荔枝角程班長台灣美食宣佈即將結業台灣味牛肉麵營業至明年3月！

以本土熱門食店嚟講，主打台灣菜嘅程班長台灣美食絕對係其一，係拍拖兩個人經濟嘅選擇，不過近月官方就宣佈小店只會營業至明年3月中旬，雖未有交待原因，只提到工廈單位將結束舖位租用，但顯然代表即將結業，正宗台灣風味小食兼同路人又會減去一間。

位處荔枝角工業大廈內嘅程班長台灣美食，不時大排長龍，人氣十足，店內以滷肉飯、牛肉麵、鹽酥雞、蛋餅等為主打，屬台灣夜市風味小食，唔少人大讚啖啖原汁原味，由台灣人將風味帶來港，開業之後成為受歡迎嘅人氣小店，室內座位貌似班房，打造台灣食堂，貌似CP值甚高。

當中，紅燒牛肉麵$53 為人氣菜式之一，或者挑選紅燒半筋半肉麵，湯底香辣，紅燒味濃郁，表面有一層紅油，原來叫骨髓油，來自熬煮過嘅骨頭，略帶微微香辛辣味，惹味非常，雖然辛辣味蓋過其他味道，但係有台灣味。而牛肉燜得軟腍，較薄身，份量約三四舊，牛肉有牛味，為牛𦟌肉，有咬口，入口唔韌，油脂分佈適中，麵底選用較粗身嘅麵條，帶捲曲狀，有少少厚身，需要不斷嘴嚼，顯然有咬口。

至於清燉半筋半肉麵$55 則有牛肉配牛筋，清燉湯底比起紅燒湯底更需要花心思，而且難度較高，本身湯底清甜不膩，只係食到底會較油。而牛筋較牛肉厚身，入口軟綿，有咬口，略帶膠質口感，略嫌唔夠膠，但尚算索湯，牛肉同樣為牛𦟌肉，入口軟腍，亦較薄身，相對牛筋入味。

受歡迎小食重有黑糖芋圓、台菜麻油雞、刈包、大腸包小腸、蚵仔煎、甜不辣、玉米起司蛋捲餅、手工滷肉便當，其中柴魚皮蛋豆腐$22 以溏心皮蛋配香滑豆腐，配上蔥花、柴魚片調味，醬汁亦平衡鹹甜味，整體不過不失溏心皮蛋相當滋味。另有豆乳雞$32，粒粒炸得香脆，略有豆乳味，味道唔算重，但傳出陣陣酥香，邪惡感拍得住鹽酥雞。

冬瓜茶$10、冷泡高山茶$10 雖然為冰涼飲品，但並無放冰塊，冬瓜茶甜味充足，但唔會過甜，貌似天然甜味，並非後加嘅糖水，而高山茶內有茶葉，茶味香濃。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線 102, 171A, 171P 可到達荔枝角。

❷ 店舖位處億利工業中心工廈內，乘搭電梯上一層樓轉右再轉左就到。

❸ 若人流唔多，可以直接進入，但如果人流多，就需要於門口先攞飛等候，最好避開食飯時間，1點後會較多人。

❹ 座位數目都多，所以流轉度亦快。

❺ 餐具、紙巾、醬料都需要於自助位自取。

❻ 先點餐，入座前於門口落單、俾錢，之後將號碼牌放座位頂頭，然後會逐漸有店員送上枱。