觀塘中海日升中心包辦台日韓菜 $18包3件人氣韓式炸雞有咩問題？

觀塘美食眾多，單單一幢中海日升中心就有3間可支持商家，包括丼瀛、龍鳳號、韓家韓國料理，3間分別係日本菜、台灣菜、韓國業，無論想食咩菜式都得，拍拖兩個人食飯想食咩謹記要揀得清清楚楚呀！

（1）韓家韓國料理

今次先提及編輯比較少食嘅韓國菜，韓家喺台灣亦為人氣食店，不過兩者之間係咪有關係就要再查證一下。而觀塘韓家亦係一間韓國料理餐廳，據悉台灣當地午餐約為200台幣，而香港觀塘嘅午餐則約為$55至$70，價錢上稍高，但尚算係經濟餐嘅。

午市套餐有9款，包括有韓式烤肉飯、韓式烤肉炒粉絲、韓式泡菜炒飯、滑蛋鹽燒三層肉飯、韓家八色拌飯、泡菜炒肉飯、炒辣雞配年糕、嫩豆腐湯配白飯、鹽燒三層肉部隊鍋，都屬韓國著名美食，比較大眾化。上主菜之前，都同樣會上3款前菜，包含青瓜絲、大豆芽、薯仔蓉，冷冰冰嘅前菜，份量少，算開胃，都係韓國特色嚟嘅。熱飲全部都免費，凍飲加$3，清淨園紅醋為暖飲，幾特別，入口微酸，略略似蘋果醋嘅感覺，暖醋比較少見，唔算太酸，容易入口，可以解解膩。

當中韓式烤肉飯$65 可配搭豬、牛、雞或雜菜，牛肉份量唔少，略有參差，部份稍韌，調味上不俗，配有洋蔥、蘿蔔絲、沙律菜，飯面有一隻荷包蛋，半熟蛋黃內嘅蛋汁可撈飯，而牛肉醬汁則鹹中帶甜，但鹹味較重，亦可以撈飯。

而小食則有韓式炸雞$18 有甜辣味或柚子蜜味，亦有韓式煎餅有雜菜或泡菜，而韓式炸雞據悉係招牌之作，亦係唔少平台同網民大讚嘅菜式，算係人氣之選。$18嘅炸雞有3件，選上經典甜辣口味，炸雞上淋上甜辣醬，味道固然帶上微辣感，的確係經典惹味。不過，炸雞表皮伕乎過厚，雞肉較少，入口炸粉較多，感覺無乜肉地，較油膩，KFC炸雞比呢份炸雞似乎更好食，更不用說Jollibee，故此稍有失望。

（2）龍鳳號

走上一層樓，馬上可以見到龍鳳號，為台灣菜小店，門口字樣明顯，室內外都以木質為主，包括牌匾、窗花、枱櫈，尤如古代客棧，古色古香，而店內嘅龍鳳號字樣同店外招牌又唔一樣，反而採用霓虹燈牌，古風當中略帶現代風格。

菜式包含多款台式地道美食，有香酥排骨、檸香素魚、炸雞腿、滷豬手，另有三杯雞、麻油雞、大腸麵線等台灣菜式，亦有台式甜品供應，包含黑糖刨冰、仙草凍等。前菜、湯分別為翠肉瓜片薄片涼菜、苦瓜湯，驚喜不大，爽口翠玉瓜加上微鹹醬汁，湯則略帶甘甜。而主食則可自由配搭，選擇有台南擔仔麵，或者肉燥湯板條、新竹米粉、乾拌麵、乾拌新竹米粉，甚至古早味肉燥飯，台灣珍珠米、古早味魯肉飯。

當中有炸秘製大雞腿套餐$68，炸雞髀為正常雞髀Size，脆炸方式有別於鹽酥雞、港式生炸雞髀，表皮薄脆，雞肉本身無咩味，但調味就有台灣雞排嘅感覺，大概係五香粉。不過，雞髀雖然嫩滑，但比較油膩，並非來自本身雞油，而係脆炸時嘅油份。

配上一碗古早味肉燥飯，肉燥飯相對魯肉無咁肥膩，以豬肉碎為主，同樣配搭醬油糕、生抽、冰糖等熬煮，肉粒滿滿豬肉油香，有咬感，配搭濃稠醬汁，入口香甜，一碗份量充足，足夠撈飯，唔會有肉燥少而白飯多嘅情況。白飯為台灣珍珠米，煙韌有咬口，加上魯肉汁後更香口。

如果想要台式飲品，有14款可以選擇，全部自家製作，放入印有店名嘅膠樽，可以帶走。當中檸檬冬瓜茶$12入口酸甜，的確有台灣茶飲感覺，但最大分別係無咗台灣茶飲嘅超甜感覺，反而檸檬味重，冬瓜茶變成配角。

（3）丼瀛

而另一間就係工廈都有分店嘅丼瀛，同韓家為同一層樓，主打嘅係日式料理、丼飯、壽司、炸物，每碗刺身丼飯都份量充足，材料新鮮，足夠一人份量，編輯曾於工廈分店食過，但就未於中海日升中心分店食過，所以就唔特別俾評語啦。

延伸閱讀﹕觀塘工廈平民丼飯甲羅燒蟹膏勁飽滿

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線 215X, 38, 42C, 641, 671, 88X 可以到達觀塘。

❷ 雖為韓國餐廳，但除咗韓國明星同MV，店內有大量Mirror相片海報，而電視亦有Mirror同Error嘅MV。

❸ 韓家午市套餐會附送熱飲，凍飲就要加$3。

❹ 韓家每份套餐可以加小食，包含兩款韓式炸雞同兩款韓式蛋餅。

❺ 韓家枱面有清水可以自由斟，而筷子則同樣於枱面攞。

❻ 龍鳳號

❼ 龍鳳號午市套餐有6款選擇，每款又可以配搭唔同款式飯粉麵。

❽ 龍鳳號一般台式飲品要加$12。而珍珠奶茶等加$28係採用燕麥奶。

❾ 龍鳳號外賣自取有85折。

EATWO

Miss A

【區區有小店2024】長洲13間尚存本土餐廳推介！長洲人車仔麵／BBQ場地／芒果糯米糍｜長洲美食推薦2024