鴨脷洲大街人氣街坊海鮮餐廳！美美小廚近海得食蒸魚原條上！員工餐大隻龍蝦湯麵一般人有無得食？

鴨脷洲座落香港島南端，向來都係近海，對岸就係出名食艇仔粉嘅香港仔，咁鴨脷洲有無同水上人有關嘅菜式呢？拍拖兩個人去鴨脷洲嘅時候，不妨前往以下呢間靠水食水嘅海邊海鮮餐廳，一般人竟然都有得食員工餐？

該店位於最知名嘅鴨脷洲大街，由朝早六七點開始營業，到下晝3點就已經閂門，假期甚至唔會營業。唔單止一向係街坊餐廳，近年甚至多咗街外客前往一試，人流唔少，現場都有好多客人，好多食材亦好快賣晒。前電台主持阮小儀介紹過之後，慕名前往嘅人就更多，睇嚟係一間唔需要擔心結業嘅小店。

店內有午餐，亦有有員工餐，都係香港水上人風味，據悉老細本身都係來自於漁民家庭。雖則叫員工餐，但其實一般食客都係可以選擇。簡單嚟講，所謂嘅員工餐就係海鮮餐，選擇有龍蝦、琵琶蝦、戰車、瀨尿蝦、跳跳螺、扇貝、蝴蝶貝、哈哈螺、象拔蚌、青口等，多數都係$98至$128，龍蝦就有分5個價錢，由$308至$398不等，聽聞有啲需要前一晚預訂先有得食。不過，當日E.A.Two前往就已經無晒龍蝦，畀早一步入場嘅隔離檯點埋最後嘅龍蝦，同隻龍蝦緣慳一面，呢啲咪黑仔囉。

除咗生猛海鮮大餐，午餐其實都有9款可擇。每日一樣有唔同蒸魚餐，例如最受歡迎嘅自家製海鮮原條一夜情馬友$208。當日午餐有鹹鮮尖咀惑$138、冬菜蒸竹簽$98、榨菜蒸牙帶$128、黃豆醬南油雞魚$268，其餘選擇重有蘿蔔牛筋腩飯、牛脷煎蛋飯。每份午餐本身會附有無味精例湯，當日係霸王花豬骨湯，一小碗湯啲湯渣超多，大部份都係湯渣，湯水量其實唔多，湯水感覺比較鹹，鹽量都唔少。如果鍾意食埋湯渣就好抵飲，唔鍾意可以試吓叫佢走湯渣，得唔得就唔知啦。

今次選擇鹹鮮尖咀惑，蒸魚需要時間，即叫即蒸，比其他選擇等得較耐，條魚係原條上檯，再配搭白飯。蒸魚時間控制得剛剛好，魚肉唔會黐住條魚骨，魚質係有啲紮實，但都係嫩滑程度，鮮魚質感，魚肉本身滲出鹹味，而條魚夠新鮮，所以都好有鮮味。E.A.Two比較欣賞嘅地方係該店將薑磨成蓉，用薑蓉比用薑絲花功夫，而薑蓉既同樣可以辟腥味，亦都比較出味。

該店招牌上面唔單止寫住海鮮，亦有寫名泡飯，所以E.A.Two直覺呢款都係可以一試嘅選擇。魚湯泡飯選擇都唔少，有鮮海魚魚湯泡飯，有花膠竹笙$88、蠔仔肉碎$70、竹笙雜錦海鮮$75等等。泡飯內嘅魚湯都好鮮甜，感覺比剛才嘅例湯無咁鹹。魚湯係奶白色，應該係有落鑊煎魚之後，再喺同一隻鑊灒水煲成魚湯，係有魚味。而泡飯配料真係好多，每一啖都係湯飯同配料，唔會食食吓就無晒。