中文大學賞銀杏！未圓湖旁滿佈紅噹噹楓葉落羽松人氣打卡點合一亭「天人合一」眺吐露港

中文大學有兩個著名嘅人氣打卡點，近年變成拍拖兩個人嘅影相位，一個係未圓湖，另一個係合一亭，兩個地點其實相距一大段路，分別近崇基書院同新亞書院。適逢秋天楓香、落羽松盛放季節，編輯就前往中文大學遊覽，更意外嘅係當中有香港銀杏！不過點解我哋會想乘機進入中文大學？因為明明崇基書院大埔公路入口係必經之路，早幾個月唔俾我哋進入，唔俾我哋下行至鐵路站隔離巴士總站搭車，家陣重唔報仇咁走入去？

由沙田出發，一程巴士直達大埔公路崇基書院站，經祟基路進入依山而建嘅中文大學，會比下面地下鐵出發更方便，因為未圓湖、合一亭都係近山頂位置。依循崇基路往下行，直到分岔路口轉向學生Canteen、未圓湖方向，Canteen對面就係未圓湖位置。

於池旁路下行樓梯，最先映入眼簾嘅係紅噹噹嘅楓葉，秋季向來係觀賞楓香嘅好時機，樹頂紅葉片片，路旁一棵棵高聳楓香樹，地面有一片片楓葉落地，多數已變成枯葉，只係樹頂仍舊通紅。

中文大學未圓湖嘅楓葉形狀獨特，同平時街邊或大棠嘅楓葉狀稍有分別，平常係三角楓出現得較多，而中大嘅楓葉有少許鋸齒狀，呈五角狀，色調則有種漸變嘅感覺，比較似日本山區嘅紅葉。

除咗紅葉，其實黃葉更罕有同吸引，每年大概12月至1月，銀杏都會開始轉色，蛻變成黃澄澄色調，喺陽光照射之下，銀杏呈現金黃色，非常搶眼！一直沿樓梯下行，第二樣攝鏡嘅係一棵樹身高大嘅銀杏樹，而銀杏向來係日本黃葉代表，但喺香港就比較罕見。

中大銀杏位於未圓湖一角，雖然只係處於湖畔，但背後有小橋流水，畫面充滿詩意。現時銀杏正於盛放當中，鮮黃色銀杏隨風飄落，增添飄逸感，加上湖面襯托，銀杏茂盛情況比楓葉更搶鏡。

未圓湖本身係香港中文大學內一個中式園林，以前叫荷花池，如同休憩小公園，內有中式石橋、湖畔小徑、獅子亭，位於崇基書院範圍內。崇基書院校訓係「止於至善」，以圓滿為永恆理想、自強不息與開放嘅精神，而「未圓」其實係指「仍未圓滿，須繼續力求圓滿」嘅意思，正正呼應返校訓。

銀杏花期本身係3至4月，但現時1月已經悄悄轉黃，配合太陽昏黃光線，構成金黃色靚景，吸引咗唔少愛好攝影之人前往留影。以現場情況嚟睇，人雖然唔少，但銀杏盛放畫面的確霸氣，銀杏片片葉子於樹梢非常濃密，絕對值得一睇。

香港中文大學本身係英屬香港時期嘅校園，主權移交前係由英屬香港總督擔當校監，只係主權移交之後變成由行政長官擔任。而中大歷史可追塑至清代，直到1963年由崇基學院、新亞書院、聯合書院、逸夫書院等9間合拼而成，係全港歷史最悠久嘅學府，亦係最頂尖嘅本地大學，以前甚至曾經係世界著名大學。

穿過未圓湖小徑，前往獅子亭方向，會發現第三個吸睛點，對岸有一列落羽松整齊排列，畫面媲美另一人氣打卡點粉嶺流水響水塘。湖內有錦鯉，落羽松配合未圓湖水平如鏡嘅湖面，亦可構成天空之鏡倒影畫面。

由於落羽松同銀杏一樣，本身都係落葉喬木，冬日天氣轉冷時會分隨葉綠素，分別在於落羽松嘅胡蘿蔔素等色素就會逐漸浮現，令落羽松蛻變成橙紅色，以致中大湖畔小徑變得通紅。落羽松葉子逐漸變成紅噹噹，拍得住楓葉轉紅時囓色調，於風景如畫嘅未圓湖悠閒散散步，可以感受當中嘅閒適感。

遊走未圓湖嘅時候，有啲歷史畫面於回憶中不禁重新浮現，因為面積寬廣嘅中文大學一度係幾次重要集會、運動嘅舉行地點。不過，所有事情只能夠變成回憶，未來就如同要穿過鐵絲網一樣，行動艱難。

由未圓湖前往另一個人氣打卡點、有「天人合一」之稱嘅合一亭，可以從幾條路前往，最直接、簡單嘅方法係於Canteen背後小路出發，上行折返崇基路。而於崇基路亦有兩條路線可以上行至合一亭，左邊係穿過順利橋、中藥園，然後繼續上行至新亞書院；而右邊就上行至教職員宿舍分岔路口，再經過逸夫大樓、蒙民偉樓，穿過芝苑小路，就可以前行至新亞坊。

新亞坊學思樓、知行樓中間嘅地方就係被稱為「天人合一」嘅合一亭打卡位，而合一亭最為人熟悉嘅係當中有一個新月形水池，水比較淺，旁邊有綠樹，水池後配合藍天白雲，可輕易拍攝恍如天空之鏡嘅倒影。

所謂「天人合一」，其實係來自新亞書院創辦人錢穆著作《天人合一論》，當中有一句係「人道、天道是相通不隔」，思想互相呼應。

合一亭係香港中文大學內嘅最佳賞景位，皆因位置海拔較其他地方高，景觀遼闊，位置正對吐露港，海景一覽無遺。而吐露港背後亦可以遠眺馬鞍山、八仙嶺，甚至船灣淡水湖大壩，以致深圳山脊及高樓大廈。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線72,72A,73A,74A都可到達中文大學，共中72號可以由沙田直達崇基書院大埔公路入口。小巴路線28K,28S,28S亦可到達中文大學崇基書院。

❷ 未圓湖位置近嶺南運動場。

❸ 千祈唔好亂睇網上某啲平台嘅資訊，中大校巴係唔可以上車，就算俾上車都唔應該同人爭位坐。總之若無持有中大學生證或職員證，記得唔好博大霧搭校巴。

❹ 銀杏只有一棵，位置喺未圓湖一角。

❺ 楓葉位置喺中大Canteen對面。

❻ 落羽松位置喺未圓湖獅子亭對面。

❼ 要進入中文大學，現時唔需要在出示疫苗通行證，但就要先在保安管制站簡單登記個人資料。 ❶ 謹記愛護林木，唔好採摘銀杏、楓葉，唔好帶走葉子。

EATWO

Miss A

【區區有小店】菜式篇！港九新界尚存素食店 10間本土推介素食餐廳｜素食推薦2023

E.A.Tips :

中文大學

未圓湖

香港中文大學合一亭