觀塘新海濱工廈飯堂禾稈冚珍珠豐業地踎工人食堂$44大大碟炒飯

觀塘餐廳向來數量多，可支持商家嘅數量亦唔少，但要應付觀塘返工嘅人，其實都唔容易，網上唔少觀塘人都曾於網上大吐苦水，指觀塘搭車、食飯都要等好耐，可謂地獄區。如果想拍拖兩個人食吓飯撐枱腳，更加唔容易，其實大家不妨考慮分散到觀塘非主流地方，編輯今次發現觀塘新海濱位置有一間躲藏於工廈內嘅飯堂，價錢低廉，出品同樣係茶記水平，午餐時間客人流轉度高，唔需要特別排隊。

位於觀塘新海濱工業大廈內嘅「豐業食堂」，附近為車房，唔細心留意未必可以見到呢間工廈飯堂。「豐業食堂」位處豐業工業大廈內，取其「豐業」而命名，據悉呢間飯堂已經有39年歷史，係一間工廠區食堂，客人大多係附近工人或該工廈嘅員工，人流絡繹不絕。

「飯堂」兩個字，有時候會嚇走唔少女生，大多會大嗌「不了」，飯堂通常係最「麻甩」嘅男人老狗先會洶湧去食，皆因飯堂通常環境較差，只有彈丸之地，地方擠迫，食物賣相亦較差，唔少人都會覺得飯堂食物係劣質，如果男人初次約會破格地帶女生到如此「地踎」嘅地方，係一件兵行險著嘅事，不過中嘅話就粉絲都變魚翅。但事實上，愈「高」「貴」嘅餐廳，食物份量愈被商家「壓榨」得如法國餐，兼且收取法國餐價錢，但味道又不如法國餐；相反，愈「地踎」嘅地方，愈係最難以估計，雖然未必係好高質素，但大多數都係對得住價錢有餘，要選擇食環境，定係食質素，就由讀者自行選擇啦！

一間工人飯堂，最有價值之處當然係「大件夾抵食」，份量多，而且價廉物美，以傳統嚟講，工人需要飽肚先會有氣力工作，所以每一碟飯或意粉都係大大碟，女生就未必食得完。店內裝修陳舊，地下係有歲月痕跡嘅舊式階磚，餐牌透明度高，無論地面定1樓，抑或店內牆上嘅餐牌，都清楚列明菜式、價錢，菜式以中式為主，亦有港式西餐，或者茶記粉麵。

到茶記食飯，識叫一定係叫炒嘢，包含炒飯、炒粉、炒麵，因為茶記或飯堂嘅鑊特別大規模，向來特別有鑊氣！飯堂食物方面水準不俗，餸菜選擇眾多，今次以照燒牛柳粒炒飯為例，以飯堂一貫使用嘅大型白色圓碟盛載，牛柳粒份量多，無乜醃製，唔會太鹹，炒飯含蛋絲、蔥等，配料簡單，飯量充足，飯粒乾爽，略嫌部份未炒勻。

每份套餐都會有一碗例湯，例如當日餐牌有青紅蘿蔔豬骨湯，湯底鮮甜，材料有青紅蘿蔔、南北杏、豬骨，甚至果皮。即使係加價，都仍然係$50內。檸茶、奶茶都係傳統冰室、茶記、飯堂不可或缺嘅飲品，呢間飯堂大多數客人都係挑選呢兩款飲品，的確檸茶係紅茶、檸檬味都充足，茶味重，略帶微微澀味，當然加冰就會較淡。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線 215X, 641, 68 可以到達觀塘。

❷ 豐業工業大廈離觀塘海濱同觀塘碼頭不遠，為新海濱地帶。

❸ 一般每日飯餐外賣$45，加熱飲$48，加凍飲$50，堂食全部減$1。

❹ 飯堂姨姨相當友善，會提點午市套餐較便宜，散叫會較貴。

❺ 有興趣可以留意吓水吧上嘅吊燈，幾有特色。

❻ 內有自家製中式糕點同粉麵可以購買。