全港最難Book露營場？直擊大帽山荃錦營地實況！超靚位全日無人到？

既然踏入露營季節，當然係要拍拖兩個人執起行裝去露營啦！適逢近月漁護署41個郊野公園露營場重新開放，當然係去官方營地露營，而其中位於荃灣嘅荃錦營地需要預約，被指係一個非常難以預約嘅露營場，到底有幾難Book？現場環境又係點？今次編輯成功預約荃錦營地，為大家直擊營地實況，當日竟然見到全場最靚嘅營位24小時全日都無人到場！

早前編輯提過大欖郊野公園楓葉徑，會經過大帽山荃錦營地。今次就集中講荃錦營地，只要前往大帽山荃錦公路，於大帽山郊野公園落車，折返2分鐘步程，就會到達荃錦營地入口，位置係麥理浩徑第9段。

荃錦營地位處大欖郊野公園範圍內，亦伙大帽山山腳，官方網站稱荃錦營地為中型露營場，適合初次體驗露營嘅人，換言之係一個新手露營場。

官方網站曾提到營地範圍環境清幽，林木茂盛，而且可以眺望荃灣、青馬一帶景色。但事實上，除咗林木，就只睇到麥理浩徑第9段，多數營位都係睇唔到景色，因為完全被林木遮擋。不過，最大好處係曝曬度低，鮮見陽光，毛毛雨時都唔需要特別怕，配備天幕嘅話就更加無有怕。

荃錦營地係漁護署營地預訂系統先導計劃嘅首個試行營地。荃錦營地現時需要預約，只要透過漁護署網上系統「郊野營人」，就可以預訂荃錦營地約1個月內嘅營位。但官方網站長期被Full Booking，假期爆滿難以預約，平日亦只有少量營位。編輯實測預約系統，每晚凌晨12點登入，不消2分鐘就已經未能預約，只係2分鐘內入到去填資料嘅部份就比較穩陣。一般人多數難以預約，而現場亦唔俾人執雞，故此一度被投訴有人放飛機，出現營位無人去嘅情況。

營地官方圖片顯示，每個營位都好狹窄，空間不足；但現場環境嚟睇，其實每個營位都有足夠空間，一般情況下可以接受。全場基本上有37個營位，多數係1至4人單營位，只有4個係5至8人雙營位，每人每次只可以預約1至2晚，可以連續預約2次，但最多只係4晚。

每個營位都有一個用作放置帳篷嘅木板平台，隔離有枱櫈同燒烤爐。週邊多為林木，營地大多被林木包圍，所以環境清靜，多數營位都係外望林景，坐低Chill吓都算舒適。從營位抬頭，可眺望大帽山高聳山勢，都算勉強可以Chill吓。

講到選擇營位，其實預約到一個營位已經好好，唔使旨意有得揀邊個位置。前面1至9號係近門口位置，算係睇到少少景嘅營位，當中只有6至9係雙營位，以梯田模式設計，空間固然係較多，而且活動空間可以計埋涼亭位置。而10至23號就係一字排開嘅營位，14號營位空間會比較充足。而24至28號營位、29至33號營位睇落好似好逼迫，但其實空間都足夠。至於34至37就比較接近另一邊入口同麥理浩徑第9段，亦近旱廁，唔需要步行樓梯都可以抵達，係暢通易達嘅Area。

當中，編輯覺得全場最靚嘅營位係26號，皆因呢個營位係寧寧舍舍凹咗落去，係一個Private Area，私隱度高，但以現場嚟睇，編輯親身實證，26號營位當日係24小時都無人到場，由14:00入營到18:00最後入營時間，以至凌晨時份，甚至翌日朝早11點至下午1點，都係無任何人前往紮營，意思明顯係有人放飛機。奉勸大家去到先預約，去唔到唔該放返個營位出嚟，見到靚位無人去，而自己預約唔到，其實當下真係幾嬲。

整個營地會共同旱廁、水源，旱廁位於營地兩端入口處，而水源就只係位處入口處。每個營位都配備燒烤爐，所有煮食都需要於燒烤爐範圍。

荃錦營地劃分一個個獨立營位，變相唔俾人插針，好處係每個營位所容納嘅人數有限，唔會有逼爆嘅情況，一旦多人放飛機，營地人流更少，如果能夠預約嘅話，環境會更清靜。不過，荃錦營地壞處係難以預約，即使預約成功，時間亦不足，每日最早2點登記入營，而翌日朝早11點就要離營，結果身處營地嘅時間其實不足24小時，比需要中午12點離營嘅私人營地情況更糟。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 荃錦營地預約網址﹕https://www.camping.gov.hk/tc/index.php 。

❷ 巴士路線51號可以直達大帽山郊野公園，落車後向後面方向折返，就會到達荃錦營地入口。

❸ 營地兩邊入口都有旱廁，朝早會比較乾淨，因為見到朝早有人清潔。

❹ 想要取水就只能夠返回營地入口處，但食水都係需要自備。

❺ 帳幕同天幕都必須紮喺木板位置，帳幕需要用魚骨釘釘喺木板上，或者用營繩延伸至草地，而天幕都算可以延伸少少。

❻ 營地可以帶寵物，但奉勸大家唔好帶寵物，因為營地空間有限，攜同寵物隨時影響身邊嘅營友，記住唔係個個都鍾意狗，有好多人係會驚狗，睇唔實隻狗、唔會陪隻狗玩嘅話，就唔好帶狗入場。

❼ 愛護環境，唔好亂扔垃圾，要放返入口位置，但自己垃圾都係盡可能自己帶走。

❶ 每個營位都有木板、燒烤爐、枱櫈。

❷ 每個Area都有污水穴，謹記將污水倒入污水穴內，唔好亂倒於其他位置。

❸ 煮食只可以喺燒烤爐嘅Area。

❹ 每日入營時間為14:00至18:00，離營時間為11:00，可以早少少喺營位放低物品，夠鐘就去返入口登記。

❺ 露營卡最好放置當眼處。

❻ 臨走時記得將露營卡歸還，放於入口處隔離嘅露營卡收集箱。

❼ 如果唔到場而無及時取消預約，資料會被記錄，90日內唔可以再預約，但其實呢個規則形同虛設，A君未能預約，啲人自然會搵B君、C君預約，啲人一樣會放飛機。

❶ 營地有露營用品租借，抵唔抵就可圈可點。

❷ 每晚大概9點左右會有人巡查，所以記得遵守營規。

❸ 麥理浩徑第9點可能會有馬騮。

❹ 營地兩端入口距離大概係5至10分鐘步程。