長沙灣區內有唔少隱藏美食，雖然夾於荔枝角與深水埗之間，但食物水準同價錢都係令人有驚喜，值得拍拖兩個人逐間嘗試。當中，有一間上年先開業嘅西餐廳，狀似Cafe，但又唔似傳統西餐廳，門面極細，亦只有年輕老闆一腳踢，但食物卻意外地有水準！
於上年中開業嘅小店「Take Eat Easy」，選址長沙灣天悅廣場下，無特別做宣傳稿，老闆只係個年輕人，一直低調煮食。店內亦只有一個人忙來忙去，點餐、收錢、煮食、上菜、出餐都係一腳踢，你以為人少就做唔到好嘢？但事實上，水準係同人數不成正比，店內食物甚有水準。
小店特別為外賣人士推出限時優惠外賣套餐，包括有意粉、墨西哥卷、薄餅，套餐有是日餐湯、罐裝飲品，當中Pizza係自家製作。而慢煮雞肉墨西哥卷$50 旁邊有沙律菜作拌碟，以墨西哥卷餅打造，一份超厚實，捲起粗過兩個廁紙筒。
墨西哥卷切成兩半，內餡極飽滿，感覺健康，既有紅椒、黃椒、洋蔥等蔬菜，材料上極大方！其中一個選擇就亦以慢煮雞肉作餡，片片無骨雞髀肉躲藏墨西哥卷內。
若雞肉以慢煮方式炮製，即係採取低溫煮食，令肉質較嫩滑，保持肉汁同鮮味，亦有香口感覺，有別於快餐店嘅煮食方式。墨西哥卷烘得微脆，就似印度薄餅，卷內亦有秘製辣汁，只係略帶辛辣味，唔會好辣，與墨西哥卷同慢煮雞肉非常配合。
而傳統意大利蒜香意粉$50 可配煙三文魚或薑蔥慢煮白立魚，似乎無乜特別，但其實先考功夫。意粉內有紫洋蔥、蒜片，意粉炒得香口，質感爽滑彈牙，條條分明，唔會黏住，入口僅黏有微微蒜香味，唔會好膩。
而薑蔥慢煮白立魚塊亦大大塊平舖意粉表面，份量十足。魚皮煎得香口，只係薑蔥味唔重，但魚肉經過慢煮之後，的確係比較軟嫩，魚肉質感軟嫩，片片魚肉清晰可見。
餐湯原來每次都有唔同款式，編輯只嘗試過忌廉湯、南瓜湯，前者內有洋蔥，色調偏淡黃，似乎重有薯仔蓉；後者則有濃郁南瓜蓉，色調偏橙紅，南瓜味明顯，若然更細心嘅話，會發現南瓜湯內未完全攪碎的南瓜肉顆粒。兩款餐湯質感Creamy，順滑可口。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 只接受現金付款，無其他電子支付方式。
❸ 可以選攝Whatsapp落單，再外賣自取。
Take Eat Easy
長沙灣元州街162-188號天悅廣場地下CB1號舖
星期一12:00 – 22:00；星期二全日休息；星期三至日12:00 – 22:00
5118 2062
