【疫苗通行證取消】香港大學校園舊民主牆旁藏3個T形街牌睇埋法定古蹟殖民時代建築物

我最期待的畫面出現了！無針人士守候已久，香港政府終於恩恤香港人，正式取消「疫苗通行證」。由2022年2月24日至2022年12月28日，香港「疫苗通行證」歷時有308日，真香港人全年只能食外賣，編輯一直覺得黎明前嘅黑暗係最黑暗，只有堅持先可以勝利，曙光就近在眼前。其實，從呢件事上係睇到好多嘢，堅持外賣期間，見盡人情冷暖，不時令人有放棄堅持嘅念頭。堂食放寬係得來不易嘅福利，一定要珍惜呢段時間嘅堂食空窗期，勝利可能係短暫，但總算等到一個結果，始後發生咩事，Who Knows？

由於無「疫苗通行證」，編輯上年有好多地方係唔俾拍拖兩個人進入，當中包括大學校園。其實編輯要進入大學校園，並唔係為咗啲乜，只係想進入校園記錄剩餘嘅香港大學校園範圍T形街牌，估唔到想為個殖民時代舊街牌留念，都要經過重重難關。

香港大學係本地8間院校之一，由薄扶林道上行，就可以到達大學校園範圍，校園西面為薄扶林道，北面係般咸道，東面為列堤頓道，南面係大學道。如果講行山路線，必定要提龍虎山，因為穿過香港大學校園，就可以走捷徑登山龍虎山範圍，毋須要兜大圈從旭龢道起步。

大學本身同殖民歷史息息相關，港大基本上經歷過日佔時期、太平洋戰爭，有逾百年歷史。最初同1887年成立嘅華人西醫書院合併為香港大學醫學院，院校於1911年成立，並於翌年辦學，係最早期亞洲頂尖大學，世界排名頗高，只係近年已有下跌趨勢。除咗殖民歷史建築物仍舊屹立不倒，亦有3個隱藏嘅T形街牌，都係多數人未必會留意到嘅地方。而T形街牌嘅位置，就位處早年香港大學民主牆旁邊。

全港僅餘嘅T形街牌唔多，現時粗略估計不足100個，但單單香港大學校園範圍就有3個，全部集中於同一個Area。本地政府有關方面對於保育、活化似乎都唔太出力，無論係舊郵筒定舊街牌，能任由消失，甚至只於牆壁上留低T字印，而事實上呢啲舊有歷史痕跡，就係香港人嘅集體回憶，同時係本土文化重要一環。

薄扶林道與大學道之間，隱藏3塊殖民時代T形街牌，靠近蒙國平花園、香港大學圖書館舊民主牆。舊街牌呈T字形，其中「中山階」就有2塊T形街牌，而剩餘1塊T形街牌就位於「中山廣場」。

事實上，喺香港大學範圍內，「中山廣場」又叫做開心公園，係一個寬敞大平台，不時會舉辦活動，位置係香港大學圖書館與香港大學建築學院之間。觀察舊街牌時不難發現，「中山廣場」英文係「SUN YAT-SEN PLACE」，以「國父」孫中山先生原名「孫逸仙」命名，皆因孫中山先生係港大校友，初時係想鼓勵港大學生要有孫中山先生嘅高尚情操。