粉嶺八仙嶺兩大營地近皇后山邨人氣十足 流水響鶴藪露營毗連水塘郊遊徑

❶ 乘搭小巴路線52B可從粉嶺市中心直達鶴藪村，於總站前鶴藪圍涼亭落車可到達鶴藪營地，回程時亦最好喺涼亭等車，因為小巴未必一定駛入鶴藪圍總站。而去流水響營地就要同去流水響水塘一樣，於八仙嶺郊野公園迴旋處落車，兩邊營地分別向鶴藪道兩端步行約15至20分鐘先會到達營地，但全程都係瀝青路，靠近馬路，專線小巴查詢電話為2669 0737。

❷ 小巴每班次需要等候20至30分鐘，建議步行來往皇后山邨至營地，由皇后山邨經布格仔路前往八仙嶺郊野公園分岔路口，腳程約30至45分鐘。乘搭79X,78X都可以直達皇后山邨，巴士座位較多，可從九龍直達新界，到達鶴藪道時間上基本相若。

❸ 如果揸車前往營地，只能喺鶴藪道泊車，而鶴藪燒烤場對出係比較正式嘅停車位，但離營地有一大段距離。

❹ 鶴藪道日光時間步行基本上無問題，但一到傍晚時份打後，就會有一堆野狗衝出，並非一兩隻，而係四至五隻，而且係每隔一段路又有一堆野狗，貌似霸地盤。所以夜晚切勿步行鶴藪道，就算夜晚要步行，都係搭車直達營地入口會比較安全。

❶ 夜晚營地會比較昏暗，記得拎齊照明設備。

❷ 營地內有洗手間、洗滌處、垃圾站，亦有加水站，如果想輕裝露營，可以拎信空樽，於加水站直接裝食水，不過每5L水需要等待5分鐘先會裝滿，時間較長，而唔信任官方加水站嘅朋友，都係自己帶齊食水啦。

❸ 謹記晚上11點後保持安靜，因為多數人都已經入營休息。

❹ 如果想食蔬菜，未必一定需要自備，可以去鶴藪道東山下村農地購買，下午時份有時亦會有村民喺鶴藪道擺賣，每棵大概$20。

❶ 營地補給點為鶴藪道上嘅鶴藪士多，靠近燒烤場，而東山下村亦有一部汽水機。

❷ 營地有蚊蟲，謹記帶備防蚊用品。

❸ 鶴藪營地內可能有野豬從草叢出沒，所以夜晚時最好將食物綁起，而野豬比較怕光，加上少量燈飾亦可避免野豬接近。

❹ 想要到流水響水塘散步嘅話，最好於朝早10點前就要離開水塘，換句話說8點要喺鶴藪起步，因為假期10點前後就會有一車又一車旅行團前往流水響水塘。