無椒鹽九肚魚，所以改為椒鹽鮮魷。份量尚算適中，好似唔夠喉，魷魚入面軟嫩，出面薄脆，有避風塘感覺。其實最意外嘅係魷魚底下嘅炸蒜粒，炸到好似薯片碎。

話明大排檔模式，固然有唔少炒粉麵飯，但E.A.Two最鍾意嘅反而係小食同串燒，現時該店合拼之後，雖然已經無咗串燒可以選擇，低好彩重有小食。小食有避風塘燒賣$58、秘汁煎黑豚肉$78、泡椒豬手$78、鐵皮奇遇醉雞花螺$118等等，雖然麻辣白魚蛋係寫明招牌$28，但我哋最鍾意嘅係店內嘅臭豆腐$48。喺香港食到好食嘅臭豆腐嘅機會已經少之又少，因為已經好少人會用死蝦醃到好臭嘅豆腐，平時食完啲蝦嘅蝦殼擺屋企垃圾桶兩日都臭到冤，豆腐又要發酵好耐，香港咁細重有幾多人會做呢？呢間已經係香港僅存合格以上嘅臭豆腐，外表有一個個窿，一啖入口清脆，外脆內軟，自由蘸甜醬或辣醬。