旺角台式小鍋x港式煲仔飯外賣到底欠缺啲乜？

旺角美食有好多，一條街道內有好多餐廳可以選擇，如果拍拖兩個人去堂食，就只有一款可擇，但若然係外賣自取，就可以同一時間食兩款或以上嘅菜式，反正都係差唔多價錢，每次咁食一餐豈不是更加精彩？

毗連「阿木台灣麵」嘅「茶茶台式料理」，以台式一人一鍋為主打，當中以擺放臭豆腐嘅招牌臭臭鍋聞名，另有巴蜀烤魚鍋、泰式海鮮鍋、藥膳雞鍋、宜蘭蕃茄豚肉鍋、酸菜肥牛鍋、茶茶麻辣鍋等，如果未能夠堂食，就只能夠選擇湯麵、滷肉飯等台式小食，湯麵嘅湯底與火鍋相近，外賣除咗唔係火鍋之外，都有同一個湯汁。

藥膳豚肉麵$60，湯汁傳來陣陣藥材香，所謂藥膳湯底大概有當歸之類嘅藥材，麵底為上海麵，入口偏淋，豚肉有4至5塊，切得偏薄，連有油脂，有豚肉香，肉質偏軟。配料有杞子、娃娃菜、粟米、雲耳、蟲草花、金菇、松茸、椰菜、芫荽等，菜類較多。湯底清甜，似乎湯底有豬骨味，藥膳味唔濃郁，藥材味唔算太突出，只係微微滲透出嚟，並非嗆喉，清清哋嘅感覺。

另一間係距離不足2分鐘步程嘅「煲仔榮記」，上年店舖由慈雲山開到旺角鬧區，慈雲山原店為位處毓華里嘅「榮記茶餐室」。最初，店舖憑沙嗲牛肉麵響朵，獲得沙嗲牛肉關注組垂青，編輯好耐之前食過呢款名物，無記錯沙嗲汁的確係偏濃稠。而旺角店則顧名思議以「煲仔」為主打，既有「煲仔麵」，亦有「煲仔飯」，適逢秋冬季，呢種菜式相信即將又會變成熱門搜尋之選。

原來店舖唔單止有堂食煲仔飯，更有外賣煲仔飯套餐，包括汽水1罐，當中秘製豉汁排骨$90，加蠔汁生菜$15，加臘腸$15，合共盛惠$120。編輯唔係想投訴啲乜，只係想表達店內嘅溝通一般，明明親眼睇住落單店員並無落錯單，到最後結果結果可以將加$15嘅臘腸，變成一隻煎雞蛋！如果係煎蛋，真係有需要加$15？結果想食就只能夠自加臘腸，唔通又花錢花時間來回一轉？