深井燒鵝街出發清快塘路線！1小時抵田夫仔營地毗連麥理浩徑9段

香港官方露營地有41個，有唔少營地依麥理浩徑而建，毗鄰山路，方便部份行山人士走營，行山行到攰攰哋，可於營地稍作休息，而麥理浩徑第9段旁邊則有幾個營地，包括位於起點、編輯早前講過嘅荃錦營地，另一端近田夫仔重有一個山中營地適合拍拖兩個人前往。

要前往田夫仔營地，當然可以從大帽山腳麥理浩徑第9段起點出發，先經過荃錦營地，依循第9段走，全程為瀝青路，可以拖車進入營地，而且為平路及下山路段，只不過需要走6公里，腳程較長，需時約1.5至2小時。另一邊廂，亦可以從深井起步，只不過為上山路段，但好處係路程較短，1小時左右足以到達營地。

實測由深井碧堤半島出發，向多間燒鵝飯店方向走，於青山公路轉入深康路，路口會見到靈光小學，經過裕記燒鵝飯店，前行直到見到裕記停車場，插入小路就可以上山。早段會見到深井新村、光屋，其後會見到天地父母廟。

只需要依清快塘下村方向上行，10分鐘左右會見到公廁，再上行5分鐘會到達清快塘下村涼亭。基本上只有頭段比較需要辛苦上山，只要到達清快塘喜香農莊，就無需要太辛苦上行。由涼亭起步，20分鐘左右可抵達農莊；而由山腳深井新村起步，至農莊範圍則需要30至45分鐘。

喜香農莊為一個補給點，可以稍作補給，此後前行約500米，即可接駁麥理浩徑第9段。呢個時候需要注意，雖然第9段係可以到達目的地田夫仔營地，但路段比較長，行得就最好走左邊元荃古道郊遊徑山路，10至15分鐘就會接駁返麥理浩徑第10段。

由於田夫仔營地係位處麥理浩徑第9段終點與第10段起點，所以由深井出發上行至第10段，前行350米即達露營地，相對第9段起點出發嚟講，只係3至4公里路程，時間較短。

田夫仔營地係位於深山之中嘅官方露營地，屬大欖郊野公園範圍內，毗連麥理浩徑第9至10段，亦靠近元荃古道，四面林木茂盛。

官方資料雖然稱營地為中型露營場，但營地基本上只有7至8個燒烤爐及營位，不過側邊草地都算平地，可以起營嘅，約營地太多人，勉強都可以於旁邊插針，粗略估計都可以容納到30個帳篷。但田夫仔營地比較與世隔絕，設施不便，所以通常無其他營地咁多人。

營地嘅水源勉強只有遠處溪澗，或者上山時去洗手間攞定水，附近亦無食水加水站，同時只有一個旱廁。加上營地係全無手機訊號，比較山長水遠，所以並唔係官方所講適合初次體驗露營之人，嫌棄不便嘅營友就去返啲方便營地啦。

整個營地靠近田夫仔村，基本四面環山，綠草如茵，藍天綠地畫面蔚藍又碧綠，自然舒適。四週被林木包圍，唔會車水馬龍，感覺遠離繁囂。不過，上路為元荃古道郊遊徑必經之地，都要睇行山人士多唔多同嘈唔嘈，但營地位於下方，都算清幽寧靜，附近更有一道田清橋。

於營地離開時，折返深井村方向為下行路段，會比較方便；否則荃錦營地則為上山方向，比較艱辛；若走元朗大棠方向，路程亦比較長。走深井清快塘方向落山時，可以順道清晰眺望青馬大橋景色。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線48P,52X,53,96,96M, 234A,234B,234C,234D,302 ,308M,A38,N252均可到達青山公路深井段碧堤半島，就可以從深井村出發；而巴士路線51號則可從荃灣出發，至大帽山郊野公園落車，一直依麥理浩徑第9段起點走到第9段終點，就會到達營地範圍。

❷ 如果想要於深井先食嘢，可於深井村落車，有July Coffee、光榮冰室、迦南鍋可擇。

❸ 最近補給點為喜香農莊，但夜晚山路可能有野狗出沒，需要小心，要盡量避免夜晚獨行。

❹ 由田夫子營地上行折返第9段終點，只有一個旱廁。

❶ 麥理浩徑路段雖然係瀝青路，但路段係需要permission，要有批准先可以揸車進入。

❷ 營地有污水穴，污水記得唔好亂倒入草地中。

❸ 記得自己垃圾自己帶走，盡可能減廢，帶少啲塑膠物，難搞嘅食物要預先處理，最後最好只係得返一小袋垃圾，如果分類埋會更好。

❹ 營地全無手機訊號，想要娛樂或通訊，最好要自行再預備，或者行返出大路。