灣仔唐樓樓上舖懷舊味濃古早味台式老屋炮製極高水準鳥龍茶燻雞

灣仔一帶貌似無乜好嘢食，但其實美食係一直躲藏身邊，市中心一幢唐樓內就有一間復古味濃厚嘅餐廳，以地道台灣菜為主打，古早味亦濃，由上樓期間到室內都係影相嘅好地方，而食物更加有台灣味，以烏龍茶燻雞最出色，值得拍拖兩個人去試試。

餐廳位處一幢唐樓嘅轉角處，步行上樓梯時，從油漆、鐵閘都會發現呢道樓梯充滿懷舊感，有如香港60年代嘅感覺。攀上兩層樓，轉多兩個彎，就會到達呢間由2016年已經開業嘅台灣菜餐廳，室內裝潢陳設用心，燈光昏黃，擺放咗唔少舊式傢俱，古物眾多，令一室復古味濃厚，狀似《花樣年華》，充滿電影感，恍如時空穿梭返回舊時代。

到底店舖點解會有「1963」呢個數字呢？翻查一下資料，原來店舖身處嘅店樓正正係於1963年建成。至於「木十豆寸」又點解好似九唔搭八咁呢？事實上，呢四個字合起嚟就係一個「樹」字，因為唐樓旁邊有一棵樹。原來灣仔呢間「1963 木十豆寸」，同觀塘「小時光」係姊妹店，同樣以台灣料理為主打。

午市套餐會比較平，晚市就只有幾款幾百蚊嘅套餐，但當中最平嘅$200有找，當中「木」套餐$199 嘅餐點就似西餐方式，包括前菜、湯料、主菜、配菜、飲品。當中，前菜有百香果木瓜、古早味菜脯、醃漬蕃茄，青木瓜燉排骨湯、主菜宮保皮蛋牛，配菜本來係老皮嫩肉，但變咗醬油玉子豆腐，無通知無貨就轉咗，感覺完全downgrade晒，但價錢一樣。而主食有滷肉飯、麻醬麵或雞肉飯，飲品就有即磨咖啡或黑糖奶茶。每一款份量都係偏少，以一個人食嘅話或者勉強足夠，但如果兩個人食就最好再加餸菜，會較抵食，不過呢個方法只限外賣，因為堂食一定要每人叫一個餐。

青木瓜燉排骨湯清甜滋潤，湯底清澈，雖然有肉排，但唔油膩，排骨同青木瓜都燉得腍身。前菜只係簡單以百香果味嘅木瓜絲、味道簡潔嘅菜脯、細細粒嘅小蕃茄撈勻，味道不過不失，但份量少係咪唔應該用咁大個碗呢？而滷肉飯米飯都算分明，入口軟糯，滷肉多為半肥瘦，但有唔少係偏瘦，滷肉汁略嫌較少，味道偏淡，若醬汁多啲、油香多啲會較好。至於黑糖奶茶亦無乜特別，合格水平，味道就等同黑糖珍珠奶茶走珍珠。

店舖以台灣出名嘅美食紅燒牛肉麵、滷肉飯、三杯雞、排骨麵等為主打，口味偏向台南，原來店內有一款更出色嘅菜式！講到最有台灣古早味、最出色嘅菜式要數鳥龍茶香燻雞$88，香氣四溢，比其他招牌菜式更加有板有眼。呢道烏龍茶燻雞一直散發極濃郁嘅香味，醬汁濃厚，煙燻味極濃，雞皮偏薄，有少量油脂，雞肉軟嫩唔乾柴，但部份略為結實，亦唔會太油膩，啖啖烏龍茶香完全滲透雞件內，非常入味。