尖沙嘴廣東道昔日劏場重開最強潛力股曾現Mirror應援市集！3間黃小店進駐Cantonyama

尖沙嘴廣東道80號，係一個你可能拍拖兩個人行過亦未必會留意到嘅地方，近月該商場重開，不單有懷舊市集，亦有日式商場、劇本殺體驗館，聖誕期間更有一個全Mirror限時市集，現時以Cantonyama命名。

Cantonyama正對海港城，離Apple尖沙嘴門市只係1分鐘步程，大紅色招牌其實幾明顯，不過偏偏係行人唔會留意嘅一個商場。以往商場曾經係一個以劏場為主嘅死場，後來人跡罕至，不了了次，形成一片死寂；而今年中商場正式翻新，以廣東捌拾命名，取其地埗廣東道80號，英文則為Cantonyama。

適逢聖誕節，商場最吸睛嘅地方莫過於門口、上層2樓均有以人氣組合Mirror為主、Error為副嘅限時市集，全層市集由12月15日開放至12月27日，場內有大量打卡位、商品、應援物，更有聖誕卡同限定禮盒，至於會唔會繼續營業，又或者改為其他市集，詳情則要睇官方公佈。同層更有一個日式超市Mini Mart，產品豐富，包含日本零食、急凍食物、生活雜貨、化妝品、保健品，甚至酒品區內嘅清酒、梅酒等，門口更有一部試酒機。

最頂層則為洗手間位置，以及一個叫劇本殺體驗館嘅地方，不過並非即場開放，需要預約，編輯當日時間見到只能通往洗手間，但門口有兩個小牌，寫有兩個劇本殺體驗，顯示指定場次，如果預約成功，可以一嘗互動推理遊戲。

行到攰攰哋，可以折返1樓，內有一個懷舊市集，室內以竹棚設計，有幾個打卡位，最值得推介嘅地方係該層樓一次過有3間同路人外賣店，包括德國熱狗、茶匠、長洲角酪，一邊食支熱狗，一邊歎杯茶飲Relax吓，茶匠嘅烏龍茶或綠茶都好有茶香，價錢較外面低，但又比外面大杯，而長洲角酪嘅水果茶則較有果香，但後者以乳酪為主打。3間小店對面有一個懷舊冰室設計嘅打卡位，既可以休息、打卡，亦可以坐低食吓嘢、飲吓嘢，只係冷氣比較大，另因為係外賣店，所以毋須使用安心出行。

商場本身樓高3層，而該層樓前面有竹棚街道、戲棚花牌、霓虹燈牌、花花座椅，而背後更有一系列街景牆身，包含港島街景、屋邨景，甚至已經被清拆嘅皇后碼頭，復古味濃，宛如時光倒流回到80年代香港，實在相當有懷舊感。不過，編輯有一點唔明白，1樓門口有一小牌寫有請勿攝影，但據悉懷舊市集內係以打卡位嚟吸引人流，該警告牌其實會唔會同原意有衝突呢？

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ CANTONYAMA廣東捌拾位置離Apple只係1分鐘步程，正對海港城。

❷ 2樓暫時只係開放至12月25至12月27日。

❸ 1樓懷舊市集內有3間同路人小店，包括德國熱狗、茶匠、長洲角酪。

❹ 如果真係揸車去，可以於港威大廈、中港城、中間道H Zentre泊車。

❺ 而3樓就唔係成日開放，基本以洗手間為主。