自從露營地重開之後，全港營地瞬間常被逼爆，想要拍拖兩個人找尋營地空間都唔容易，其實最方便嘅營地任何時候都會好多人，反而唔方便嘅營地至少有啲時候會少人，想要點選擇就由讀者自行決定。
由大埔墟市中心乘搭一程巴士路線，可以直達新娘潭路，經過涌背營地之後，就可以於新娘潭站落車，對面係新娘潭燒烤場、新娘潭瀑布、新娘潭自然教育徑，依循新娘潭馬路走約1分鐘，會見到左邊係八仙嶺自然教育徑入口。
沿馬路邊一直走，秋季時份會見到一排排楓香樹，大概10分鐘就會到達烏蛟騰抗日英烈紀念碑，但毋須轉入烏蛟騰路，因為今次目標係降下坳營地。
繼續沿新娘潭路前行約10分鐘步程，就會見到燒烤場位置，而營地就位於燒烤場對面。降下坳營地只係位處新娘潭路邊，係八仙嶺郊野公園範圍，只係一個小型露營場，整個營地大概只係得7個營位，多數營位都係獨立，屬草泥地，但部份可能有機會俾人插針。
相對於新娘潭路前段嘅涌背營地，降下坳營地一般人流較少，但其實營地對面就係燒烤場，而燒烤場內有標準洗手間，旁邊亦有洗滌處、汽水機作補給，相當方便。而營地內亦有燒烤爐、枱櫈、晾衫架等，只不過其中一個缺點係交通人便，如果自己揸車就無問題，皆因燒烤場對出有大概17個停車位，好過逼涌背。
營地附近皆為林木，並無景觀，但就有樹蔭遮擋猛烈陽光，不過如果走上背後嘅鳳坑家樂徑，係可以遠眺鳳坑、沙頭角一帶田園景色。
而另一個缺點係營地收唔到Wifi流動網絡訊號，基本上連網都上唔到，所以好難定義為新手露營地，只係正因為收唔到訊號，人流會較少，對於喜愛露營嘅人嚟講，係會更Enjoy。
若無私家車，需要乘搭公共交通工具折返大埔市中心，建議從營地折返鳥蛟騰路，然後到烏蛟騰總站上車，步程大概係20分鐘，等同新娘潭站前往降下坳營地嘅時間。
如果輕裝露營，可以接住前往烏蛟騰郊遊徑，秋季亦可以走走烏蛟騰九担租村睇睇楓葉，只需步行約10分鐘，就可以抵達楓香林位置，相對於大棠楓葉，烏蛟騰楓香樹身係比較高聳。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 降下坳營地位於八仙嶺郊野公園範圍，位於新娘潭路旁、降下坳燒烤場對面。
❸ 乘搭小巴前往營地，要於打日英烈紀念碑落車。而乘搭巴士前往營地，就需要於新娘潭站落車，或者同心祠站落車，兩者都需要步行約20分鐘馬路先會到達營地，只係新娘潭路可能比較危險。
❹ 巴士班次比較頻密，而小巴班次就比較疏落；巴士人流較少，而小巴人流就較多。
❺ 巴士總站盡頭就係烏蛟騰九担租村入口，進入後10分鐘就會見到楓葉。
❻ 謹記自己垃圾自己帶走。
❼ 新娘潭路段較狹窄，要小心車輛經過。
❶ 營地無洗手間，不過過馬路去對面燒烤場就有洗手間、洗滌處。
❷ 如果真係想搵補給點，可以繼續走新娘潭路馬路，直行到底就係鹿頸鳳坑一帶，位置有茶座及士多，步程大概係30分鐘。
降下坳營地
船灣新娘潭路八仙嶺郊野公園
九担租
大埔烏蛟騰九担租村
